የሕብረት ባንክ አክሲዮን ማኅበር ሠንጋ ተራ አካባቢ ያስገነባውን ባለ 37 ወለል የዋና መሥሪያ ቤት ሕንፃ “ሕብር ታወር” በሚል ስያሜ ጥር ሰባት 2014 አስመርቋል።
በመዲናችን አዲስ አበባ “የፋይናንስ ዲስትሪክት” የሚል ሥያሜን ባገኘውና ዋና ዋና የፋይናንስ ተቋማት በሚገኙበት ሠንጋ ተራ አካባቢ የተገነባው የሕብረት ባንክ ዋና መሥሪያ ቤት ሕንፃ፣ ለከተማዋ ልዩ ውበትን ያላበሰና ትልቅ አልሞ ከትልቅ መድረስ እንደሚቻል በተግባር የታየበት ነው ተብሏል።
ግንባታው የተጠናቀቀው በስድስት ዓመት እንደሆነ የተገለጸ ሲሆን፣ ዋና መሥሪያ ቤቱም 2.8 ቢሊዮን ብር ወጪ እንደተደረገበትና ዲዛይኑ አገር በቀል በሆነው የእስክንድር አርክቴክት ተሠርቶ ግንባታው ደግሞ በዓለማችን በኮንስትራክሽን ዘርፉ ተጠቃሽ በሆነው ቻይና ዢያንግሹ ኢንተርናሽናል (China Jiangsu International Economic Technical Cooperation Group LTD) መከናወኑ ተመላክቷል።
ሕንፃው ዓለም አቀፍ ደረጃቸውን የጠበቁ ዘመናዊ ፋሲሊቲዎች ያሉት ሲሆን፣ ዘመናዊ በኮምፓስ የሚሠሩ 13 አሳንሰሮች፣ በሴንሰር የሚሠራ መብራትና ዉኃ፣ ከ147 በላይ ካሜራዎች፣ እንዲሁም የማያቋርጥ የኃይል አቅርቦትና የሕንፃ አስተዳደር (Building Management System) የተገጠሙለት ነው ተብሏል።
“ሕብር ታወር” የተሠኘው ዋና መሥሪያ ቤቱ ሦስት ብሎኮች አሉት የተባለ ሲሆን፣ የመጀመሪያው G+4 ብሎክ ለተለያዩ የንግድ አገልግሎት ለሚሰጡ ድርጅቶች ኪራይ፣ ኹለተኛው G+32 ፎቅ ብሎክ ለተለያዩ ቢሮዎች እንዲሁም፣ ሦስተኛው G+4 የታወሩ ብሎክ ደግሞ፣ የተለያዩ መጠን ያላቸውን አዳራሾች ካፍቴሪያ፣ ዘመናዊ ኩሽናዎች እና ጂምናዚየምን አካትቷል ነው የተባለው።
ሕብረት ባንክ ላለፉት 23 ዓመት በዘመናዊ የባንክ አገልግሎት ፈር ቀዳጅ በመሆን የአገራችንን ሕዝብ እያገለገለ የሚገኝ ባንክ ሲሆን፣ የቅርንጫፍ ቁጥሩን ከ400 በላይ በማድረስ ለደንበኞች ተደራሽነቱን እያሰፋና ዘመናዊ ተክኖሎጂዎችን እያስተዋወቀ የሚገኝ አንጋፋ ባንክ ነው ተብሏል።
ቅጽ 4 ቁጥር 167 ጥር 7 2014


