የ‹ፊንቴክስ‹ 3ኛ ዙር ‹የፈርኒቸር› ዓውደ ርዕይ ከመጋቢት 29 ጀምሮ ይካሄዳል

0
897

የፊንቴክስ 3ኛ ዙር የፈርኒቸር፣ የቤተ-ውበትና የግንባታ አጨራረስ ምርቶች፣ አገልግሎቶች እና ቴክኖሎጂዎች ዓለም ዐቀፍ ዓውደ ርዕይና ኮንፈረንስ ከመጋቢት 29 እስከ ሚያዝያ 1/2014 “ንግድዎን በመቅረዝ ላይ ያኑሩ” በሚል መሪ ቃል በኢትዮጵያ ስካይ ላይት ሆቴል ይካሄዳል።
በዓውደ ርዕዩ ለፈርኒቸር አምራቾች ዘላቂ የንግድ ትስስርን መፍጠር እና የዘርፉን ዕድገት ማረጋገጥ በሚያስችል ኹኔታ የንግዱን ማኅበረሰብ ትኩረት በመሳብ፣ ለግብይት ምቹ ኹኔታዎችን ይፈጥራል ተብሏል። በዘርፉ ላይ የሚደረገው የውይይት መድረክ ለፖሊስ አውጪዎች፣ ለንግዱ ማኅበረሰብ እና ለባለሙያዎች ዘላቂ ልማት ላይ ትኩረት ያደርጋል ተብሏል።
ኢትዮጵያ በዘርፉ ለምታካሂደው የምጣኔ ሀብት ልማት የአቅም ግንባታ መፍጠር የሚያስችል ትምህርትና ስልጠና፣ እንዲሁም ዓለም ዐቀፍ የንግድ እንቅስቃሴ የሚያሳዩ ዝግጅቶች ከተለያዩ አገራት በተውጣጡ ባለሙያዎች እንደሚቀርብ ተጠቁሟል። በዓውደ ርዕዩ ላይ ከ60 በላይ ኩባንያዎች ከአገር ውስጥ፣ ከኬኒያ፣ ከፖላንድ እና ከቱርክ የሚሳተፉ ሲሆን፣ ከ400 በላይ ገዥዎችና ከአራት ሺሕ በላይ የንግድ ማኅበረሰብ አባላትና ጎብኝዎች እንደሚስተናገዱ ይጠበቃል።
በኢትዮጵያ በፈርኒቸር ምርት ላይ ለተሰማሩ ለዘርፉ አምራቾች የተሰጠው ትኩረት አናሳ መሆኑና ዘርፉ በሚፈለገው ልክ አለማደጉን የፈርኒቸር አምራቾች ማኅበር ይገልጻል። የአገር ውስጥ ፈርኒቸር አምራቾችን ማበረታታት እንደሚገባ እና ኢትዮጵያ ከውጭ ፈርኒቸር የምታስገባበትን የውጭ ምንዛሬ ማዳን እንደሚገባ ተጠቁሟል።


ቅጽ 4 ቁጥር 178 መጋቢት 24 2014

መልስ አስቀምጡ

Please enter your comment!
Please enter your name here