ኢትዮጵያ ካመጠቀቻቸው ሳተላይቶች የሚገኙ መረጃዎች ጥቅም ላይ እየዋሉ አይደለም ተባለ

0
1794

ኢትዮጵያ በተለያዩ ጊዜያት ወደ ህዋ ካመጠቀቻቸው ኹለት ሳተላይቶች የሚገኙ መረጃዎች አገልግሎት ላይ እየዋሉ አለመሆኑ ተገለጸ።

ኢትዮጵያ ታኅሣሥ 10/2012 ያመጠቀቻት የመጀመሪያዋ ‹‹ETRSS1›› ሳተላይት እና ያንን ተከትሎ ከዓመት በኋላ የመጠቀችው ኹለተኛዋ ‹‹ET-Smart-RSS›› ሳተላይት የሚልኩትን መረጃ ወስዶ፣ አገራዊ ጥቅም ላይ የሚያውል ተቋም አለመኖሩን አዲስ ማለዳ ከተለያዩ ምንጮች አረጋግጣለች።

የኢትዮጵያ ስፔስ ሳይንስና ቴክኖሎጂ ኢንስቲትዩት ለአዲስ ማለዳ እንደገለጸው፣ መረጃዎችን ከሳተላይቶች ተቀብሎ እና ተንትኖ መረጃ ቢያመርትም፣ መረጃዎች ለተፈለገው ዓላማ የሚጠቀም ተቋም የለም።

የኢንስቲትዩቱ የሕዝብ ግንኙነት እና የኮምዩኒኬሽን ዳይሬክቶሬት ዳይሬክተር ግርማ ደጀኔ፣ ከሳተላይቶች የሚገኘው መረጃ ለግብርና ሥራዎች እና ለአየር ጸባይ ትንበያ እንዲሁም የተፈጥሮ አደጋን ለመከላከል እንደሚያገለግል ገልጸዋል። ሆኖም ግን ተቋማቱ መረጃውን ወስዶ ለሚፈለገው ዓላማ የማዋል ፍላጎት እንደሌላቸው አንስተዋል።

‹‹ለግብርና ሚኒስቴር በሩን አንኳኩተን ነው እባካችሁ የሳተላይት መረጃ ተጠቀሙ ብለን የምንሰጠው።›› ያሉት የሕዝብ ግንኙነት ዳይሬክተሩ፣ የኢትዮጵያ ሜትሮሎጂ ኢንስትቲዩት እና ሌሎች ተቋማትንም በዚህ መልኩ ነበር ስንጠይቅ የነበረው ብለዋል።
‹‹ከኢትዮጵያ ሜትሮሎጂ ኢንስቲትዩት ጋር ተፈራርመን መጀመሪያ ላይ የተወሰነ መረጃ ሲወስዱ ነበር። በኋላ ላይ ለምን እንደሆነ ሳይታወቅ አቋረጡ።›› ሲሉም ገልጸዋል።

በአሁኑ ወቅት በየጊዜው የተሰበሰበ ብዙ ቴራባይት መረጃ መኖሩን እና መረጃውንም ከተቋማት ይልቅ ተመራማሪዎች እንደሚጠቀሙበት ዳይሬክተሩ አመላክተዋል።

‹‹ብዙ ተቋማት ቀጥታ ከሳተላይት የተገኘ መረጃን ከመጠቀም ይልቅ ከጂኦ-ስፓሻልና ኢንፎርሜሽን ኢንስቲትዩት (የቀድሞው ካርታ ሥራዎች ተቋም) የወረቀት ላይ መረጃ ነው መውሰድ የሚፈልጉት። በዚህም አሁን ላይ ኹለቱ ተቋማት አንድ እንዲሆኑ በአዲሱ አደረጃጀት መንግሥት የወሰነ በመሆኑ ችግሩ ይፈታል የሚል እምነት አለኝ።›› ነው ያሉት።

የኢትዮጵያ ሜትሮሎጂ ኢንስትቲዩት የሕዝብ ግንኙነት ኃላፊ አሕመዲን አብዱከሪም በበኩላቸው፤ ‹‹ኹለቱም ሳተላይቶች ለሜትሮሎጂ የሚሆን መረጃ መላክ የማይችሉ በመሆናቸው፣ እኛ መረጃ የምንቀበለው ከአውሮፓ ሳተላይቶች እና የዓለም ሜትሮሎጂ አባል ከሆኑ ያደጉ አገራት ነው።›› ብለዋል።

ግብርና ሚኒስቴርም እንዲሁ ከሳተላይቶች መረጃ ለወደፊት ለመጠቀም ስትራቴጂዎች መኖራቸውን እንጂ ተጠቅሞ እንደማያውቅ ለአዲስ ማለዳ ገልጿል።

የኢኖቬሽን እና ቴክኖሎጂ ሚኒስቴር ውስጥ አንድ ሥማቸውን እንዲገለጽ ያልፈለጉ የሥራ ኃላፊ፣ የሳተላይት መረጃዎችን መጠቀም የሚገባቸው ተቋማት ከዚህ በፊት ከለመዱት ባህላዊ አሰራር ለመውጣት እንደሚቸገሩ ጠቁመዋል። አያይዘውም የመጀመሪያዋ ሳተላይት የአገልግሎት ዘመኗ ከኹለት ዓመት ተኩል እስከ ሦስት ዓመት በመሆኑ ከዚህ በኋላ አገልግሎት መስጠት ብታቆም የሚጠበቅ ነው ብለዋል።

የኹለተኛዋ ሳተላይት ከአንድ ሕዋ ላይ ከሚሠራ የቻይና ዓለም ዐቀፍ ተቋም ጋር በትብብር የመጠቀች በመሆኗ በሙሉ አቅሟ አገልግሎት እየሰጠች ነው ሲሉም አክለዋል።

አዲስ ማለዳ በተለይ የመጀመሪያዋ ሳተላይት አሁን ያለችበትን ሁኔታ እና እንጦጦ ስለሚገኘው የመረጃ መቀበያ ጣቢያ አንስታ ለኢትዮጵያ ስፔስ ሳይንስና ቴክኖሎጂ ኢንስቲትዩት ባቀረበችው ጥያቄ መሠረት፣ የኢንስቲትዩቱ የሕዝብ ግንኙነት ኃላፊ ግርማ ደጀኔ እስከ አሁን ባለው ሁኔታ ‹መረጃ እየላከች› መሆኑ እና ከዚህ በኋላ የሚቀራት ጥቂት ወራት መሆኑን አስታውቀዋል።

እስከ አሁን በቁጥጥር ስር ሆና መረጃ በመላክ ላይ እንዳለች ጠቁመው፣ ‹‹መብራት ለቀናት በሚጠፋበት ወቅት እንኳን ሳተላይቷ ምህዋሯን ጠብቃ ስለመንቀሳቀሷ እና አገልግሎት እየሰጠች መሆኑን ከቻይናው ስፔስ ኤጀንሲ ጋር ቅርበት ስላለን ለመቆጣጠር አንቸገርም።›› ብለዋል።

‹‹የመረጃ መቀበያውም ብዙ ጊዜ አገልግሎት አይሰጥም የሚሉ ጥቆማዎች በመኖራቸው፣ አልፎ አልፎ የመብራት መቆራረጥ ይከሰታል። ይህም የተለመደ አገራዊ ክስተት በመሆኑ አንዳንዴ መረጃ ሳንቀበል ሊያልፈን ይችላል። ከዚያ ውጭ መረጃ መቀበያ መሣሪያው በትክክል ይሠራል።›› ሲሉም አክለዋል።

የመጀመሪያዋ የኢትዮጵያ ሳተላይት በስምንት ሚሊዮን ዶላር ወጪ፣ ከኹለት ዓመት በፊት ወደ ህዋ መላኳ እና ለኢትዮጵያ እድገት ቁልፍ ሚና እንደሚኖራት መነገሩ ይታወሳል።


ቅጽ 4 ቁጥር 168 ጥር 14 2014

መልስ አስቀምጡ

Please enter your comment!
Please enter your name here