የኮንስትራክሽን ኩባኒያው በ51 ሚሊዮን ብር የግብር ስወራ ተከሰሰ

0
868

ፓወር ኮን የግንባታ ተቋራጭ ድርጀት ለመንግሥት መክፈል የነበረበትን 51 ሚሊዮን ብር ግብር ሰውሯል በሚል በፌደራሉ የመጀመሪያ ደረጃ ፍርድ ቤት ልደታ ምድብ ንግድ ችሎት ክስ ተመሰረተበት።

በድርጅቱ ግብይት ላይ ከ2006 ጀምሮ በተሠራ የምርመራ ኦዲት 25 የሚሆኑ ሐሰተኛ ደረሰኞችን ተጠቅሟል በሚል በግብር ስወራ ክስ ዐቃቤ ሕግክሱን መስርቷል። በሁሉም የግብር ዓይነቶች መንግሥት ማግኘት የነበረበትን ገቢ ሰውሯል በሚል በድርጅቱ ላይ በሰኔ ወር መጨረሻ ክስ መመስረቱንም ለማወቅ ተችሏል።

የኮንስትራክሽን ዘርፉን ጨምሮ በተለያዩ ዘርፎች ላይ እየታየ ያለው የሐሰተኛ ደረሰኝ አጠቃቀም እየጨመረ መምጣቱን የገቢዎች ሚኒስቴር መግለጹ ይታወቃል። በሚኒስቴሩ ፈቃድ የወጡ የሺያጭ መመዝገቢያ ማሽኖችን ለሕገወጥ ዓላማ በመጠቀም ሐሰተኛ ሰነዶችን በማተም የሚደረጉ ግብይቶች እየተንሰራፉ የመጡ መምጣታቸውን እና ደረሰኞቹን ወደ ገበያ የሚያስገቡ ግለሰቦች ላይ እርምጃ መውሰድ መጀመሩን ሚኒስቴሯ አዳነች አቤቤ መግለፃቸው ይታወሳል። የተለያዩ ድርጅቶች ወጪያቸውን ለማናር እና የሚከፍሉት ግብር ላይ ቅናሽ ከማግኘት ባለፈ ባልከፈሉት ግብር ላይ በእነዚህ ሐሰተኛ ደረሰኞች አማካኝነት ከመንግሥት ካዝና ተመላሽ ገንዘብ የሚጠይቁ ድርጅቶች መኖራቸውን አስታውቀው ነበር።

የኮንስተራክሽን ድርጅቶች በበኩላቸው የግብዓት በሚቀርቡላቸው ወቅት የሚያቀርቡት ግለሰቦች ሐሰተኛ ደረሰኞችን እንደሚያቀርቡላቸው እና ከመመሳሰላቸው የተነሳ እንደሚቸገሩ ይገልፃሉ። ከግንባታ ሥራው ባሕሪ ጋር በተያየዘም የተለያዩ ግብዓቶች ወደ ግንባታ ቦታቸው በሚቀርቡ ጊዜ ደረሰኞችም እንደሚመጡ እና ይህም ለችግር እንዳጋለጣቸው ሲናገሩ ይደመጣሉ።

በተለይም የሺያጭ መመዝገቢያ መሣሪዎች ከመሰወራቸው ጋር ተያይዞ በሕጋዊ መልኩ በወጡ መሣሪዎች ሐሰተኛ ግብይቶች መፈፀማቸው ራስ ምታት እንደሆኑበት ሚኒስቴሩ ሲገልፅ ቆይቷል። በተጨማሪም ማንኛውም ግብይት ድርጅቱ በተመዘገበበት አድራሻ መደረግ እንዳለበት እና የጠፉ እንዲሁም ሕገወጥ ድርጊት እየተፈፀመባቸው ያሉ ማሽኖችን ዝርዝር በማውጣት በማስጠንቀቅ ላይ እንደሚገኝ ይታወቃል።

ቅጽ 1 ቁጥር 39 ሐምሌ 27 2011

መልስ አስቀምጡ

Please enter your comment!
Please enter your name here