በኮቪድ19 ምክንያት በዓለም ዐቀፍ ገበያ የቡና ፍላጎት ጨመረ

Views: 641

በዓለም ዐቀፍ ደረጃ የተከሰተውን የኮሮና ኮቪድ 19 ቫይረስ ወረርሽኝ ተከትሎ፣ የቡና ፍላጎት በዓለም ዐቀፍ ገበያ ጭማሪ ማሳየቱን የኢትዮጵያ ቡና ላኪዎች ማኅበር አስታወቀ።

በአሁኑ ወቅት የዓለም ዐቀፍ ስጋት በሆነው ወረርሽኝ ምክንያት አብዛኞቹ የዓለም አገራት በረራዎችን ያቆሙ፣ ድንበሮቻቸውን የዘጉ በመሆኑ የሰዎች እንቀስቃሴም የተገደበ ነው። ሆኖም አገራቱ የቡና ገዢ እንጂ አምራቾች ባለመሆናቸው፣ ተጨማሪ እና ተቀማጭ ምርቶቹን ለማስገባት ፍላጎታቸው እየጨመረ መምጣቱን የኢትዮጵያ ቡና ላኪዎች ማኅበር ለአዲስ ማለዳ ገልጿል።

የኢትዮጵያ ቡና ላኪዎች ማኅበር ዋና ሥራ አስኪያጅ ግዛት ወርቁ ለአዲስ ማለዳ እንደተናገሩት፣ የዓለም ዐቀፍ የቡና ነጋዴዎች የቫይረሱ ስርጭት አሁን እንደሚታየው ከቀጠለ እና ለብዙ ጊዜ የሚቆይ ከሆነ በአገራቱ በኩል የቡና ንግዳቸውን ሊያበላሸው እንደሚችል ስጋት አላቸው። ስለዚህም ተጨማሪ እና ተቀማጭ ቡና ለመግዛት በመፈለጋቸው ይህ ተጨማሪ ፍላጎት መፈጠሩን አስታውቀዋል።

በተለይም በአፍሪካ እና በላቲን አሜሪካ አገራት ቫይረሱ ብዙም እየተሰራጨ ባለመሆኑ፣ አገራቱ ቡናን ለመግዛት ፍላጎታቸው እየናረ መሆኑን ዋና ሥራ አስኪያጁ ለአዲስ ማለዳ ጨምረው ገልጸዋል። ከዚህም ጋር አያይዘው እንደጠቀሱት፣ በመጠን ደረጃም ባለፈው ዓመት ወደ 232 ሺሕ ቶን የሚጠጋ የቡና ምርት ወደ ውጭ የተላከ ሲሆን፣ በኮቪድ 19 ወረርሽን ምክንያት ነገሮች የማይበላሹ ከሆነ በያዝነው 2012 እስከ 300 ሺሕ ቶን የሚጠጋ ቡና ይላካል ተብሎ እንደሚጠበቅ ማኅበሩ አስታውቋል።

ግዛት እንደገለጹት፣ ከኹለት ወራት በፊት በአሜሪካ እና በሌሎች አገራት እንደ አሁኑ በብዛት ባለመስፋፋቱ እምብዛም ችግሮች አይስተዋሉም ነበር። የንግድ እንቅስቃሴውም በተገቢው መንገድ ይከወን እንደነበር አስታውሰው፣ በኢትዮጵያም ወረርሽኙ ካልተባባሰ እና እንቅፋት ካልሆነ የታሰበው የወጪ ንግድ እንደሚከወን ይጠበቃል ብለዋል።

‹‹ይሁን እንጂ ስርጭቱ በዚሁ ከቀጠለ በሥራችን ላይ ችግር ይፈጥራል የሚል ስጋት አለን።›› ሲሉም ሥራ አስኪያጁ ተናግረዋል።
‹‹ይሁን እንጂ የቡና ምርት እጃችን ላይ በመሆኑ፣ ብዙ አገራት ውላችሁን አራዝሙት እያሉን ነው።›› ሲሉ የግዢ ፍላጎታቸውን የጨመሩ እንዳሉ ለማወቅ እንደተቻለም ግዛት ጨምረው አስታውቀዋል።

የቡና ምርት እንደ አበባ ምርት በቶሎ የሚበላሽ አለመሆኑን እንደ አንድ ጥሩ እድል የጠቀሱት ግዛቱ፣ በቡና ምርት ላይ የተሻለ ዋጋ እናገኛለን ብለው ምርቱን ከያዙት ከጥቂት ገበሬዎች ውጪ የቡና ምርቱ ላኪዎች እና አቅራቢዎች እጅ ላይ ስለሆነ እንዲሁም እነሱም ቢሆኑ ቡናውን የገዙት በብድር ጭምር በመሆኑ፣ ‹‹በእኛ በኩልም ለአባላቶቻችን ቡናውን ከእጃቸው ላይ እንዲያወጡ እያደረግን ነው›› ብለዋል።

እስከ አሁን ድረስ ግን በኮቪድ19 ምክንያት የዓለም አገራት ደንበሮቻቸውን እና የአውሮፕላን በረራዎቸን እየቋረጡ ቢሆንም፣ በቡና ንግድ ላይ ምንም የቀነስ ነገር እንደሌለም ጨምረው ገለጸዋል። አክለውም በዋጋ ደረጃ ይህ ነው ተብሎ የሚነገር ለውጥ የለም ብለዋል።

ኢትየጵያ ባለፈው 2011 ከቡና ውጪ ንግድ 761 ሚሊዮን ዶላር ገቢ ያገኘች ሲሆን፣ የቡና ንግድ በኢትዮጵያ ከፍተኛ ድርሻ እንዳለው ነው የጠቀሱት።
ኢትዮጵያ ቡና ከምትልክባቸው አገራት መካከል በቀዳሚነት ከየሚጠቀሱት ጀርመን፣ ሳውዲ አረቢያ፣ አሜሪካ፣ ጃፓን፣ ቤልጂየም፣ ጣሊያን፣ ፈረንሳይ ሲሆኑ፣ ሌሎች አገራት ይገኛሉ።

የኢትዮጵያ ቡና ላኪዎች ማኅበር ከ240 በላይ የቡና ላኪ አባላቶች አሉት። ከቡና ምርት ጋር በተያያዘም በኢትዮጵያ ከ25 ሚሊዮን አስከ 30 ሚሊዮን ሰዎች በቡና ምርት ይተዳደራሉ ተብሎ ይታመናል።

ቅጽ 2 ቁጥር 74 መጋቢት 26 2012

Comments: 0

Your email address will not be published. Required fields are marked with *

This site is protected by wp-copyrightpro.com