በኢትዮጵያ የአየር ንብረት ለውጥ ተጽዕኖ ከጊዜ ወደ ጊዜ እየጨመረ መምጣቱን የኢትዮጵያ ፖሊሲ ጥናት ኢንስቲትዩት ገለጸ።
ኢንስቲትዩቱ ከዴንማርኩ ኮፐንሀገን ዩኒቨርሲቲ ጋር በመተባበር በአየር ንብረት ለውጥ ላይ ጥናት እያካሄደ እንደሚገኝም ተገልጿል። በዚህም በዳሰሳ ጥናቱ የመጀመሪያ ግኝቶች ላይ ውይይት እየተደረገ ሲሆን፣ ጥናቱ የተካሄደው በ5 ክልሎች እና በድሬደዋ ከተማ አስተዳደር ነው ተብሏል።
በጥናቱ ከተካተቱት ቤተሰቦች ውስጥ 24 በመቶ የሚሆኑት ባለፉት 5 ዓመታት ውስጥ ቢያንስ 1 ጊዜ ድርቅ እንዳጠቃቸው ጥናቱ አመላክቷል።
ከ80 በመቶ በላይ የሚሆነው የኢትዮጵያ ሕዝብ በሚተዳደርበት የግብርናው ዘርፍም የአየር ንብረት ለውጥ ተጽዕኖው እየበረታ እንደሆነም ነው የተገለጸው።
በአሁኑ ወቅት በምሥራቅና በደቡብ ኢትዮጵያ አካባቢዎች በአየር ንብረት ለውጥ ምክንያት በርካታ ዜጎች ለድርቅ መጋለጣቸውም ተጠቅሷል።
ከ1957 እስከ 2007 ባሉት ዓመታትም ከ15 የሚበልጡ ድርቆች በኢትዮጵያ መከሠታቸውም ተመላክቷል።
ቅጽ 4 ቁጥር 175 መጋቢት 3 2014


