በስድስት ወራት ውስጥ ከ100 ሺሕ በላይ ሕገ ወጥ የጦር መሣሪያዎች በቁጥጥር ሥር ዋሉ

0
992

ሕገ ወጥ የጦር መሣሪያ ዝውውርን ለመቆጣጠር በተሠራው ሥራ በ2011 በግማሽ ዓመት 103 ሺሕ 311 የተለያዩ ጥይቶች፣ 1 ሺሕ 560 ሽጉጦች፣ 5 መትረየስ (ብሬይን) መሣሪያ፣ 5 ክላሽንኮቭ ጠብመንጃ በሕገ ወጥ የጦር መሣሪያ አዘዋዋሪዎች ቤት ሲበረበር መያዙን የፌደራል ወንጀል ምርመራ ቢሮ ለአዲስ ማለዳ አስታውቋል። ይህ የጦር መሳሪያ ዝውውር በ2010 ሙሉ ዓመት ከነበረው ተቀራራቢ መሆኑን ያገኘነው መረጃ ያመለክታል።

ከተለያዩ አቅጣጫዎች ድንበር አቋርጠው ወደ አገሪቱ የሚገቡ ሕገ ወጥ መሣሪያዎች የመያዛቸው መረጃ መሰራጨት ከጀመረ ውሎ አድሯል። ለአብነትም ነዳጅ ጭኖ ከሱዳን ወደ ኢትዮጵያ ይጓዝ የነበረ መኪና በምዕራብ ጎንደር ዞን ገንደ ውሃ አካባቢ ተገልብጦ፤ ፖሊሶች ባደረጉት ፍተሻ ወደ 1 ሺሕ 291 የቱርክ ሽጉጥ እንዲሁም 97 ክላሽ በቁጥጥር ስር የመዋሉ ዜና የተሰማው ከጥቂት ወራት በፊት ታኅሣሥ ላይ ነበር። ባለፉት ጥቂት ወራት ባልተለመደ መልኩ መዲናዋ አዲስ አበባን ጨምሮ በተለያዩ ክልሎች ሕገ ወጥ የመሣሪያ ዝውውር መበራከቱ እየተሰማ ነው።

ኅዳር 10/ 2011 ፌደራል ፖሊስ እንዳስታወቀው በያዝነው በጀት ዓመት የመጀመሪያ ሦስት ወራት 2 ሺሕ 516 የተለያዩ የጦር መሣሪያዎች በሕገ ወጥ መንገድ ሲዘዋወሩ መያዛቸውን አስታውቋል። ይህም የመሣሪያ ዝውውሩ በኹለተኛው ሩብ ዓመት ከሦስት እጥፍ በላይ ዕድገት ማሳየቱ ነው።

ከፌደራል ወንጀል ምርመራ ቢሮ ባገኘነው መረጃ መሰረት የሕገ ወጥ መሣሪያ ዝውውሩ ለንጹሐን ዜጎች ሕይወት መጥፋት፣ በየአካባቢው ለሚከሰቱ የማኅበረሰብ ግጭቶች ማባባሻ፣ በተለያዩ ቦታዎች ለሚፈጸሙ ዘረፋዎች፣ ስርቆቶች፣ ለሕገ ወጥ ንግድ ኮንትሮባንድ ማስፈጸሚያ እየሆነ ይገኛል።

በመሆኑም በአሁኑ ወቅት ከሱዳን በመተማ በኩል፤ ከደቡብ ሱዳን በጋምቤላ በኩል ወደ አገር ውስጥ በተለያየ መልኩ እንዲገባ እየተደረገ መሆኑን የፌደራል ወንጀል ምርመራ ቢሮ ያስታወቀ ሲሆን በተለይ በአሁኑ ወቅት በመኪና ተደብቆ እየገባ ያለው የጦር መሣሪያ እጅግ ትኩረት ሊሰጠው እንደሚገባ ለአዲስ ማለዳ አስታውቀዋል።

ቤኒሻንጉል ጉሙዝ በሕገ ወጥ መሣሪያ ዝውውር ሥማቸው ከሚነሱ ክልሎች ሌላው ነው። ክልሉ ከደቡብ ሱዳን ጋር አዋሳኝ ከተማ በሆነችው ናኮሞ በተባለች ወረዳ ሕገ ወጥ መሣሪያዎች እንደሚገቡ የክልሉ ምክትል ፕሬዚዳንት አቶ አበራ ባየታ ከወር በፊት ለሚዲያዎች በሰጡት መግለጫ መናገራቸው ይታወሳል።

ቡዋ አልመሀል በተባለ ኬላ አልፎ አልፎም ከመሀል አገር መሣሪያ እንደሚገባ ተናግረው፤ ሕገ ወጥ መሣሪያዎችን በግንባር ቀደምነት “በፍተሻ እንይዛለን” ብለዋል። በዘላቂነት የሕገ ወጥ መሣሪያ ዝውውርን ለመግታት ደግሞ በክልሉና በፌደራል መንግሥት ጥምረት የተዋቀረ ግብረ ኃይል ማቋቋማቸውን ጠቁመዋል።

የካቲት 8/2011 በቅርቡ እየተስፋፋ ለመጣው የሕገ ወጥ የጦር መሣሪያ ዝውውር ተጠያቂው ማነው? ተብለው የተጠየቁት የፌደራል ፖሊስ ኮሚሽን ኮሚሽነር ጀነራል እንደሻው ጣሰው፤ “የሕገ-ወጥ የጦር መሣሪያ ዝውውሩ የሚከናወነው ለውጡን በማይደግፉ አካላት ነው” ሲሉ ለቢቢሲ ተናግረዋል።

በየዕለቱ ከሚወጡት ዘገባዎች አንጻር ከአራቱም የአገሪቱ አቅጣጫዎች ሕገ ወጥ የጦር መሣሪያ እንቅስቃሴ እንዳለ አመልካቾች ናቸው። በፀጥታ ኃይሎች የተያዙት የጦር መሣሪያዎች መጠን ከፍተኛ ቢሆንም፤ ሳይያዙ ወደ ተለያዩ ሰዎች እጅ የገቡት ቁጥር ምን ሊያስከትሉ እንደሚችሉ አለመታወቁ በርካቶችን ሥጋት ላይ ጥሏል።

ቅጽ 1 ቁጥር 22 የመጋቢት 28 ቀን 2011

መልስ አስቀምጡ

Please enter your comment!
Please enter your name here