ከፍተኛ ባለሥልጣናት የመንቀሳቀሻ ፈቃድ ከጠቅላይ ሚንስትር ቢሮ እንዲይዙ መመሪያ ተላለፈ

0
988

በመንግሥት ከፍተኛ የኀላፊነት እርከን ላይ የሚገኙ ሚንስትሮች እና ዳይሬክተሮች ከሥራ ገበታቸው ላይ እያሉ በአገር ውስጥ እና በውጭ አገራት ላይ ጉዞ ለማድረግ ከጠቅላይ ሚንስትር ጽሕፈት ቤት የይለፍ ፈቃድ እንደሚያስፈልጋቸው የሚያስታውቅ ሰርኩላር መተላለፉ ታወቀ።

ምንጮች ለአዲስ ማለዳ እንደገለጹት በኢትዮጵያ ውስጥ ባለው ነባራዊ ሁኔታን መሰረት በማድረግ ከፍተኛ የሥራ ኀላፊዎች በአገር ውስጥ በሚያደርጉት የሥራ ጉብኝት እንዲሁም በውጭ አገራት በሚያደርጉት የትኛውም አይነት ጉዞ በቅድሚያ ከጠቅላይ ሚንስትር ጽሕፈት ቤት ፈቃድ እንደሚያስፈልጋቸው ለማወቅ ተችሏል።

በቀደሙት ጊዜያት ከፍተኛ የሥራ ኀላፊዎች ተጠሪ ለሆኑበት ተቋም አመራር በማሳወቅ እና ሥራቸውን ለሚረከባቸው ተወካይ በመስጠት ከሥራ ገበታቸው ላይ በመነሳት ጉዞ ያደርጉ እንደነበር የታወቀ ሲሆን በአሁኑ ወቅት ግን ከጠቅላይ ሚንስትር ጽሕፈት ቤት ፈቃዱ በቀጥታ ማግኘት እንደሚኖርባቸው መመሪያ ተላልፏል።

ይህ መመሪያ በቅርቡ ፌደራል መንግሥቱ በሕወሓት ከፍተኛ አመራሮች ላይ መውሰድ በጀመረው እና ለአንድ ወር ያህል ጊዜ ባደረገው የሕግ ማስከበር እንቅስቃሴ የመጀመሪያ ቀናት ጀምሮ ተግባራዊ እንደሆነም ምንጮች ለአዲስ ማለዳ ገልጸዋል። ምንጮች እንደሚገልጹት ይህ ሰርኩላር ከወጣ ወዲህ ሚንስትሮች እና ዳይሬክተሮች በሚያደርጓቸው ጉዞዎች በጠቅላይ ሚንስትር ጽሕፈት ቤት እውቅና እንደሆነ ታውቋል።

ጉዳዩን በሚመለከት አዲስ ማለዳ ተጨማሪ ማብራሪያ ለማግኘት በተደጋሚ ወደ ጠቅላይ ሚንስትር የኮምኒኬሽን ክፍል የአጭር የጽሑፍ መልዕክት እና የኢሜል መልዕክት ምላሽ ሳያገኝ ቀርቷል።

ቅጽ 2 ቁጥር 110 ታህሳስ 3 2013

መልስ አስቀምጡ

Please enter your comment!
Please enter your name here