ጠያቂ፣ ጥያቄና ተጠያቂ

0
682

ባሳለፍነው ማክሰኞ (ሚያዝያ 27/2014) በፋና ብሮድካስቲንግ ኮርፖሬት የቀረበ አንድ ቃለመጠይቅ የብዙዎችን ቀልብ ስቦ ነበር። ጠያቂው የፋና ጋዜጠኛ ዳዊት መስፍን፣ ተጠያቂው ደግሞ የባልደራስ ፓርቲው እስክንድር ነጋ ነበሩ። ሰፋ ደግሞ ቆይቶ ጠበብ፣ ከፈት ደግሞ መልሶ ዘጋ፣ ደግሞ ከፈት የሚል የሚመስለው መደበኛው የመገናኛ ብዙኀን የነጻነት አጥር፤ አልፎ አልፎ ከገዢው ፓርቲ ውጪ ያሉ ተፎካካሪ/ተቃዋሚ የሚባሉ የፖሊቲካ ፓርቲ ሰዎችን እንደ ፋና ባሉ ጣቢያዎች ሲጋብዝ፣ ብዙ ሰው በጉጉት መከታተሉ የተለመደ ነው።

በዛው መንፈስ ይመስላል ብዙዎች የባልደራሱን እስክንድር ቃለመጠይቅ ፋና ብሮድካስት ላይ ሲመለከት አድፍጦ የተከታተለው። ለዛም ምስክሩ ማኅበራዊ ሚድያው ላይ ከቃለመጠይቁ ፍጥነት እኩል ይሰነዘሩ የነበሩ አስተያየቶች ናቸው። ጥቂት የማይባሉ ሰዎች የጋዜጠኛው አጠያየቅ ላይ ጥያቄ ነበራቸው። ‹መጠየቅ ነው ማድረቅ ነው የያዘው!› ብለዋል። እንደውም በቃለመጠይቁ መካከል እንደ እግር ኳስ ጨዋታ በየመካከሉ ድምጽ እያሰሙ ‹ኧረ አስጨርሰው ቆይ!› እያሉ፣ ጠያቂው ለተጠያቂው ፋታ እንዲሰጥ የተናገሩም ነበሩ።

ጋዜጠኛው በበኩሉ በትዊተር ገጹ ‹የለም! እኔ ሥራዬን ነው የሠራሁት። አልተለመደም እንጂ ከዚህ የባሰም አለኮ።›› ይበል እንጂ እምብዛም የተቀበለው ያለ አይመስልም። በበጎ ሊወስዱት የፈለጉ ሰዎች ባይሆን፣ ‹እሱ እንደዛ አጥብቆ ባይዘው ኖሮ መች ተጠያቂው የተናገረውን ሁሉ ይናገር ነበር? ጠያቂ እነዛን ጥያቄዎች ባያነሳ ተጠያቂ መች ጥሩ መልስ ሊሰጥ ይችል ነበር?›› ብለው ሞግተዋል።

ጠያቂውን እንደ ተጠያቂው ሁሉ ያደነቁትም አሉ፤ ከዚህ ወዲያ ጠያቂነት፣ ከዚህ ወዲህ ጥያቄ ከወዴት ይመጣል ብለው ያጨበጨቡ። እንደውም ‹ሀርድ ቶክ› የሚባለው ዓይነት ቃለመጠይቅ እምብዛም ባልተለመደበት ሁኔታ፣ አንዳንዶች ጠያቂው ጥቂት ማስተካከያዎችን ቢያደርግ ቃለመጠይቁ የ‹ሀርድ ቶክ› መልክ ይኖረው ነበር ብለዋል።

ከዛ ውጪ ያሉት ደግሞ ከቃለመጠይቁና ከዝርዝሩ በላይ በጣቢያው ላይ ፖለቲከኛውን እስክንድር ነጋን በማየታቸው የተሰማቸውን ስሜት ማጋራቱ ቀንቷቸዋል። እነዚህ ‹‹ይህንንስ ማን አየበት!› ዓይነት አስተያየት ያላቸው ይመስላል። በድምሩ ግን የአብዛኛው ቅሬታ መሠረቱ ጠያቂ ለምን የገዢው ፓርቲ ሰዎችን በዛ መልክ አይጠይቅም ነበር የሚል ይመስላል። ‹‹ያኔ ጠቅላይ ሚኒስትሩን እንዲህ አፋጥጠህ አትጠይቅልንም ነበር!›› የመሰለ መልዕክትና ሐሳብ ጥቂት የማይባሉ ሰዎች ጋር ነበር።

የጠያቂ፣ የተጠያቂና የጥያቄ ዓላማ ግን መልሱንና ሐሳቡን አድማጭና ተመልካች ጋር ማድረስ ነው። አንዳንድ ጥያቄና ጠያቂ በተጠያቂው መልስ በኩል ሞገስን ያገኛሉ። አንዳንድ ተጠያቂም በጥያቄና በጠያቂ መጠን ይቀረጻል። በመጨረሻ ግን ዋናው ጉዳይ አንድና አንድ ብቻ ነው፤ መልሱ። በጥያቄውና በጠያቂው ላይ ሲሞግቱ ከከረሙ ሰሞነኞች ባሻገር መልሱ ላይ ሙግት ያነሱም ጥቂት አልነበሩም። ዋናው መልሱ ነዋ!


ቅጽ 4 ቁጥር 179 ሚያዝያ 1 2014

መልስ አስቀምጡ

Please enter your comment!
Please enter your name here