የኦሮሞ ነጻነት ግንባር የምርጫ ቦርድን የውሳኔ ሐሳብ ውድቅ አደረገ

0
964

የኦሮሞ ነጻነት ግንባር(ኦነግ) የእነ ዳውድ ኢብሳ ቡድን የኢትዮጵያ ምርጫ ቦርድ በፓርቲው አመራር አባላት አቤቱታ ላይ ለመወሰን ያቀረበውን የውሳኔ ሐሳብ ውድቅ ማድረጉን አስታወቀ።

የኢትዮጵያ ብሔራዊ ምርጫ ቦርድ ከኦሮሞ ነጻነት ግንባር( ኦነግ) አመራር አባላት የቀረበለትን አቤቱታ አስመልክቶ መስከረም 29/2013 የውሳኔ ሐሳብ ማቅረቡ የሚታወስ ነው። ቦርዱ የሰጠው ውሳኔ ከኦሮሞ ነጻነት ግንባር (ኦነግ) አመራር አባላት የአመራር ለውጥ እና እገዳን አስመልክቶ የተለያዩ አቤቱታዎች ሲደርሱት እንደነበር ገልጾ ነበር።

ውሣኔው በእነ ዳውድ ኢብሣ የሚመረጥ/የምትመረጥ አንድ፣ በእነ አራርሶ ቢቂላ የሚመረጥ/የምትመረጥ ሌላ አንድ፣ እንዲሁም እነዚህን ኹለት ባለጉዳዮች የሚመርጡትን ባለሙያዎች በሰብሳቢነት የሚመራ/የምትመራ ሌላ አንድ ባለሙያ ቦርዱ መርጦ በመመደብ የባለሙያዎች ጊዜያዊ ጉባኤ እንዲቋቋም ነበር።
በውሳኔው መሰረት በኹለቱ አካላት እና በቦርዱ የተመረጡ ባለሙያዎች ጉዳዩን አጣርተው በሚያቀርቡት የውሳኔ ሐሳብ ላይ ተመስርቶ ብሔራዊ ምርጫ ቦርድ የመጨረሻ ውሳኔ የሚሰጥ መሆኑን ቦርዱ የገለጸ ቢሆንም የእነ ዳውድ ኢብሳ ቡድን የቦርዱን ውሳኔ አለመቀበሉን የኦነግ ህዝብ ግንኙነት ኃላፊ ባቴ ኦርጌሳ ለአዲስ ማለዳ አስታውቀዋል።

የእነ ዳውድ ኢብሳ ቡድን የውሳኔ ሐሳቡን አለመቀበሉን ተከትሎ ለቦርዱ በጽሑፍ ደብዳቤ ማሳወቁን በሳለፍነው ሐሙስ ኅዳር 17/2013 ከግንባሩ አመራሮች ጋር ለየብቻ ባደረገው ውይይት ቀድሞ ያቀረበውን የውሳኔ ሐሳብ በመሻር በራሱ አሰራር እንደሚያጣራ መግለጹን ኃላፊው ለአዲስ ማለዳ ጠቁመዋል።

የእነ ቀጀላ መርዳሳ ቡድን በበኩሉ ባሳለፍነው ሐሙስ ቦርዱ እንዳነጋገራቸው የኦነግ ቃል አቀባይ ቶሌራ አዳባ ለአዲስ ማለዳ ተናግረዋል። ቶሌራ እንደገለጹት ቦርዱ ባሳለፍነው ሐሙስ ኹለቱንም ቡድን ጠርቶ ያነጋገረው የእነ ዳውድ ኢብሳ ቡድን ቀድሞ የቀረበውን የምርጫ ቦርድ ውሳኔ ባለመቀበላቸው መሆኑን ጠቁመዋል።
ቦርዱ ሐሳባቸውን እንዲያስረዱ ባቀረበው ጥያቄ መሰረት ማስረዳታቸውን ያመኑት ኹለቱም ቡድኖች ባነሱት ሐሳብ ላይ መርምሮ ውሳኔ እንደሚሳልፍ እንደተገለጸላቸው ተናግረዋል።

እንደ ባቴ ገለጻ የእነ ዳውድ ኢብሳ ቡድን የቦርዱን ውሳኔ ውድቅ ያደረገው በሦስት ዋና ዋና ምክንያቶች መሆኑን ለአዲስ ማለዳ አስረድተዋል። አንደኛው ቦርዱ በፓርቲው አባላት መካከል ተፈጥሯል ብሎ ያቀረበው የሐሳብ መከፋፈል ሀሰት መሆኑ ሲሆን፣ በፓርቲው አባል መካከል በፍጹም የተፈጠረ የሐሳብ ልዩነት እንደሌለ የጠቆሙት ኃላፊው ልዩነቱ የተፈጠረው በአመራሮች መካከል ብቻ ነው ብለዋል።

ኹለተኛው ምርጫ ቦርድ በውሳኔው ላይ “በፖለቲካ ፓርቲ አባላት መሀከል አለመግባባት ሲከሰት እና ለቦርዱ አቤቱታ ሲቀርብለት በአዋጅ ቁጥር 1162/11 አንቀፅ 74 ንዑስ አንቀፅ ሥድስት መሠረት ጉዳዩን ተመልክቶ የውሣኔ ሐሣብ የሚያቀርብ የባለሙያዎች ጉባኤ የማቋቋም ሥልጣን አለው።” በማለት በኹለቱ ቡድኖች መካከል የተፈጠረውን ልዩነት ለመወሰን የቀረበውን የውሳኔ ሐሳብ በመቃወም መሆኑን ባቴ አስረድተዋል።

የህዝብ ግንኙነት ኃላፊው እንደሚሉት ምርጫ ቦርድ ያቀረበውን ውሳኔ ሐሳብ አሳማኝ ያልሆነ እና የሕግ አሰራሩን የጣሰ በመሆኑ ነው ሲሉ ገልጸውታል።
ሦስተኛው ውሳኔውን ወድቅ የደረጉበት ምክንያት የእነ ዳውድ ኢብሳ ቡድን ለቦርዱ ያቀረበው የአቤቱታ ሐሳብ ስለሌለ ነው ብለዋል።

ይሁን እንጅ ምርጫ ቦርድ የውሳኔ ሐሳብ በሰጠበት ጊዜ በኹለቱም ቡድን የቀረበለትን አቤቱታ ጠቅሷል። ቦርዱ የቀረበለት አቤቱታ ሲገልጽ በእነ አራርሳ ቢቂላ ነሐሴ አንድ 2012 በቁጥር 06/ABO/12 እና 7/08/12 05/03/19 በቁጥር 08/ABO/12 በተፃፉ ኹለት ደብዳቤዎች የፓርቲው የሥራ አስፈፃሚ ኮሚቴ በፓርቲው ሊቀመንበር በዳውድ ኢብሳ ላይ የእግድ ውሣኔ አስተላልፏል ሲሉ ለቦርዱ በማሳወቅ ቦርዱ ውሳኔውን እንዲያጸድቅላቸው መጠየቃቸውን ጠቅሶ ነበር።

በሌላ በኩል በዳውድ ኢብሣ በቁጥር 0211/xly/abo/2020 በተፃፈ ደብዳቤ የሥራ አስፈፃሚ ኮሚቴ አባላት በሆኑት አራርሶ ቢቂላ፣ ቶሌራ ተሾመ፣ አቶምሣ ኩምሣ እና የብሔራዊ ምክር ቤት አባላት የሆኑት ቀጄላ መርዳሳ እና አርብቾ ዲማ እስሚቀጥለው ጠቅላላ ጉባኤ ድረስ ከኃላፊነታቸው ታግደው እንዲቆዩ ስለተወሰነ ይሄው ውሳኔ በቦርዱ እውቅና እንዲሰጠው መጠየቃቸውን መግለጹ የሚታወስ ነው።

ቅጽ 2 ቁጥር 108 ኅዳር 19 2013

መልስ አስቀምጡ

Please enter your comment!
Please enter your name here