የኮቪድ-19 ክትባትን በኢትዮጵያ ለማምረት የሚያስችል ዝግጅት እየተደረገ ነው

0
1653

ማክሰኞ የካቲት 1 ቀን 2014 (አዲስ ማለዳ) በኢትዮጵያ የኮቪድ-19 ክትባት ማምረት የሚያስችል የዝግጅት ሥራ እየተከናወነ መሆኑን የጤና ሚኒስትር ዶ/ር ሊያ ታደሰ ገለጹ።

ሚኒስትሯ ለኢትዮጵያ ፕሬስ ድርጅት እንደገለጹት፤ የኮሮና ወረርሽኝን ለመከላከል ከሚሰሩ ሥራዎች ጎን ለጎን በአሁኑ ወቅት የኢትዮጵያ ጤና ሚኒስቴር ከአፍሪካ ህብረት የበሽታዎች መከላከል ማዕከል እና ከአጋር ድርጅቶች ጋር በመሆን የኮቪድ-19 ክትባት ማምረት የሚያስችል ተግባር እያከናወነ ነው ብለዋል፡፡

ከአፍሪካ አገራት የኮቪድ-19 ክትባት በማምረት ደቡብ አፍሪካ የመጀመሪያ አገር መሆኗን ጠቅሰው፤ የአፍሪካ ህብረት አባል አገራቱ ክትባቱን በየግላቸው ከማምረት ይልቅ እንደ አህጉር በጋራ እየተሰሩ ያሉ ሥራዎች መኖራቸውን ተናግረዋል፡፡

ክትባቱን የማምረት እንቅስቃሴ እንደ አገር እና አህጉር ጠቀሜታው የጎላ መሆኑ ታምኖበት ኢትዮጵያ በንቃት እየተሳተፈችበት ትገኛለች ነው ያሉት ዶ/ር ሊያ።

በተለይም ክትባቱን በአገር ውስጥ ለማምረት የሚያስችል የገበያ አዋጭነት ጥናት፣ ከአጋር አገራት እና ድርጅቶች ጋር ውይይትና የልምድ ልውውጥ የማድረግ እንዲሁም ምርቱን ለማስጀመር የሚያስችሉ ተግባራትን በዝርዝር የመለየት ሥራ ተሰርቷል። ዝርዝር ጥናቶች ሲጠናቀቁ አገሪቱ ክትባቱን ወደ ማምረት እንደምትገባም ገልፀዋል።

የኮቪድ-19 ወረርሽኝ በዓለም ላይ መከሰት የጤናውን ዘርፍ ትልቅ ጫና ከማሳደሩ ባሻገር ማህበራዊና ኢኮኖሚያዊ ጉዳቶችንም አስከትሏል።

በኢትዮጵያ ወረርሽኙ ከተከሰተ ጊዜ አንስቶ የኮሮና ቫይረስን ከመከላከልና ከመቆጣጠር በተጓዳኝ ክትባቱን በድጋፍ መልክ እያገኘች ትገኛለች። በዚህም መንግሥት ለኮቪድ-19 ክትባት ግዢ ተጨማሪ ፋይናንስ በመመደብ ክትባቱን በአይነትም ሆነ በመጠን ለመጨመር ከዓለም አቀፍ ድርጅቶችና ከአፍሪካ ሕብረት ጋር እየሰራ እንደሆነም አስታውቀዋል።
_____________________
ትክክለኛውን የአዲስ ማለዳ ሶሻል ሚዲያ በመቀላቀል ቤተሰብ ይሁኑ
Telegram ➲ t.ly/SOXU
Facebook ➲ t.ly/flx8
YouTube ➲ t.ly/vSgS
Twitter ➲ t.ly/mxA4n

መልስ አስቀምጡ

Please enter your comment!
Please enter your name here