“ኦነግ ሸኔ” በሆሮ ጉድሩ ዞን በጸጥታ ኃይሎች ላይ ጉዳት ማድረሱ ተገለጸ

0
1382

በኦሮሚያ ክልል ምዕራብ ወለጋ ሆሮ ጉድሩ ዞን በሽብርተንነት የተፈረጀው ኦነግ ሸኔ በጸጥታ ኃይሎች ላይ በከፈተው ተኩስ ጉዳት ማድረሱን የኦሮሚያ ክልል መንግሥት ለአዲስ ማለዳ አስታወቀ።
አዲስ ማለዳ የ“ኦነግ ሸኔ” ታጣቂዎች በንጹኃን ሰዎች ላይ የግድያ፣ አፈና እና ማፈናቀል ጥቃት እያደረሱ ነው መባሉን ተክትሎ ለኦሮሚያ ክልል የኮሚዩኒኬሽን ቢሮ ኃላፊ ጌታቸው ባልቻ ጥያቄ አቅርባ ባሳለፍነው ሳምንት የተለያዩ አካባቢዎች ላይ ቡድኑ ጥቃት መፈጸሙን ተናግረዋል።

በክልሉ በደረሰባቸው አካባቢዎች ጥቃት እየፈጸመ መሆኑ የተነገረለት “ኦነግ ሸኔ” መስከረም 4 እና 5/2014 በሆሮ ጉድሩ ዞን አንዲት መንደር ውስጥ ተንቀሳቅሶ በሚሊሻና በፖሊስ አባላት ላይ ተኩስ በመክፈት ጥቃት ማድረሱን ጌታቸው ጠቁመዋል። በጸጥታ ኃይሎች ላይ በተፈጸመው ጥቃት ከመቁሰል ውጭ የሞተ የጸጥታ አባል አለመኖሩንም ገልጸዋል።

“ኦነግ ሸኔ” ከዚህ በፊት ሲንቀሳቀስባቸው በነበረባቸው አካባቢዎች ላይ ባለፈው ሳምንት ጉዳት ማድረሱን ያስታወሱት ጌታቸው፣ አሁን ላይ ምዕራብ ወለጋም ሆነ ምስራቅ ወለጋ ሠላም እንደሆነና ጥቃት ተፈጸመ ተብሎ መረጃ እንዳልደረሳቸው ተናግረዋል።
ነገር ግን በተባለው ልክ ገፍቶ ወጥቶ ጥቃት ባይፈጽምም፣ አሁንም “ኦነግ ሸኔ” እንቅስቃሴ እያደረገ በመሆኑ ሥጋቶች መኖራቸውን ገልጸዋል። ለዚህ ደግሞ የክልሉ የፀጥታ ኃይል በተቀናጀ ሁኔታ ክትትል እያደረገ መሆኑን ነው የጠቆሙት።

በተጨማሪም፣ “ኦነግ ሸኔ” በአሁኑ ወቅት ወታደሮችን በማሠልጠን ላይ ነው ስለመባሉ “ሸኔ” የራሱን ፍላጎት ለማሳካት የማይለው ነገር የለም ያሉት ጌታቸው፣ “ስንት ክፍለ ጦር ወታደር አደራጅተናል፤ ስንት አስታጥቀናል፤ ይህን ወረዳ ይዘናል፤ ይህን ቀበሌ ተቆጣጥረናል የማይልበት ቀን የለም ሁሌ ነው እንዲህ የሚለው። ነገር ግን አንድ ቀበሌ ይቅርና አንድ መንደር እንኳን ይዞ የቆየበት ጊዜ የለም” ሲሉ ገልጸዋል።

ማሠልጠንን በተመለከተ የእሱን ተባባሪዎችና ዘራፊዎች ሰብስቦ ጫካ በማስገባት እነሱን አንደ ሠልጣኝ ቆጥሮ ሊሆን ይችላል እንጂ፣ በተደራጀ መልኩ ወታደር በማሠልጠን ላይ ስለመሆኑ ግልጽ የሆነ መረጃ የለንም ብለዋል።
በኦሮሚያ ክልል የሚንቀሳቀሰው “ኦነግ ሸኔ” ተብሎ የሚጠራው የታጠቀ ኃይል በተለያዩ ቦታዎች በተለይም በምስራቅ እና በምዕራብ ወለጋ ነዋሪዎችን በመግደል፣ በማፈናቀል፣ ንብረታቸውን በመዝረፍ ለስቃይና ለእንግልት ሲዳርግ መቆየቱ ይታወሳል።

በሽብርተኝነት የተፈረጀው ቡድን በምዕራብ ወለጋ ሆሮ ጉድሩ ዞን በተደጋጋሚ በንጹሐን ዜጎች ላይ ጥቃት ሲያደርስ እንደነበር አዲስ ማለዳ በተደጋገሚ መዘገቧ አይዘነጋም። ችግሩ መባባሱን ተከትሎ የዞኑ የፀጥታ መዋቅር ችግሩ ከአቅሙ በላይ መሆኑን በመግለጹ የዞኑን ሠላም ለማሰከበር የፌደራል ፖሊስ ስምሪት በመስጠቱ የፌደራል ፖሊስ አባላት ከአካባቢው ማኅበረብና የጸጥታ አካላት ጋር በጋራ እየሠሩ ነው መባሉም የሚታወስ ነው።

በሌላ በኩል፣ “ኦነግ ሸኔ” በሚንቀሳቀስባቸው አካባቢዎች መንገድ በመዝጋት የትራንስፖርት አገለግሎት እንዲቋረጥ እያደረገ ነው መባሉን ጌታቸው ሐስት ነው በማለት በታጣቂ ኃይሉ የተዘጋ መንገድ የለም ብለዋል።


ቅጽ 3 ቁጥር 150 መስከረም 8 2014

መልስ አስቀምጡ

Please enter your comment!
Please enter your name here