አንድ አገር ከሌላው የምትቀስመው በርካታ በጎ ጎኖች እንዳሉ ይታመናል። በሌላ አገር የታዩ መጥፎ ተሞክሮዎችን ላለመድገምም ሆነ ከስህተታቸው ተምሮ ሕዝብን ከተመሳሳይ አቅጣጫ ለመመለስ የሌላን ልምድም ሆነ ተሞክሮ ማወቁ መልካም ነው። አብዛኞቻችን ለአገር ጥሩ ምሳሌ ይሆናሉ ብለን የምናስባቸው በአስተሳሰብም ሆነ በአቀማመጥና በተለያዩ መስፈርቶች ከእኛ ርቀው የሚገኙትን እንደሆነ መገመት አይከብድም። እዚሁ ቅርባችን ካሉ ባህሎችና አኗኗሮች ይልቅ ስለአሜሪካ ታሪክ ጭምር የበለጠ የምናውቅ ብዙ ነን። በመንግሥት ደረጃ ከሚደረግ የጉብኝት መርሓግብር በስተቀር በግለሰብ ደረጃ ያየውን በጎና ክፉ ነገር ለሕዝብ ለማቅረብ እምብዛም ሲሞከር አይታይም። ይህን ክፍተታችን ለመሸፈን በማሰብም የዚህ ጽሑፍ አዘጋጅ አዲሱ ደረሰ ኬንያ ሞንባሳ ተጉዘው ያስተዋሉትን እንዲህ አቅርበዋል።
እኔና የሥራ ባልደረቦቼ ወደ ሞምባሳ ያመራነው በፕሮጀክት ፕሮፖዛል አጻጻፍ እና የሀብት አደረጃጀት ላይ በ‹ኢነድፕዝ ሪሰርች ኢንስቲትዩት› የሚሰጥ ሥልጠና ላይ ለመሳተፍ ነበር። ሥልጠናው በፈረንጆቹ ከአፕሪል 11-15፤ 2022 ድረስ የሚሰጥ የነበረ በመሆኑ አንድ ቀን ቀደም ብለን በአፕሪል 10 በረራችንን አድርገን ከኹለት ሰዓታት በረራ በኋላ ሞምባሳ ደረስን።
ቀድመን ባዘጋጀነው መሠረት ሞምባሳ ዓለም ዐቀፍ አውሮፕላን ማረፊያ ስንደርስ የተዘጋጀልን ሰው ተቀበለን። ከዚያም በመጀመሪያ የተያዘልን ማረፊያ ጃምቦ ትራቭለርስ ሆቴል የሚገኘው ምትዋፓ በምትባል ከተማ የነበረ በመሆኑ፤ ከአውሮፕላን ማረፊያው ኹለት ሰዓታት የፈጀ የመኪና ላይ ጉዞ በኋላ ምትዋፓ ከተማ ደረስን።
ምትዋፓ በሞምባሳ ካውንቲ ውስጥ ከሚገኙ ከተሞች አንዷ ስትሆን ሰፊ ከተማ አይደለችም። ከተማዋ እጅግ ከፍተኛ ግርግር የበዛባት እና የእስልምና እምነት ተከታዮች በብዛት የሚስተዋሉባት ከተማ ናት። የምትዋፓ የሞተር ሳይከል ፍጥነት እና የሚፈጥረው የአስፓልት ላይ ትርምስ የአዲስ አበባን ትርምስ ያስንቃል።
የምትዋፓም ሆነ በአጠቃላይ የሞምባሳ የአየር ሁኔታ እጅግ ሞቃታማ ነው። በክፍል ውስጥ፤ ግፋ ቢል በሆቴሎች ውስጥ የአየር ማቀዝቀዣ ስለሚኖር፤ ወደ ውጭ መውጣት ያስፈራል። ቅጥል የሚያደርግ ወበቅ በርዎትን እንደከፈቱ ይገርፎታል። በአንድ በኩል የአየር ማቀዝቀዣ የሌላቸው በሚሊዮኖች የሚቆጠሩ ድሃ ዜጎች እንዴት ይሆን የሚኖሩት ያስብላል። ያው ላያስችል አይሰጥም በሚል የአገር ብሂል ይታለፋል።
ሞምባሳ ውስጥ የህንድ ውቂያኖስ ሲተነፍስ ይሰማል። ለቀኑ የአየር ሁኔታ ካሳ የሚሆን የአየር ሁኔታ ማታ ያገኛሉ። ንፋስ ሽው የሚልበት፤ እምብዛም የማይሞቅ፤ ንፋስ አለም ብሎ በቅዝቃዜ የማይጣላ አየር። ማታ እስካሻዎት ሰዓት ድረስ በረንዳዎ ላይ ብን ያለች ቲሸርት ለብሰው ካሻዎም እርቃንዎን ቢቀመጡ፤ ሳያስነጥሱ ሳያስሉ የሚገቡበት የአየር ሁኔታ- ሞምባሳ የቀኑን ማታ ትክሳለች።
ሞምባሳ ውስጥ ዶላር በድርድር ይሸጣል፤ በድርድር ይገዛል። በየመንደሩ የሚገዙ የሚሸጡም አሉ። በባንክ እና በጥቃቅን የገንዘብ ተቋማት ደረጃ ዶላር ይገዛል፤ ይሸጣል። አንድ ዶላር እስከ 112 የኬኒያ ሺሊንግ ድረስ ይሸጣል። አንድ የኬኒያ ሺሊንግ ግማሽ የኢትዮጵያ ብርን ያክላል። ትልቁ የሺሊንግ ኖት አንድ ሺሕ ነው። ዐስር ሺሊንግ እና ኻያ ሺሊንግን በሳንቲም ደረጃ ቢያገኙ እንደ ኢትዮጵያ አንድ ብር ነው ብለው እንዳይንቁት።
የሺሊንግ የመግዛት አቅሙ ሊያስደነግጥዎ ይችላል። ነገር ግን በቂ የኢኮኖሚ እንቅስቃሴ በመኖሩ የአገሬው ሰው ለአገልግሎትና ለቁሳቁስ የሚጠየቀውን ክፍያ መክፈል እንደሚችል ወዲያው ይረዳሉ። ለአንድ ምሳ እስከ 1000 ሺሊንግ፤ ለአንድ ፓስታ እስከ 400 ሺሊንግ፤ ለአንድ ባለ500 ሚሊ ቢራ 200 ሺሊንግ ሊከፍሉ ይችላሉ።
ነዳጅ ሞምባሳ ውስጥ የእጥረት ምልክት ባሳየበት ሳምንት ነበር የጎበኘኋት። አንድ ሊትር ነዳጅ በ131 ሺሊንግ ሲሸጥ ሞምባሳ ደርሼ በአንድ ሳምንት ወስጥ በምመለስበት ወቅት ወደ 142 ሺሊንግ አድጎ ተመልክቻለው። ምንም ያክል የዋጋው ጭማሪ እና እጥረቱ የሹፌሮች መነጋገሪያ የነበረ ቢሆንም፤ እንደኛ አገሩ አይነት ረጃጅም ሰልፎች ግን አላየሁም።
ምናልባት የረጃጅም ሰልፎችን አለመኖር ከመኪና እጥረት ጋር ካያያዙት ግን ከባድ ስህተት ሊሠሩ ይችላሉ። ሞምባሳ የመኪናም፤ የባጃጅም፤ የሞተር ሳይክልም እጥረት የለባትም። በሞምባሳ አይደለምና የ1990ዎቹ ይቅርና ከ2015 በፊት ያሉ የመኪና ሞዴሎችን ማየት እጅግ ሊከብድዎ ይችላል። የመኪናዎቹ ብራንዶችም እንዲሁ እኛ አገር የሚታዩትን ዓይነት አንዱንም ላያገኙ ይችላሉ። እኔና ባልደረቦቼ ከጉብኝታችን በአንዱ ቀን አንዲት ያሪስ መኪና ዐይተን እጅግ ተገርመን ውለናል።
መኪና መግዛትም በጣም የተወሳሰበ ሂደትን አይጠይቅም። 200 ሺሕ ሺሊንግ ካለዎት፤ የተቀረውን በብድር በቀናት ውስጥ አጠናቀው መውሰድ ይችላሉ። ፒተር ከተባለ እና ከአሠልጣኞቻችን አንዱ በነበረ ኬኒያዊ ጋር በነበረን ውይይት እንደተረዳነው ከሆነ ደግሞ የአንድ ሚሊዮን ሺሊንግ መኪና ቢገዙ- ይህ እጅግ በጣም ጥሩ ከሚባሉት መኪኖች ውስጥ አንዱን ሊያስገዛዎ ይችላል። ከ200 ሺሕ በላይ የቀረበዎትን ገንዘብ ከሞላ ጎደል በአንድ ዓመት ከፍለው መጨረስ የሚያስችልዎ የኢኮኖሚ እንቅስቃሴ አለ- በሞምባሳ።
ስለብድር ካነሳን ላይቀር፤ ለመኪና ብቻ ሳይሆን ለሌላ ችግርዎ የሚውል ብድር ማግኘት የተወሳሰበ አይደለም። በሞምባሳ ቆይታዬ አራት ባንኮችን አይቻለሁ። አንዱ ባንክ ጋር ቀርበው፤ ወይም አነስ ወዳሉት የፋይናንስ ተቋማት ቀርበው፤ ለመኪና አሊያም ለሌላ የሚሆን የብድር ጉዳዮትን በአፋጣኝ ማስጨረስ ይችላሉ።
ሳፋሪኮም እና የገንዘብ ማንቀሳቀሻ አገልግሎቱ ኤምፔሳ (MPesa) በሞምባሳ በቀላሉ ዕይታ ውስጥ ከሚገቡት አገልግሎቶች መካከል ናቸው። በአውሮፕላን ማረፊያው እንደደረስን፤ የሳፋሪኮም ሲምካርዳችንን ገዝተን ወዲያውኑ ከአገሬው ጋር መደዋወል ጀምረንም ነበር። ወደኢትዮጵያ ስንመለስ፤ በዳታ ሮሚንግ አማካኝነት እዛ የገዛነው ሲም ካርድ ሊሠራ እንደሚችል የሚያሳይ መልዕክት ደርሶን፤ በቅርቡ ከኬኒያውያን ጋር በቀላሉ የምንደዋወልበት ጊዜ እሩቅ እንደማይሆን ተስፋ አድርገናል። ኬኒያ ከሳፋሪኮም ውጪ ኹለት ተጨማሪ የቴሌኮም አገልግሎት መስጫ ተቋማት አሏት።
የኬኒያ ፕሬዝዳንት ኡሁሩ ኬኒያታና፤ የቤተሰቡ የመሬት ይዞታዎች ሌላ በቀላሉ ዐይን ውስጥ የሚገቡ ሊሆኑ ይችላሉ- በሞምባሳ። የሞምባሳ ሰዎች፤ በጣም ስለጉዳዩ ማውራት አይፈልጉም። እንደው ትንሽ ኮርኮር ካደረጓቸውም ከሚያወሩበት ድምጸት መረዳት እንደሚቻለው ግን እምብዛም በነዚያ ይዞታዎች ደስተኛ አለመሆናቸውን ነው።
የህንዶች፤ የአረቦች እና የእንግሊዝ ባለሀብቶችም በደንብ ከሚታዩ የሞምባሳ መልኮች መካከል መጠቀስ የሚችሉ ናቸው። ግን እምብዛም አይታዩም፤ ከስሞች፤ ከታፔላዎች ላይ ካሉ ፎቶግራፎች እና ሌሎች መረጃ ሰጪ ምልክቶች መረዳት የሚቻለው ከግዙፎቹ ኩባያዎች ጀርባ መኖራቸውን ነው።
ስለሞምባሳ ሰዎች ማኅበራዊ መሠረትም ጥቂት ማለት ይቻል ይሆናል። አንደኛው የሴቶች ነጻነት ነው። ሴቶች እጅግ በነጻነት የሚኖሩባት ከተማ ናት- ሞምባሳ። በዚህ ጉዳይ ላይ ብዙ ካስተዋልነው መካከል አንዱን እንጥቀስ። ኹለት እንስቶች የራሳቸውን የመጠጥ ኪዮስክ እያስተዳደሩ ሌሊቱን ሙሉ ይሠራሉ። የትኛውንም ዓይነት አለባበስ ቢለብሱ አንዳችም የሚተናኮላቸው የለም። ይህን አስገራሚ የሚያደርገው፤ ሞምባሳ ውስጥ አንዳችም ትጥቅም የሌለውም ሆነ የታጠቀ የጸጥታ አካል ማየት አይቻልም።
በሰባት ቀናት ቆይታ አንድ ትራፊክ እና አንድ እጅግ ግዙፍ የገበያ ማዕከልን የሚጠብቁ የታጠቁ ሰዎችን ዐይተናል። ሌላ የደንብ ልብስ ለባሽ የዜጎቹን የዕለት ተእለት ኑሮ የሚያግድ እረኛ አላየንም።
ሞምባሳ ውስጥ ሴት አስተናጋጅ አያገኙም- የሚስተናገዱበት ቦታ ባለቤቶች ካልሆኑ በስተቀር። አስተናጋጆች በሙሉ ወንዶች ናቸው። ወንዶች እጅግ በዝግታ እና ድምጻቸውን ዝቅ አድርገው የሚያወሩ፤ በምንም መልኩ ክፉ ነገር ከአፋቸው እንዳይወጣ የሚጠነቀቁ ከመሆናቸው የተነሳ ለኛ ኢትዮጵያውያን እነዚህ ሰዎች አጎብዳጆች ናቸው፤ አልያም የነጮች ታሪካዊ ጫና እስከ አሁንም አለባቸው እንድንል ሆኖ አግኝተነዋል።
ሞምባሳ የሚያስቀናው ከየት መጣህ አለመባል ነው። በምትዋፓ ያለንን ቆይታ ጨርሰን ቀጥሎ ኒያሊ ከተማ ተወስደን በአንዱ ከህንድ ውቂያኖስ በቅርብ ርቀት ላይ በሚገኝ ሆቴል ውስጥ ለኹለት ቀናት አርፈን ነበር። የውቂያኖሱ ዳርቻ ላይ ለመዝናናት ሃብታም፤ ድሃ፤ ነጭ ጥቁር አልያም ሌላ ቢሆኑ አንዳችም ዞር ብሎ የሚያይዎትና የሚጠይቆት፤ የሚፈትሽዎትም የለም።
እርግጥ ነው፤ ባለጠጋ ከሆኑ መግቢያዎትን በውዶቹ ሪዞርቶች በኩል ሊያደርጉ ይችላሉ፤ በዚያ ገብተው ግን ከጀርባ ሁሉም ወደሚዝናናበት ቦታ መውጣት ግዴታዎ ነው። ኢትዮጵያዊ ልሁን ኬኒያዊ፤ አንድም ሰው ሳይጠይቀኝ እና ሳይፈትሸኝ በነጻነት የሕንድ ውቂያኖስን እየተመለከትኩ በምዝናናበት ወቅት፤ ማኅበራዊ ሚዲያ ላይ አገር ቤት የአማራና የኦሮሚያ ብልጽግና ፓርቲዎች አንዱ አንዱን የሰደቡበትን መግለጫ አውጥተው ተመልክቻለው።
እስቲ ስለኬንያ ፖለቲካ ትንሽ ብለን እናብቃ። ኬኒያ ለምርጫ እየተዘጋጀች ነው። በዚህ ምክንያት ከአንደኛው ኬንያዊ አሠልጣኛችን ጋር ረዘም ያለ ውይይት አድርጌ ነበር። እውነት ነው፤ በግላጭ የጎጥ ፖለቲካን በሕግ የምትደግፍ አገር ኢትዮጵያ ብቻ ናት። ያ ማለት ግን ሌላው አገር ከበሽታው ንጹህ ነው ማለት አይደለም።
ኬኒያ እ.አ.አ በ2017 ያደረገችው ምርጫ በስተመጨረሻ አሸናፊነታቸው በጸደቀላቸው ኡሁሩ ኬንያታና፤ በራይላ ኦዲንጋ መካከል የአሸንፌአለው ግብግብ ከፈጠረ በኋላ በከፍተኛው ፍርድ ቤት ውድቅ መደረጉ ይታወሳል። ይደገም በተባለው ምርጫ ተቀናቃኙ ኦዲንጋ አልሳተፍም በማለታቸው ይህ ጎሳን መሰረት ያደረገ የሕዝቦች ልዩነት ከመከሰቱም በላይ ወደለየለት ቀውስ ሊያመራ ይችላል ተብሎም ተሰግቶ ነበር።
ኋላ ላይ ኦዲንጋ የተደገመውን ምርጫ ውጤት እንደሚቀበሉ አስታውቀው የኡሁሩ አሸናፊነት ጸድቆ ኡሁሩ ለኹለተኛ ጊዜ በፕሬዝዳንትነት ተመርጠው ኬንያን ለአምስት ዓመታት ሲመሩ ቆይተዋል።
ኡሁሩ አሁን ለሌላ ዙር መወዳደር ባይችሉም፤ የራይላ የዛን ጊዜው ውለታ ግን አለባቸው። ለዚያም ይመስላል፤ ኡሁሩ በቀጣዩ ምርጫ ራይላን ለመደገፍ ተዘጋጅተዋል የሚለው ወሬ ጥሩ ስሜትን የፈጠረ አይመስልም። ይህ ደግሞ የኡሁሩን ምክትል ፕሬዝዳንት ሆኖ የቆየውን ዊሊያም ሩቶን ካለማስደሰቱም በላይ ሩቶ የራሳቸውን ፓርቲ መሥርተው ፖለቲካዊ ግብግቡን ሊገጥሙ ተዘጋጅተዋል።
ከኪኩዩ ጎሳ የመጡት ፕሬዝዳንት ኡሁሩ ኬንያታና ከካሌንጂ ጎሳ የሚመደቡት ምክትላቸው፤ ወደዓለም ዐቀፍ የወንጀለኞ ፍርድ ቤት ሊያደርሳቸው ተቃርቦ የነበረውንና የምክትሉ ጎሳ በፕሬዝዳንቱ ጎሳ ላይ ፈጽሞታል የተባለ ጭፍጨፋ የፈጠረው ልዩነት አልበገራቸውም። እንደውም ተዐምራዊ የተባለለትን ጥምረት ፈጥረው ምርጫዎችን አሸንፈው እዚህ ቢደርሱም፤ ጥምረታቸው ከዚያ ሊሻገር የቻለ አይመስልም። በቤተሰባቸውና በሀብታቸው ምክንያት ትልቅ ተሰሚነት አላቸው ተብለው የሚገመቱት ኡሁሩ፤ ምክትላቸውን ሳይሆን ኦዲንጋን ለመደገፍ መቁረጣቸው፤ ተዐምራዊውን ጋብቻ ማፍረሱ ብቻ ሳይሆን ምናልባት የጎሳ መስመርን መሠረት ያደረገ ውጥረትን እንዳያስከትል እያሰጋም ይገኛል።
የፕሬዝዳንታዊው ምርጫ እንዳለ ሆኖ፤ የተለያዩ ካውንቲዎችን ለማስተዳደር ከሚወዳደሩት ግለሰቦች መካከል ቅልጥ ያለ ህንዳዊ ብታገኙ እንዳትገረሙ። ስለህንዳውያን በኬንያ ምርጫ መወዳደር ከኬንያውያን ይልቅ የተበሳጨነው ከኢትዮጵያ የሄድነው ነበርን። በአንድ የመዝናኛ ምሽት ላይ ከኬኒያውያን ጋር ተገናኝተን፤ ፍጹም መዝናናትን ዓላማው ያደረገ ምሽትን ወደ አመጽ ፖለቲካ ቀይረናል፤ እኛ ኢትዮጵያውያን። ኢትዮጵያዊው ቡድን ከትንሽ ሳቅና ጨዋታ በኋላ እንዴት ነው ህንዳዊ ለኬንያ ምርጫ የሚወዳደረው ብለን ቅልጥ ያለ ክርክር አንስተን ነበር።
ኬኒያውያኑ “ኧረ አሱ ችግር የለውም። ዋናው የእኛን ጥያቄ መመለሱ ነው!” እያሉ በዛ ከመጠን ባለፈ ትህትና ይሁን ለእኛ ፍራቻ በመሰለን ድምጸታቸው ሊያስረዱን ሞክረው ነበር። አንዱንም ሳንቀበል ለፍጹም መዝናናት፤ ሳቅና ጨዋታ የታቀደን ምሽት ቅልጥ ወዳለ የነጻ አውጪ ግብግብ ቀይረን ምሽቱን አገባደድን።
የዚህ ጽሑፍ አዘጋጅ አዲሱ ደረሰን በኢሜል አድራሻቸው [email protected] ማግኘት ይችላሉ።
ቅጽ 4 ቁጥር 182 ሚያዝያ 22 2014



