በኢትዮጵያ የጽኑ ሕሙማን ቁጥር እየጨመረ ነው

0
645

በኢትዮጵያ በአሁኑ ሰዓት የጽኑ ሕክምና አገልገሎት የሚፈልጉ ሕሙማን ቁጥር በከፍተኛ መጠን እየጨመረ መሆኑን የጤና ሚኒስቴር አስታውቋል።
የጤና ሚኒስተር ዶክተር ሊያ ታደሰ በተለይም በአዲስ አበባ ከተማ የኮቪድ 19 ወረርሽን ጽኑ ሕሙማን ከጤና ተቋማት የመቀበል አቅም በላይ እየሆነ መምጣቱንም ተናግረዋል።

በየቀኑ በኮሮና ቫይረስ ተይዘው ለሕክምና ክትትል ወደ ሕክምና ማዕከል ከሚገቡት ታማሚዎች ውስጥ በአማካይ 305 የሚሆኑት ጽኑ ሕሙማን ሕክምና ክፍል ውስጥ የሚገኙ ሲሆን፥ ከነዚህ ውስጥም ከ40 እስከ 45 የሚሆኑት ሰው ሠራሽ የመተንፈሻ መሣሪያ የሚጠቀሙ ናቸው ብለዋል።
እስካሁን ባለው ሁኔታ የጽኑ ሕክምና ክፍል ከገቡት ውስጥ 59 በመቶ ያህሉ ሕይውታቸው እንዳለፈም ታህሳስ 01/2013 በስካይ ላይት ሆቴል በተሰጠው ጋዜጣዊ መግለጫ ላይ ተብራርቷል።

በሕብረተሰቡ ውስጥ እየተስተዋለ ያለው ከፍተኛ ቸልተኝነትና መዘናጋት እንዲሁም በሽታው ጠፍቷል ወይም በሽታው በእኔና በቤተሰቤ ብሎም በማኅበረሰቤ ላይ ከፍተኛ ጉዳት ሊያስከትል ይችላል ብሎ ካለመረዳትና እና እያንዳንዱ ባለድርሻ አካል የሚጠበቅበትና ሚና አለመወጣቱ አሁን ላይ ለሚስተዋለው ችግር እንደ ዋነኛ ምክንያት የሚጠቀሱ ስለመሆናቸውም ተገልጻል።

ይህ ሁኔታም በዚህ ከቀጠለ በአጭር ጊዜ ውስጥ እንደ አገር ካለው ውስን የጽኑ ሕሙማን እንክብካቤ አቅም በላይ ሊሆን እንደሚችልም ዶክተር ሊያ ስጋታቸውን አስታውቀዋል።

የኮቪድ-19 ወረርሽኝ እያደረሰ ያለው እና ሊያስከትል የሚችለውን አሉታዊ ተጽዕኖዎችን የመከላከል ሥራ ለአፍታም ቢሆን ጊዜ የማይሰጠው እና ለተወሰኑ ተቋማት የማይተው በመሆኑ እንያንዳንዱ ሰው በእያንዳንዷ ደቂቃ የምናከናውነው ቅድመ ጥንቃቄ በከፍተኛ የኃላፊነት መንፈስ እና አራዓያነት ሊሆን እንደሚገባ ዶክተር ሊያ ታደሰ መልዕክታቸውን አስተላልፈዋል።

በኢትዮጵያ የኮቪድ-19 የላብራቶሪ ምርመራ አቅም በየጊዜው በማሳደግ ላይ እንደሆነ የተገለጸ ሲሆን እስከአሁን ለ1 ሚሊየን 683 ሺሕ 558 ሰዎች የኮቪድ-19 የላብራቶሪ ምርመራ ተደርጎላቸዋል።

ከእነዚህም ውስጥ 114 ሺሕ 834 ማለትም አጠቃላይ ከተመረመሩት ስድስት ነጥብ ስምንት በመቶ ሰዎች የኮሮና ቫይረስ እንደተገኘባቸው ተረጋግጧል።
ከነዚህ ውስጥም የ1 ሺሕ 769 ማለትም ቫይረሱ በምርመራ እንደተገኘባቸው ከተረጋገጠ ሰዎች አንድ ነጥብ አምስት በመቶው በበሽታው ሕይወታቸው ማለፉን የጤና ሚኒስቴር መረጃ ያመለክታል።

ቅጽ 2 ቁጥር 110 ታህሳስ 3 2013

መልስ አስቀምጡ

Please enter your comment!
Please enter your name here