በኦሮሚያ ክልል ምሥራቅ ወለጋ ዞን ሐሮ ሊሙ ወረዳ 19 ሰዎች በኦነግ ሸኔ ተገደሉ

0
1531

20 የቀን ሠራተኞች ታግተዋል

በኦሮሚያ ክልል ምሥራቅ ወለጋ ዞን ሐሮ ሊሙ ወረዳ፣ 19 ንጹኃን ሰዎች በሕዝብ ተወካዮች ምክር ቤት በሽብርተኝነት በተፈረጀው ኦነግ ሸኔ መገደላቸውን የአካባቢው ነዋሪዎች ለአዲስ ማለዳ ገለጹ።
አዲስ ማለዳ ከአካባቢው ነዋሪዎች ከደረሳት መረጃ መረዳት የተቻለው፣ ኅዳር 24/2014 የኦነግ ሸኔ ታጣቂዎች በሠነዘሩት ጥቃት 10 ንጹኃን ዜጎች መገደላቸውንና 20 የቀን ሠራተኞች መታገታቸውን ነው።

10ሩ ሰዎች ከመገደላቸው በፊት፣ ዘጠኝ ንጹኃን ዜጎች እንደተገደሉና 12 ሰዎች እንደታገቱ የተመላከተ ሲሆን፣ በሳለፍነው ሳምንት በአጠቃላይ 19 ንጹኃን ዜጎች መገደላቸውንና 32 ሰዎች መታገታቸውን ነዋሪዎቹ ተናግረዋል። ሰዎቹ የተገደሉት በሊሙ ወረዳ መንደር ስደስት እና መንደር ሰባት ተብለው በሚጠሩ አካባቢዎች ነው ተብሏል።

ለደኅንነታቸው ሲባል ሥማቸው እንዳይገለጽ የጠየቁ የአካባቢው ነዋሪ፣ ባሳለፍነው ኅዳር 22/2014 የሸኔ ታጣቂ ቡድን ጥቃት ለማድረስ ሙከራ አድርጎ የመከላከያ ሠራዊት የተከላከለ ቢሆንም፣ ከኹለት ቀን ቆይታ በኋላ ኅዳር 24/2014 ታጣቂ ቡድኑ ጥቃቱን ለመሠንዘር ችሏል ነው ያሉት።

ኅዳር 24/2014 የሞቱትን 10 ሰዎች አውቃቸዋለሁ ያሉት የአካባቢው ነዋሪ፣ ስም ዝርዝራቸውን ለአዲስ ማለዳ አጋርተዋል። በዚህም፤ ፈንታው ስንታየሁ፣ አብዱ ሰይድ፣ ከድር እንድሪስ፣ መሐመድ አምዛ፣ በላይነህ ገበየሁ፣ ዘነበ ምስጋናው፣ መለሰ አባዬ እንዲሁም አትንኩት የሚባሉ 10 ሰዎች ላይ ግድያ መፈጸሙን አስተያት ሰጭው ለአዲስ ማለዳ ተናግረዋል።

ግለሰቡ አክለውም፣ በቆሎ በመሰብሰብ ሥራ ላይ ተሠማርተው የነበሩ 20 የቀን ሠራተኞች በታጣቂ ቡድኑ መታገታቸውን ገለጸው፣ ይህ ዘገባ እስከተዘጋጀበት ጊዜ ድረስም አድራሻቸው እንዳልታወቀ ነው ለአዲስ ማለዳ ያመላከቱት።
በመሆኑም፣ የአካባቢው ማኅበረሰብ ቤቱን ለቆ እየወጣ፣ አዝመራው እየተዘረፈ ከመሆኑም ባሻገር፣ በታጣቂ ቡድኑ እጅ ውስጥ ያሉ የመንደር አንድ፣ ስድስት፣ ሰባት፣ ስምንትና ዘጠኝ በርካታ ነዋሪዎች በችግር ላይ ናቸው ነው የተባለው።

የአዲስ ማለዳ ምንጮች እንደሚሉት፣ ኦነግ ሸኔ የአካባቢውን ነዋሪዎች ካገተ በኋላ ከመግደሉ በፊት “ብር አምጡና ትለቀቃላችሁ” በማለት ብር እንደሚቀበል የተጠቆመ ሲሆን፣ የሚፈልገውን ብር ከተቀበለ በኋላም መግደሉን እንደማይተው ነው ያስረዱት።
ስማቸው እንዳይጠቀስ የጠየቁ ሌላው የአካባቢው ነዋሪ እንደሚናገሩት፣ ባሳለፍነው ሳምንት በኦነግ ሸኔ ከተገደሉት ንጹኃን ዜጎች መካከል ዘነበ ምስጋናው የተባሉት ግለሰብ እንደሚገኙበት ገልጸው፣ “300 ሺሕ ብር ክፈል እንለቅሃለን” ተብለው ገንዘብ ከፍለው የነበረ ቢሆንም፣ ከመገደል አልተረፉም ነው ያሉት።

ከዚህም በተጨማሪ፣ በላይነህ ገበዬሁ የተባሉት በኦነግ ሸኔ ግድያ የተፈጸመባቸው ግለሰብ፣ “ወደ መከላከያ እየደወልክ መረጃ እየሰጠህ ነው” በሚል ሠበብ ነው የተገደሉት ሲሉ ነው የአዲስ ማለዳ ምንጭ አክለው የተናገሩት።
በሌላ በኩል፣ በሐሮ ወረዳ ታጣቂ ቡድኑ በሚያደርሰው ጥቃት የአካባቢው ማኅበረሰብ መንቀሳቀስ እንዳልቻለና በተለይም ነፍሰጡር እናቶች ወደ ጤና ጣቢያ አቅንተው የወሊድ አገልግሎት ማግኘት እንደተቸገሩ ነው አዲስ ማለዳ የሰማችው።

ስሙ እንዲጠቀስ ያልፈቀደው የሐሮ ወረዳ ወጣት፣ ምጥ ላይ የነበሩ እናቶች ለተከታታይ ስምንት ቀናት ሲያምጡ ቆይተው፣ ከፊሎቹ በሐበሻ መድኃኒት መውለድ ቢችሉም፣ ሦስቱ ግን ለሞት ሲዳረጉ አይቻለሁ ሲል ነው የመሰከረው።
በሐሮ ወረዳ መብራት ከጠፋ ሳምንታት ማስቆጠሩን ተከትሎ እናቶች ምግብ የሚያዘጋጁት በእጃቸው እየፈጩ የነበረ ሲሆን፣ ሰሞኑን የፍጆታ አቅርቦትም እንዳልተገኘ ነው ወጣቱ አያይዞ የገለጸው።

ጥቃቱ ከተደቀነብን ከኹለት ዓመት በላይ ብናስቆጥርም ምንም ዓይነት መፍትሔ አላገኘንም፤ ዕርዳታ የማግኘት ዕድሉ ይቅርና መንገድ ክፈቱልን ብንል እንኳን መውጫ ባለመገኘቱ በርካቶች ሙተዋል የሚሉት ነዋሪዎቹ፣ መንግሥት ችግራችንን ሊፈታልን ይገባል ሲሉ አሳስበዋል።


ቅጽ 4 ቁጥር 162 ታኅሣሥ 25 2014

መልስ አስቀምጡ

Please enter your comment!
Please enter your name here