በኮንሶ ዞን አስተዳደራዊ የመዋቅር ጥያቄ በማቅረባቸው 80 ሺሕ ዜጎች መፈናቀላቸው ተገለጸ

0
1236

በደቡብ ብሔር ብሔረሰቦች እና ሕዝቦች ክልል በኮንሶ ዞን ከ2011 ጀምሮ አስተዳደራዊ የመዋቅር ጥያቄ በማቅረባቸው ከ80 ሺሕ በላይ ዜጎች ከቤት ንብረታቸው መፈናቀላቸውን የኢትዮጵያ ሰብዓዊ መብቶች ጉባኤ (ኢሰመጉ) አስታወቀ።
ለግጭት ምክንያት እንደሆነ የሚነገርለትን በአካባቢው ያለውን የመዋቅር ጥያቄ ለመመለስ ታስቦ በ2003 የክልሉ መንግሥት ተዋቅሮ የነበረው የሰገን አካባቢ ሕዝቦች ዞን፣ በ2011 መፍረሱን ተከትሎ የአካባቢው ዜጎች ባነሱት የአስተዳደር መዋቅር ጥያቄ መሠረት የግድያ፣ የአካል ጉዳት፣ የመፈናቀል እና የንብረት ውድመት መከሰቱን ኢሰመጉ በጥናት ማረጋገጡን ገልጿል። አካባቢው ከ1990 ጀምሮ ከፍተኛ ቀውስ ውስጥ የቆየና በርካታ ሕይወትና ንብረት ሲወድምበት የነበረ አስቸጋሪ ጊዜያትን ያሳለፈ መሆኑ ተጠቁሟል።

ከ2011 ጀምሮ የአካባቢው ዜጎች በተደጋጋሚ ለፌዴራል እና ለክልል ቢሮዎች አስተዳደራዊ የመዋቅር ጥያቄ ማቅረባቸውን ኢሰመጉ ባወጣው 148ኛ ልዩ መግልጫ አመላክቷል። ይሁን እንጂ፣ “ለምን ይህን ጥያቄ አቀረባችሁ በማለት ከ2011 ጀምሮ ከ80 ሺሕ በላይ ሕዝብ ከቤት ንብረቱ ተፈናቅሏል” ብሏል የኢሰመጉ የምርመራ መግለጫ።

በአስተዳድር መዋቅር ጥያቄ የተከሰተው የጸጥታ መደፍረስ ለ81 ንጹኃን ዜጎች ሞት ምክንያት መሆኑን የኢሰመጉ ምርመራ ያስረዳል። ግድያው የተከሰተው በተለያየ ጊዜያት ከቡርጂ፣ ከኮንሶና ከአማሮ ወረዳ በኩል በታጠቁ ኃይሎች እና በክልሉ ልዩ ኃይል መሆኑ በምርመራ መግለጫው ተገልጿል።

በአካባቢው በተፈጠረው የጸጥታ ችግር ከንጹኃን ዜጎች ሞትና መፈናቀል በተጨማሪ፣ 45 ሺሕ የአካባቢው ነዋሪዎች ቤቶች በእሳት መቃጠላቸውን የገለጸው የምርመራ መግለጫው፣ ቤታቸው የተቃጠለባቸው ዜጎች ችግር ላይ እንደሚገኙ ጠቁሟል። በተፈጠረው የጸጥታ ችግር በቢልዮን የሚገመት ሀብት መውደሙ የተጠቆመ ሲሆን፣ ከውድመት የተረፈው ዜጎች ንብረት በተደራጁ ቡድኖች ተዘርፏልም ተብሏል።

“ከ2011 ጀምሮ የአርሶ አደሩ ማሳ ጾሙን እያደረ ነው” ያለው የኢሰመጉ የምርመራ መግለጫ፣ ማሳቸውን ለማረስ ወጥተው በክልሉ ልዩ ኃይል የተገደሉ ሰዎች ቁጥር ቀላል የማይባል መሆኑን አመላክቷል። የሕብረተሰቡ ማኅበራዊ እና ኢኮኖሚያዊ እንቅስቃሴ ሙሉ በሙሉ መስተጓጎሉን የሚጠቁመው የምርመራ ውጤቱ፣ በአካባቢው ገበያ ከተዘጋ አንድ ዓመት ከስድስት ወር ጊዜ መቆጠሩን ጠቁሟል።

እንዲሁም ትራንስፖርት ከተቋረጠ አምስት ወር ማለፉ የተጠቆመ ሲሆን፣ ወደ 22 የሚጠጉ የ1ኛ ደረጃና የ2ኛ ደረጃ ትምህርት ቤቶች ለኹለት ዓመት እንደተዘጉ ናቸው ተብሏል። “ለ17 ቀበሌ እና አቅራቢያው ላሉ ሕዝቦች አገልግሎት እንዲሰጥ ታስቦ የተገነባው የሰገን ከተማ ሆስፒታል የእስረኞች ማጎሪያና የወታደር ካምፕ ሆኗል፤ የኦርቶዶክስና የፕሮቴስታንት ቤተ ክርስቲያኖች እንዲሁም የእስልምና መስጊዶች ተዘግተዋል፤ የተጀመሩ የመንግሥትና የግል ድርጅቶች የልማት ሥራዎች አብዛኞቹ ባሉበት ቆመዋል” ሲል ኢሰመጉ በመግለጫው ገልጿል።
ኢሰመጉ ያወጣው የምርመራ መግለጫ በደቡብ ብሔር ብሔረሰቦች እና ሕዝቦች ክልል በኮንሶ ዞን፣ አማሮ ልዩ ወረዳ፣ ቡርጂ ልዩ ወረዳ፣ አሌ ልዩ ወረዳና የቀድሞ የጉማይዴ ወረዳዎች ላይ የደረሱ የመብት ጥሰቶች መሆናቸውን ጠቁሟል።

ኢሰመጉ በአካባቢው በተለያየ ጊዜ የተገደሉ እና የአካል ጉዳት የደረሰባቸው ሰዎችን ስም ዝርዝር እና ምስል በምርመራ መግለጫው ያካተተ ሲሆን፣ የተገደሉበትን ቀን እና ቦታ ጠቅሶ በዝርዝር አስረድቷል። የጉማይዴ ሕዝብ የሰላም ኮሚቴ በ10/1/2014 ለኢሰመጉ በጻፈው ደብዳቤ በተለያዩ የአስተዳደር አካላት በሚወሰዱ ዕርምጃዎች የዜጎች ለተደጋጋሚ የሰብዓዊ መብቶች ጥሰት መጋለጥ መቀጠሉን ማሳወቁ የተገለጸ ሲሆን፣ መንግሥት አስፈላጊውን እርምጃ እንዲወስድ ከሚቴው ጠይቋል ነው የተባለው።
ዓለም አቀፋዊም ሆነ ሕገ-መንግሥታዊ ድንጋጌዎችን የሚጥስ ድርጊት በዜጎች ላይ ሲደረግ መንግሥት አፋጣኝ ዕርምጃ ባለመውሰዱ ግለሰቦች ላይ የተለያየ መጠን ያላቸው የአካል ጉዳቶች መድረሳቸውን ኢሰመጉ ጠቁሟል።

የአካባቢውን ሰላም በማስጠበቅ የደረሰውን የሰብዓዊ መብቶች ጥሰት ለማጣራት የሚቻልበት ኹኔታ እንዲያመቻች፣ ለሰብዓዊ መብት ጥሰቶቹ ምክንያት ለሆኑት ችግሮችና ጥያቄዎች ከሚመለከታቸው የሕብረተሰብ ክፍሎች ጋር በመመካከርና በመወያየት የማያዳግም መፍትሔ እንዲሰጥ፣ መንግሥት አስተዳደራዊ እና መዋቅራዊ ክፍተቶችና ችግሮች በመመርመር ተገቢውን ማስተካከያ እንዲያደርግ፣ በተለይም ዜጎች የመልካም አሰተዳደር ጥያቄዎችን በማንሳታቸው ከሚደርስባቸው የሰብዓዊ መብት ጥሰት የሚከላከል ተቋማዊና ሕጋዊ ሥርዓት እንዲዘረጋ ኢሰመጉ ጠይቋል።


ቅጽ 3 ቁጥር 156 ጥቅምት 20 2014

መልስ አስቀምጡ

Please enter your comment!
Please enter your name here