ጦርነቱ በግብርናው ዘርፍ ላይ ያስከተለው ጉዳት

0
1217

የኢትዮጵያ ኢኮኖሚ ግብርና መር መሆኑን ተከትሎ በግብርና ስራው ላይ የሚደርስ ማንኛውም እክል በቀጥታም ይሁን በተዘዋዋሪ በኢኮኖሚው ላይ ከፍተኛ ጫና መፍጠሩ አይቀርም። በአንበጣ፣ በድርቅ፣ ወቅቱን ባልጠበቀ ዝናብና በሌሎች በርካታ ሰው ሰራሽ እና ተፈጥሯዊ ችግሮች የተነሳ ኢትዮጵያ በግብርና ምርት የሚጠበቀውን ያህል ምርት ስታመርት አይስተዋልም። በዚህም ምክንያት በብዙ ቦታዎች የምግብ እጥረት ሲከሰትና ከውጭም ስንዴ ሲገባ ይታያል። አገሪቱ ከዘር መዝራት ጀምሮ፣ እስከ መውቃት ድረስ ባለው የማምረት ሂደት ላይ ኋላቀር የሆነ የግብርና ስራ መከተሏ ብቻ ሳይሆን፣ መልማት የሚችል መሬት እያለ ባለመልማቱም እስካሁን ድረስ ምግብ የብዙዎች ችግር እንደሆነ ዘልቋል።

በአሁኑ ወቅት ደግሞ እየተጓተተ ከአንድ ዓመት በላይ ያስቆጠረው ጦርነት ክፉኛ ከጎዳቸው ዘርፎች መካከል አንዱ የግብርና ዘርፉ መሆኑ ይነገራል። በተለይ በሰሜኑ የኢትዮጵያ ክፍል በርካታ የእርሻ መሬቶች ያለምርት ሲከርሙ፣ የተዘራውም የሚሰበስበው ባለመኖሩ እረግፎ እንደቀረ ሲነገር ይሰማል።

በግብርና ሚኒስቴር የግብርና ኤክስቴንሽን ዳይሬክተር ጀኔራል የሆኑት ገርማሜ ጋሩማ ይህን አስመልክቶ በ2013/2014 የምርት ዘመን እንደ አገር ስላለው የግብርና ምርት በተመለከተ ለአዲስ ማለዳ ተናግረዋል። በዚህም በ2013/2014 የምርት ዘመን 13 ሚሊዮን ሄክታር መሬት ለማልማት ታቅዶ አሁን ባለው መረጃ 12.9 ሚሊዮን ሄክተር በዘር ተሸፍኗል ነው ያሉት። በዚህም እንደ አገር የዕቅዱ 99 በመቶ በዘር ተሸፍኗል ሲሉ ገልጸዋል።

በትግራይ ክልል 900 ሺህ ሄክታር መሬት በዘር አልተሸፈነም ያሉት ዳይሬክተር ጀኔራሉ፣ በአማራ ክልልም በተመሳሳይ በዘር የተሸፈነ 1.5 ሚሊዮን ሄክታር መሬት በጦርነቱ ምክንያት ከፍተኛ ጉዳት ደርሶበታል ብለዋል። ይህን ለማካካስም ጦርነት በሌለባቸው የአማራ ክልል አካባቢዎች፣ በደቡብ ክልል፣ በሱማሌ እና ኦሮሚያ ክልል በሚገኙ ማሳዎች ሰፊ የምርት ስራ እየተሰራ መሆኑን አመላክተዋል።

በአጠቃላይ፣ ጦርነቱ በአገሪቱ ግብርና ምርት ላይ ከፍተኛ ጉዳት ይደርሳል ተብሎ አይታሰብም በማለት፣ ነገር ግን በተለየ ሁኔታ ካየነው ትግራይ ክልል ውስጥ ከፍተኛ ጉዳት አለ። በተመሳሳይ በአማራ ክልል ሰሜን ወሎ ላይም ከፍተኛ ጉዳት አለ። ሲጀምርም ሰሜን ወሎ ላይ ሰብል አለ ተብሎ አይወራም። መጀመሪያም አልተዘራም የተዘራውም ወድሟል። ዋግኽምራ ላይም 50 በመቶ በላይ የሆነው መልማት የሚችል መሬት በዘር አልተሸፈነም፣ የተዘራውም በአግባቡ አልተሰበሰበም የሚል ሀሳብ ሰንዝረዋል። ደቡብ ወሎ ላይም እንዲሁ በጦርነቱ ምክንያት ከፍተኛ መጠን ያለው የደረሰ የሰብል ምርት ላይ ጉዳት የደረሰ ሲሆን፣ አሁን ላይ ክፍተት ሲገኝ ለመሰብሰብ ከሚደረገው ሙከራ ውጭ መሰብሰብ እንዳልተቻለ ጠቁመዋል።

አክለውም፣ ጦርነት በመኖሩ በግብርና ምርት ላይ ጉዳት አለ፣ ጉዳቱ ግን አጠቃላይ አገራዊ ኢኮኖሚውን የሚጎዳ አይደለም ነው ያሉት። ከኹሉም በትግራይ ክልል ያለው ጉዳት ከፍተኛ ነው ያሉት ዳይሬክተር ጀኔራሉ፣ በክልሉ ብሎም በሰሜን ወሎ እና ደቡብ ወሎ ያለውን ክፍተት ለመሙላት በሌሎች አካባቢዎች የሚመረተው ምርት በቂ መሆኑን አንስተዋል። ለዚህ ደግሞ በዋናነት ያነሱት በኦሮሚያ ክልል ባለፈው ዓመት የምርት ዘመን በዘር ተሸፍኖ የነበረ 5.7 ሚሊዮን ሄክታር መሬት፣ በዘንድሮው የምርት ዘመን አንድም መሬት በዘር ሳይሸፈን መቅረት የለበትም በሚል እርብርብ፣ 6.2 ሚሊዮን ሄክታር መሬት በዘር እንዲሸፈን መደረጉ በጦርነቱ በተያያዘ በአገሪቱ ሊፈጠር የሚችለውን የምርት ጉዳት ይከላከላል በሚል ነው። በጦርነቱ ከፍተኛ ጉዳት በደረሰበት በአማራ ክልልም እንዲሁ ባለፈው ዓመት የምርት ዘመን ተሸፍኖ የነበረው 4.2 ሚሊዮን ሄክታር መሬት በዚህ ዓመት የምርት ዘመን 4.6 ሚሊዮን ሄክታር የሚጠጋ ማሳ በዘር መሸፈኑ አገራዊ የግብርና ምርት ጉዳቱን ያቀላል ነው ያሉት።

ግጭቱን ተከትሎ የተጎዳውን እና ሳይመረት የቀረውን የሰብል ምርት ለማካካስ፣ በተጨማሪም በበጋ የመስኖ ሥራ ወደ 400 ሺህ ገደማ በሚሆን ሄክታር መሬት የስንዴ ምርት የማምረት ሥራ እየተከናወነ መሆኑን ገልጸዋል። ከዚህ የስንዴ ምርትም 16 ሚሊዮን ኩንታል የሚደርስ የስንዴ ምርት ለማገኘት እቅድ መያዙን ነው ያመላከቱት። እንዲሁም፣ በ2014 በሚደረግ የማካካሻ ሥራ ጦርነቱ በአጭር ጊዜ የሚቋጭ ከሆነ፣ በተጎዱ አካባቢዎች የመስኖ ሥራ በሚከናወንባቸው የመስኖ ሥራ ይሰራል፣ የበልግ ዝናብ ያለባቸው አካባቢዎችም ተለይተው ምርት እንዲሰጡ ለማድረግ ዝግጅቶች እየተደረጉ እንደሆነ ተናግረዋል። በዚህም በጎንደርና በኹለቱም የወሎ ዞኖች የመስኖ ሥራ እስካሁን አልተጀመረም እንጂ፣ ከህወሓት ነጻ በወጡ የዋግኽምራ ዞን አካባቢዎች የመስኖ ሥራ ክንውን መጀመሩን ገልጸዋል።

ረዥም ጊዜያትን ያስቆጠረው ጦርነት ከአማራ እና ትግራይ ክልል ውጭ በአፋርም እንዲሁ ጉዳት ማስከተሉ የሚታወቅ ነው። ይህን ተከትሎም በክልሉ የግብርና ምርት ላይ የደረሰውን ጉዳት ዳይሬክተር ጀኔራሉ ገርማሜ ጋሩማ ሲገልጹ፣ አብዛኛው የአፋር ሕዝብ አርብቶ አደር በመሆኑ በሰብል ምርት ላይ የደረሰበት ጉዳት የለም ማለት ይቻላል ብለዋል። ነገር ግን ይላሉ፣ በጦርነቱ ምክንያት በርካታ ግመሎች ተገድለዋል፣ በርካቶችም ተሠደዋል።

ከዚህም ሌላ ከህወሓት ጋር የሚደረገው ውጊያ በአሰብ ዙሪያ እና በሚሌ አካባቢዎች በመሆኑ፣ እነዚህ ቦታዎችም በከፍተኛ ሁኔታ በርሀማ መሆናቸውን ተከትሎ ምርት የሚመረትባቸው ባለመሆኑ በግብርና ምርት በኩል ክልሉ ላይ የደረሰውን ጉዳት ምንም ማለት አይደለም ብለውታል። ምርት የሚገኝባቸው የክልሉ ቦታዎች ከጦርነት ቀጠናው ነጻ መሆናቸውን ነው ያነሱት። ሆኖም ግን ባለፈው ክረምት በክልሉ ሳይመረት ያለፈውን ምርት ለማካካስና እንደ አገር የምርት መጠንን ለማሳደግ በአፈር ክልል በበጋ የመስኖ ሥራ የአዋሽ ወንዝን በመጠቀም በሶስት ወራት የሚደርስ ሰፊ የስንዴ ምርት ለማምረት ሥራ መጀመሩን አብራርተዋል።

ይሁን እንጂ አዲስ ማለዳ ያነጋገረቻቸው ስማቸው እንዲጠቀስ የማይፈልጉ አንድ የምጣኔ ሀብት ባለሙያ፣ ከግብርና ሚኒስቴር በኩል በዘር ተሸፍኗል የተባለውን ሄክታር መሬት ብዙም እንደማይቀበሉት ገልጸው፣ ጦርነቱ በግብርናው ዘርፍ ላይ ያስከተለውን ተጽዕኖ አሳንሶ ማየትም እንደማይገባ ተናግረዋል። በኦሮሚያ ክልል በወለጋ አካባቢ በሸኔ ታጣቂዎች ምክንያት በግብርናው ላይ የደረሰው ጉዳትም መጠቀስ አለበት ያሉት ባለሙያው፣ በክልሉ ድርቅ በተከሰተባቸው አካባቢዎች የሞቱት እንሳሳትና የተጎዳው የሰብል ምርት በጥናት ተረጋግጦ እስካልተነገረ ድረስ በቀጣይ ኢትዮጵያ ላይ ብዙም ጉዳት አይከሰትም ብሎ መናገር እንደማይገባ ነው የገለጹት።

ባለሙያው፣ ለፖለቲካ ፍጆታ ሳይሆን ጦርነቱ ከተጀመረ እስካሁን ባለው የምርት ወቅት ምን ያህል መሬት እንደለማ እና ምን ያህል መሬት እንዳልለማ፣ ምን ያህሉ እንዳልታጨደ፣ ምን ያህል ምርት ለመሰብሰብ ታቅዶ ምን ያህል እንደተገኘ፣ በጥናት የተረጋገጠ ግልጽ መረጃ ከሚመለከታቸው ተቋማት ሊወጣ ይገባ ነበር ብለዋል። ይህ ቢደረግ ክፍተቱን ለመሙላት አያዳግትም ባይ ናቸው።

ግብርና ሚኒስቴር በበኩሉ፣ ጦርነቱ በግብርና ምርቱ ላይ በተለይም ምርት በመሰብሰብ ሂደት ላይ ያስከተለው የጉዳት መጠን ጥናት እየተጠና እንደሆነ ጠቁሞ፣ ጥናቱ ስላላለቀ ከዚህ በላይ ዝርዝር መረጃ መስጠት አይቻልም ሲል ለአዲስ ማለዳ ገልጿል።

ሠላም ባለባቸው የአገሪቱ አካባቢዎች በግብርናው ዘርፍ ማድረግ የሚቻለው ሁሉ እንዳልተደረገ እና ወደፊት ግብርና መር የሆነው የአገሪቱ ኢኮኖሚ ከፍተኛ ቀውስ ሊያስከትል እንደሚችል ምሁራን ይገልጻሉ።
ለእርሻ ሥራ የሚውለው ሄክታር መሬት በየአመቱ በአብዛኛው መጠኑ መሻሻል የሚያሳይ ቢሆንም፣ በ2010 የምርት ዘመን የዓለም ባንክ ባወጣው መረጃ መሰረት በኢትዮጵያ ከ16 ሚሊዮን ሄክታር በላይ ለሰብል ልማት የሚውል መሬት መኖሩ ይፋ መደረጉ አይዘነጋም። ከዚያ በኋላ ባሉት ዓመታት ስንት እንደደረሰ ባይታወቅም ከዚህም ውስጥ ግብርና ሚኒስቴር በገለጸው መሰረት በ2013/2014 የምርት ዘመን በሰብል ለማልማት እቅድ የተያዘው 13 ሚሊዮን ሄክታር መሬት ብቻ መሆኑ ከ 3 ሚሊዮን ያላነሰ ሄክታር መሬት እንደባከነ ያሳያል። እንዲለማ ከተደረገውም ውስጥ ከጦርነቱ በተጨማሪ በብዙ ችግሮች ሰብሉ ላይ ጉዳት መድረሱ አገሪቱን በቀጣይም ከአሁኑ የከፋ የምግብ እጥረት እንዲከሰትና የበለጠ የምግብ እርዳታ እንድትለምን ሊያደረጋት ይችላል የሚል ስጋታቸውን አንዳንዶች ይሰነዝራሉ። በዚህም የግብርና ምርቱ ከዓመት ወደ ዓመት እያሽቆለቆለ በአንጻሩ ደግሞ የሕዝብ መጠኑ ከፍ እያለ የሚሄድ በመሆኑ ብዙዎች ለረሀብ እንደሚጋለጡ መረጃዎች ያመላክታሉ።

ኢትዮጵያ ሰፊ ለም መሬት፣ ምቹ የአየር ንብረት፣ በቂ የሰው ኃይልና በቂ የዝናብ መጠን የምታገኝ ብትሆንም፣ በቴክኖሎጂ ባልታገዝው የአመራረት ዘዴና በየጊዜው በግብርናው ላይ የሚደርሱ በርካታ ችግሮችን ለመቋቋም የሚያስችል ስራ ባለመሰራቱ እስካሁን በግብርን ምርት ያስመዘገበችው ውጤት ከተረጅነትና ከችግር እንዳላላቀቃት ነው የሚነገረው።

በተጨማሪም፣ አገሪቱ ወደ ውጭ ገበያ ምርት በመላክ ከምታገኘው የውጭ ምንዛሬ ትልቁን ድርሻ የሚይዘው የግብርና ዘርፉ በመሆኑ ዘርፉ በተዘዋዋሪም ቢሆን በአገሪቱ ኢኮኖሚ ላይ የሚያደርሰው ጉዳት ቀላል እንዳልሆነ ይታመናል። ዘርፉ ከሰብል ምርት በተጨማሪ የእንስሳት እርባታንም ያቀፈ በመሆኑ ከእንስሳት ምርት ውጤቶች ከቆዳና ሌጦ ከሚገኘው የውጭ ምንዛሪ በተጓዳኝ ኑሮውን በእንስሳት እርባታ ላይ መሰረት ያደረገው ማህበረሰብ በጦርነቱ ሳቢያ ጉዳት እንደሚያስተናግድ የሚደበቅ አይደለም።

በአማራ ክልል ከሚታረሰው መሬት አንድ ሶስተኛው በአሲዳማ አፈር የተጠቃ መሆኑን እና በርካታ የክልሉ አካባቢዎች በአሲዳማነት ችግር ከምርት ውጭ እንደሚሆኑ መረጃዎች ያመላክታሉ። በጦርነቱ ምክንያት ከተጎዱ ክልሎችም በስፋት ያልታረሰ መሬት የሚገኘው በዚሁ ክልል ውስጥ እንደሆነም ይነገራል። ከዚያ ባለፈም በተወካዮች ምክር ቤት በሽብርተኛነት የተፈረጀው የህወሓት ኃይል በተቆጣጠራቸው የክልሉ አካባቢዎች የተሰበሰበ ሰብል የሚያቃጥል መሆኑ፣ አጭዶ እና ወቅቶ እየወሰደ እንደሆነ፣ እንዲሁም ገበሬዎች ምርታቸውን እንዳይሰበስቡ ክልከላ ማድረጉ በስፋት የሚነገር ጉዳይ ነው። በዚህም አዲስ ማለዳ በጦርነቱ ምክንያት የግብርና ምርቱ በስፋት ጉዳት ከደረሰበት አማራ ክልል መረጃ ለማግኘት ፈልጋ፣ ለክልሉ ግብርና ቢሮ በተደጋጋሚ ስልክ ብትደውልም ሳይሳካላት ቀርቷል።


ቅጽ 4 ቁጥር 160 ሕዳር 18 2014

መልስ አስቀምጡ

Please enter your comment!
Please enter your name here