የአዲሱን የኢትዮጵያ አየር መንገድ ሆቴል የቻይና ኩባንያ ያስተዳድረዋል

0
1034

በ65 ሚሊዮን ዶላር ወጪ የተገነባውና ንብረትነቱ የኢትዮጵያ አየር መንገድ የሆነው የኢትዮጵያ ሰካይ ላይት ሆቴል ዕዳውን ከፍሎ እስኪጨርስ በቻይናው ኩባንያ ‹‹ግራንድ ስካይ ላይት ሆቴል ማኔጅመንት›› አስተዳደር ሥር እንደሚሆን ተገለፀ። በቻይና ብሔራዊ የአየር ቴክኖሎጂ ዓለም ዐቀፍ የምህንድስና ኮርፖሬሽን የተገነባው ይህ ባለ አምስት ኮኮብ ሆቴል የግንባታ ዕዳውን በጨረሰ ጊዜ ሙሉ በሙሉ በኢትዮጵያ አየር መንገድ ሥር እንደሚሆን ታውቋል። ለሆቴሉ ግንባታ የወጣው ወጪ 35 በመቶ በኢትዮጵያ አየር መንገድ የተሸፈነ ሲሆን ቀሪው 65 በመቶ ደግሞ ከቻይናው ኤክዚም ባንክ በተገኘ የብድር ድጋፍ እንደሆነ ታውቋል።

አስተዳዳሪ ኩባንያው ከ30 ዓመታት በፊት በ298 ሚሊዮን ዩዋን የተቋቋመ ሲሆን ከመካከለኛ እስከ ከፍተኛ ደረጃ ላይ የሚገኙ ሆቴሎችን በዋናነት ዓላማ አድርጎ እየሠራ ይገኛል። ከዚህም ጋር ተያይዞ በአሁኑ ሰዓት በቻይና፣ በሞንጎሊያ እና በሌሎች የደቡብ ምሥራቅ እስያ አገራት 60 ሆቴሎችን እያስገነባ እና እያስተዳደረ የሚገኝ ኩባንያ እንደሆነ ለማወቅ ተችሏል። ኩባንያው በዘርፉ ከእስያ አገራት በመውጣት ወደ ቀረው የዓለም ክፍል አድማሱን እያሰፋ እንደሆነ መረጃዎች ያመለክታሉ።

በዚህም ረገድ በአሜሪካ፣ በቬንዙዌላ እና በኢራን የሆቴል ዘርፍ ላይ ለመሠማራት ያቀደ ሲሆን በአፍሪካ ውስጥ በኢትዮጵያ በቀዳሚነት እየሰራ የሚገኝ ሲሆን በቀጣይ በኬኒያ እና ታንዛኒያ ሆቴሎችን ለማስገንባትና ለማስተዳደር ዕቅድ እንዳለው ታውቋል።

ለኩባንያው በአፍሪካ የመጀመሪያ ሥራው የሆነው የኢትዮጵያ ስካይ ላይት ሆቴል ከውጭ አገር ተቋሪጮች በተጨማሪ አገር በቀሉ የአማካሪ ድርጅት ̋ስለሺ ኮንሰልት˝ የማማከር ሥራው ተሠርቷል።

የኢትዮጵያን በጎብኝዎች ተመራጭ መዳረሻነት ከግምት ውስጥ በማስገባት ከተለመደው የሆቴል አገልግሎት በተለየ ደንበኞችን ለማርካት ታስቦ የተገነባ መሆኑን አየር መንገዱ ለአዲስ ማለዳ የገለፀ ሲሆን ከዚህም ጋር ተያይዞ የኢትዮጵያ አየር መንገድ በየጊዜው ለሚያወጣቸው ጥቅል የጉዞ እና የጉብኝት መርሃ ግብሮች ጉልህ አስተዋጽኦ እንደሚኖረው ጨምሮ ገልጿል። ሆቴሉ 373 የተለያ ደረጃ ያላቸው ክፍሎች፣ አንድ የመዋኛ ገንዳ፣ አራት ዓለም ዐቀፍ ምግቦች የሚስተናገዱበት የመመገቢያ አዳራሽ እና እስከ 2ሽሕ ሰው የመያዝ አቅም ያለው የመሰብሰቢያ አዳራሽ እንዳለው የተገለፀ ሲሆን ይህም ኢትዮጵያ ለሚኖራት ̋የኮንፍረንስ ቱሪዝም˝ የላቀ ሚና እንደሚኖረው ተጠቁሟል።

በ40ሺሕ ካሬ ሜትር ላይ የተንጣለለው ይህ ሆቴል በቅርቡ በሚጀምረው የሆቴሉ የምዕራፍ ሁለት ግንባታ ሲጠናቀቅ ያሉትን የክፍሎች ብዛት ወደ 1 ሺሕ ከፍ እንደሚል በዕቅድ ተይዟል። ለበርካታ ኢትዮጵያዊያን ሥራ ዕድል ይፈጥራል ተብሎ የሚጠበቀው ሆቴሉ በአሁኑ ሰዓት ለስምንት መቶ ሰዎች በቋሚነትና በጊዜያዊነት የሥራ ዕድል እንደሚፈጥር ለማወቅ ተችሏል።

በፈረንጆች 2016 ግንባታው የተጀመረው የኢትዮጵያ ስካይ ላይት ሆቴል በተያዘለት የጊዜ ገደብ የተጠናቀቀ ሲሆን ነገ ጥር 19 በይፋ ተመርቆ ሥራ ይጀምራል።

ቅጽ 1 ቁጥር 11 ጥር 18 ቀን 2011

መልስ አስቀምጡ

Please enter your comment!
Please enter your name here