ለሽንኩርት ዋጋ መናር ምክንያት የሆኑት ሕገ ወጥ ነጋዴዎች መሆናቸው ተጠቆመ

0
689

የሽንኩርት ዋጋ መናር ምክንያት ላይ ጥናት በማድረግ ምክንያት ሆነው በተገኙ ሕገ ወጥ ነጋዴዎች ላይ እርምጃ እየወሰደ መሆኑን ንግድ ሚኒስቴር አስታወቀ።
የንግድ ሚኒስትር ዴኤታ እሸቴ አስፋው በሚኒስቴሩ የሚመራው የገበያ ማረጋጋት ብሔራዊ ግብረ ኃይል የሽንኩርት ዋጋ ጭማሪውን አስመልክቶ ጥናት መካሄዱን ተናግረዋል።
በጥናቱ መሰረት ለሽንኩርት ዋጋ ጭማሪው የምርት እጥረት መኖሩ አንድ ምክንያት ቢሆንም ችግሩ በዋናነት የተፈጠረው ግን በሕገ-ወጥ ነጋዴዎች ጣልቃ ገብነት መሆኑ ተረጋግጧል።
በመሆኑም ሽንኩርትና ቲማቲም የመሳሰሉ አትክልቶች የአገር ውስጥ ፍላጎትን ሳያሟሉ ወደ ውጭ እንዳይወጡ ለሁሉም የጉምሩክ ጣቢያዎች ደብዳቤ በመፃፍ ክትትል እየተደረገ ነው ብለዋል።
እስካሁን በተደረገው ክትትልም ምርቶቹ በሱማሌ ክልልና በድሬዳዋ በማቆራረጥ ወደ ጂቡቲ፣ ሱማሊያና ኬንያ እየተላኩ መሆኑ ተደርሶበታል።
ሕገወጥ ነጋዴዎች 11 መኪና ሽንኩርት ወደ ጅቡቲ ሲያስወጡ በቁጥጥር ስር መዋላቸውንም አቶ እሸቴ ተናግረዋል።በተጨማሪም አዳማ ላይ ቲማቲም፣ ሽንኩርትና መሰል ምርቶችን በሕገ ወጥ መንገድ ሲያዘዋውሩ የተያዙ ስለመኖራቸውም ጠቅሰዋል።
ከአሁን ቀደም በሱዳን በኩል ወደ ኢትዮጵያ የሚገባው የሽንኩርት ምርት ከኮሮና መከሰት ጋር ተያይዞ መቅረቱ የራሱ ተፅዕኖ እንደነበረውም አክለዋል።ሚኒስትር ዴኤታው በሱዳን በኩል የነበረው የሽንኩርት አቅርቦት የሚቀጥልበት ሁኔታ እየተመቻቸ መሆኑንም ተናግረዋል።
ችግሩን በዘላቂነት ለመፍታት አቅርቦትና ምርት ላይ የሚሰራው እንዳለ ሆኖ የኅብረተሰቡም ትብብር በመኖሩ ሕገ ወጥ ደላሎችና ነጋዴዎችን ወደ ሕግ የማቅረቡ ሥራ ተጠናክሮ እንደሚቀጥል ተጠቁሟል።

ቅጽ 2 ቁጥር 85 ሠኔ 13 2012

መልስ አስቀምጡ

Please enter your comment!
Please enter your name here