በቀጣዮቹ 10 ዓመታት 4 ነጥብ 4 ሚሊዮን መኖሪያ ቤቶች ለመገንባት ታቅዷል

0
802

መንግሥት በራሱ ከሚገነባቸው ቤቶች በተጨማሪ ሌሎች አጋር አካላትን በማሳተፍና ቴክኖሎጂዎችን በመጠቀም በቀጣዮቹ 10 ዓመታት 4 ነጥብ 4 ሚሊዮን ቤቶች እንዲገነቡ እንደሚሠራ የከተማና መሠረተ ልማት ሚኒስቴር ገለጸ።
ለኑሮ ምቹ ያልሆኑና ፈርሰው መሠራት ያለባቸውን አንድ ሚሊዮን ቤቶችን ሳይጨምር በአሁኑ ወቅት የኹለት ሚሊዮን ቤቶች እጥረት እንዳለም ተገልጿል።

አሁን ባለው ደረጃ በከተሞች ያለው የቤት አቅርቦት እና ፍላጎት መካከል ሰፊ ልዩነት አለ የተባለ ሲሆን፣ ለዚህም ከተሞች በፈጣን ዕድገት ውስጥ መገኘታቸው እና የሕዝብ ቁጥር ዕድገቱን እንደምክንያት አንስተው የቤት አቅርቦቱን በሚፈለገው ልክ ማስኬድ እንዳልተቻለ ተገልጿል።

በአሁኑ ወቅትም ወደ ኹለት ሚሊዮን የሚጠጋ የቤት እጥረት ከመኖሩም በተጨማሪ በከተሞች ያሉ አንድ ሚሊዮን ለመኖር ምቹ ያልሆኑ ቤቶች አሉ። በሚቀጥሉት 10 ዓመታት ውስጥም ወደ ሶስት ሚሊዮን አካባቢ ቤቶች ተጨማሪ ፍላጎት እንደሚኖር መገመቱን ተከትሎ በአጠቃላይ ስድስት ሚሊዮን አካባቢ ቤቶች በ10 ዓመት ውስጥ መገንባት ያስፈልጋል። ሆኖም የአገሪቱ አቅም ስድስት ሚሊዮን ቤቶችን ለመገንባት የማይፈቅድ በመሆኑ በመንግሥት ዕቅድ መሠረት በቀጣዮቹ 10 ዓመታት 4 ነጥብ 4 ሚሊዮን ቤቶች እንዲገነቡ ይሠራል ነው የተባለው።

የቤቶች ግንባታ የሚከናወነው በመንግሥት ብቻ ሳይሆን ሌሎች አጋር አካላትን ጭምር በማሳተፍ ነው ያሉት የቢሮ ኃላፊው፤ መንግሥት፣ ግለሰቦች፣ የቤት ማኅበራት፣ ሪል ስቴት አልሚዎች እና ሌሎችንም በማሳተፍ እና ቴክኖሎጂን በመጠቀም የመኖሪያ ቤት ችግርን ለመቅረፍ እንደሚሠራ ተናግረዋል። በተጨማሪም በመኖሪያ ቤት ዘርፍ ላይ መንግሥትና የግል ባለሀብቶች በጋራ የሚያለሙበት መንገድ የሚመቻች መሆኑን አመላክተዋል።

ለዚህ የመጀመሪያው እርምጃ የቤቶች ልማት ስትራቴጂን ማስተካከል አስፈላጊ እንደነበር የገለፁት አቶ ታደሰ፤ ስትራቴጂው ሁሉም አካላት እንዲሳተፉ የሚያስችል ሆኖ መቀረጹንና ለአስፈጻሚው አካል መቅረቡን ተናግረው እንደሚያጸድቅ እየተጠበቀ መሆኑን አስረድተዋል።

ሆኖም 4 ነጥብ 4 ሚሊዮን ቤት ግንባታን በተለመደው አሠራር ማሳካት ስለማይቻል አሁን በአዲስ አበባ ከተማ አስተዳደር የተጀመሩ የተገጣጣሚ ቤት ቴክኖሎጂዎች በክልል ከተሞችም ተስፋፍተው እንዲሠሩ ለማድረግ ክልሎች ከከተማ አስተዳደሩ ጋር የልምድ ልውውጥ ማድረጋቸው ተነግሯል።

ምንም እንኳን የመኖሪያ ቤት እጥረት በሃገሪቱ በሁሉም ከተሞች ላይ ያለ ቢሆንም እጥረቱ በተለይ በአዲስ አበባ እና ኢንዱስትሪዎች ተስፋፍተው በሚገኙባቸው እንደ ሀዋሳ፣ አዳማ፣ ባሕር ዳርና የመሳሰሉ ከተሞች ይብሳል ተብሏል።


ቅጽ 4 ቁጥር 182 ሚያዝያ 22 2014

መልስ አስቀምጡ

Please enter your comment!
Please enter your name here