በአማራ ክልል የተፈጠረውን ችግር በዘላቂነት ለመፍታት የሰላም አማራጭ ቅድሚያ እንዲሰጠው ተጠየቀ

0
328

ቅዳሜ ሐምሌ 29 ቀን 2015 (አዲስ ማለዳ) የኢትዮጵያ ሰብአዊ መብቶች ኮሚሽን (ኢሰመኮ) በአማራ ክልል ከሚያዝያ ወር 2015 ጀምሮ እየተባባሰ የመጣውን የትጥቅ ግጭት እና የጸጥታ ችግር በዘላቂነት ለመፍታት የሰላም አማራጭ ቅድሚያ እንዲሰጠው ጠይቋል።

የክልሉ የጸጥታ ሁኔታ ከመሻሻል ይልቅ በተለይ ከተያዘው ሐምሌ ወር አጋማሽ ጀምሮ እየተባባሰ በመምጣቱ ብዙ የክልሉ አካባቢዎች በግጭት ውስጥ መሆናቸውን የጠቀሰው ኮሚሽኑ፤ በአንዳንድ አካባቢዎች ሲቪል ሰዎች ላይ ጥቃት መፈጸሙን እና ሲቪል ሰዎችና ንብረት ላይ ጉዳት መድረሱን ትናንት ባወጣው መግለጫ ጠቅሷል።

እንዲሁም የትራንስፖርት እና ሌሎች ማኅበራዊ አገልግሎቶች መቋረጣቸውን፣ በቅርቡም የኢንተርኔት አገልግሎት በብዙ የክልሉ አካባቢዎች መቋረጡን እንዲሁም ነዋሪዎች በነጻነት ለመንቀሳቀስና ሥራቸውን ለመከወን መቸገራቸውን ነው የገለጸው።

ግጭቱ ከሌሎች የአገሪቱ አካባቢዎች በግጭትና በተለያዩ ምክንያቶች የተፈናቀሉ፣ እንዲሁም ከጎረቤት አገራት ግጭት በመሸሽ የተሰደዱ በክልሉ የሚገኙ በብዙ ሺሕ የሚቆጠሩ ሰዎችንም ለከፍተኛ ችግር የሚዳርግ ነው ብሏል።

ስለሆነም ኹሉም ወገኖች ችግሩን በዘላቂነት ለመፍታት ለሰላም አማራጮች ቅድሚያ እንዲሰጡ፣ ግጭቱን ከሚያባብሱ ድርጊቶች እንዲቆጠቡ እንዲሁም የክልሉን ሰላም ለማረጋገጥ በመንግሥት የሚወሰዱ እርምጃዎች በማናቸውም ሁኔታ ነዋሪዎችን ለበለጠ ጉዳት እና ለሰብአዊ መብቶች ጥሰት እንዳይዳርጉ ተገቢው ጥንቃቄ እንዲደረግ አሳስቧል።

ኮሚሽኑ የሚኒስትሮች ምክር ቤት በትናንትናው ዕለት ያወጀው የአስቸኳይ ጊዜ አዋጅ፣ በሕገ መንግሥቱና ኢትዮጵያ ተቀብላ ባጸደቀቻቸው ዓለም አቀፍ ስምምነቶች ዕውቅና ያገኙ ሰብአዊ መብቶችንና የአስቸኳይ ጊዜ አዋጅ መርሖችን ባከበረ መልኩ እንዲተገበርም አደራ ብሏል።

መልስ አስቀምጡ

Please enter your comment!
Please enter your name here