በኢትዮጵያ የሚገኙ የአገልግሎት መስጫ መገኛዎችን በጎግል ካርታ ላይ የመመዘገብ ሥራ እየተሰራ ነው

0
1629

በኢትዮጵያ ውስጥ የሚገኙ የአገልግሎት መስጫ መገኛዎችን በዲጂታል ጎግል ካርታ ላይ የመመዘገብ ስራ እየተሰራ መሆኑን የኢኖቬሽንና ቴክኖሎጂ ሚኒስቴር አስታውቋል፡፡

በአዲስ አበባ የሚገኙ ሁሉም ፖሊስ ጣቢያዎችና የጤና ተቋማት በጎግል የካርታ አድራሻ ውስጥ ተመዝግበዋልም ተብሏል።

የኢኖቬሽንና ቴክኖሎጂ ሚኒስቴር፣ ከጎግልና “አፍሪካ 118” ከተሰኘ ድርጅት ጋር በመተባበር የቦታ መገኛን በጎግል ካርታ ውስጥ ለመመዝገብ የሚያስችል ስልጠና ለክልል የሳይንስ፣ ቴክኖሎጂና ኢንፎርሜሽን ቴክኖሎጂ ተቋማት ባለሙያዎች እየሰጠ ይገኛል።

ስልጠናው በተለያዩ ክልሎች የሚገኙ ተቋማትን የመገኛ ቦታዎች በጎግል ካርታ ውስጥ በማካተት ሰዎች በቀላሉ ፈልገው እንዲያገኟቸው ለማድረግ ያለመ ነው ተብሏል።

በኢኮሜርስ ግብይት የተፈፀመባቸውን እቃዎች ለደንበኞች ባሉበት ቦታ ለማድረስ ከፍተኛ አስተዋፅኦ ያደርጋል።

በኢኖቬሽንና ቴክኖሎጂ ሚኒስቴር የዲጂታል ትራንስፎርሜሽን ፕሮግራም ፅህፈት ቤት ዳይሬክተር ጀነራል አብዮት ባዩ (ፒ ኤች ዲ) የዲጂታል አድራሻ ምዝገባ የኢትዮጵያን የዲጂታል ትራንስፎርሜሽን እቅድን ለማሳካት አንዱ ቁልፍ ሥራ መሆኑን ተናግረዋል።

በኢትዮጵያ ውስጥ የሚገኙ የመንግስት አገልግሎት ሰጪ ተቋማትና ድርጅቶች የሚገኙበትን ቦታ የመመዝገብ ሥራ ተጠናክሮ እንደሚቀጥል ያነሱት ዳይሬክተር ጀነራሉ፤ ይህንን ለማድረግ የሚያስችሉ ተከታታይ ስልጠናዎች ለባለሙያዎች ይሰጣል ብለዋል።

በአዲስ አበባ የሚገኙ ሁሉም ፖሊስ ጣቢያዎች እና ጤና ተቋማት በጎግል ካርታ ውስጥ የመመዝገብ ሥራ መጠናቀቁን ከኢኖቬሽንና ቴክኖሎጂ ሚኒስቴር ያገኘነው መረጃ ያመለክታል፡፡
______________________________
ትክክለኛውን የአዲስ ማለዳ ሶሻል ሚዲያ በመቀላቀል ቤተሰብ ይሁኑ
Telegram ➲ t.ly/SOXU
Facebook ➲ t.ly/flx8
YouTube ➲ t.ly/vSgS
Twitter ➲ t.ly/mxA4n

መልስ አስቀምጡ

Please enter your comment!
Please enter your name here