የጂግጂጋ ቅርንጫፍ ጽሕፈት ቤት የሥራ ኃላፊዎች በሙስና ክስ ተመሰረተባቸው

Views: 279

 ከወር በፊት በከባድ የሙስና ወንጀል ተጠርጥረው በቁጥጥር ስር በዋሉት በጉምሩክ ኮሚሽን የጂግጂጋ ቅርንጫፍ ጽሕፈት ቤት የሥራ ኃላፊዎች ላይ የፌዴራል ዐቃቤ ሕግ ክስ መሰረተ።

የኢፌዴሪ ገቢዎች ሚኒስቴር በጉምሩክ ኮሚሽን የጂግጂጋ ቅርንጫፍ ጽሕፈት ቤት የሕግ ማሰከበር ኃላፊ አህመድ መሐመድ እና ምክትል ኃላፊያቸው አብዱልዋህድ አብዱላህ ከህገ ወጥ የኮንትሮባንድ ዝውውር ጋር በተያያዘ በከባድ የሙስና ወንጀል ተጠርጥረው የነበረ ሲሆን ዛሬ ጥቅምት 5/2012 ተከሳሾቹ በፌዴራል ከፍተኛ ፍርድ ቤት ልደታ ምድብ 18ኛ ወንጀል ችሎት ቀርበው የዐቃቤ ሕግ ክስ ዝርዘር ተነቦላቸዋል።

1ኛ ተከሳሽ አህመድ መሐመድ እና 2ኛ ተከሳሽ አብዱልዋህድ አብዱላህ በጉምሩክ ኮሚሽን የጂግጂጋ ቅርንጫፍ ጽሕፈት ቤት የሕግ ማሰከበር ኃላፊ እና ምክትል ኃላፊያቸው ሆነው ሲሰሩ በነበረበት ወቅት የኮንትሮባንድን በሕጋዊ መንገድ ወደ ተግባር ለማስገባት በመሞከር የንግድ እንቅስቃሴን በሚጎዳ፣ በህዝብና በመንግስት ላይ የሚደርሰውን ጉዳት እያወቁ የግል ጥቅምን ለማግኘት ሲባል ሚያዚያ 8/2010 በሱማሌ ክልል አሩዋ ወረዳ ከባድ ሙስና ወንጀል በመፈጸም ተይዘው ፍርድ ቤት መቅረባቸውን የክስ መዝገቡ ያስረዳል።

ተከሳሾች አህመድ ጣህር ከሚባል ግለሰብ ጋር በመመሳጠር አጠቃላይ ከ1 ሚሊዮን ብር በላይ የሚገመት እና 2000 ሺሕ ካርቶን ህገ ወጥ ሲጋራ በኹለት ዩዲ መኪና ወደ አገር ውስጥ ሲጋባ ሕጋዊና ተገቢ ርምጃ መውሰድ ሲገባቸው የተሰጣቸውን ሥልጣንና ኃላፊነት ወደ ጎን በመተው ሕገ ወጥ የኮንትሮባንድ ንግድ እንዲስፋፋ በማድረግ ተጠርጥረዋል።

በክሱ መሰረት 1ኛ ተከሳሽ አህመድ መሐመድ 1 ነጥብ 7 ሚሊዮን ብር ጉቦ ተቀብሎ ሲጋራው እንዲያልፍ ያደረገ ሲሆን 2ኛ ተከሳሽ አብዱልዋህድ አብዱላህ በኮንትሮባንድ የገባውን ሲጋራ መያዝ ሲገባቸው እያዩ ዝም በማለት ስልጣናቸውን አላግባብ በመጠቀም በሕዝብና በመንግስት ላይ ጉዳት የሚያደርስ ከባድ የሙስና ወንጀል በመፈፀም ተከሰዋል።

Comments: 0

Your email address will not be published. Required fields are marked with *

This site is protected by wp-copyrightpro.com