ነገረ አባይ

Views: 164

በያዝነው ሳምንት 124ተኛው የአድዋ ድል በድምቀት መከበሩ ከሳምንቱ ዐበይት ጉዳዮች አንዱ ነበር። በዓሉም በአገር አቀፍ ደረጃ የተከበረ ሲሆን፣ እኛም በአዲስ አበባ የተከበረው የዘንድሮው አድዋ ድል ከዚህ ቀደም እንደዚህ ተከብሮ አያውቅም እስኪባል ድረስ በድምቀት መከበሩን ታዝበናል።

በዚህ እለት ደግሞ ከሰሞኑን መነጋገሪያ ከሆነው የታላቁ ሕዳሴ ግድብ ግንባታ ጋር በተያያዘ፣ ብዙ ሐሳቦች የተነሱበት ነበር ማለት ይቻላል። ለዚህም ማሳያ ድሉ የተከበረበት ቀን ጨምሮ ከሕጻን እስከ አዋቂው በግደቡ ላይ ያለውን አመለካከት አንጸባርቆበታል።

እንደውም አንዳንድ ወጣቶች እንዲህ የሚል መፈክር ይዘው ወጥተው ነበር ‹‹ዋ በሏቸው! አለበለዚያ አድዋ እንደሚደገም ንገሯቸው! በአባይ አንደራደርም›› የሚል።
አንድ ታዳጊም የታላቁን የሕዳሴ ግድብ የሚያሳይ በእጅ የተሳለ ስዕል ይዞ አደባባይ ላይ በመውጣት፣ ለአሜሪካ መልዕክቱን አስተላልፏል ‹‹አሜሪካ ሆይ! እጅሽን ከግድቡ ላይ አንሺ›› ሲል በእንግሊዝኛ የተጻፈውን መልእክቱን አስተላልፏዋል። ይህ የብዙዎችን ቀልብ የሳበ ጉዳይ ሲሆን፣ በርካታ ሰዎች ፎቶ ሲነሱም ተመልክተናል። ሌሎች ሕጻናቶችም ግድቡ የእኔ ነው የሚል በወረቀት የተፃፈ ጽሑፍ ይዘውም ነበር።

ከኢትዮጵያው ውጭም የሕዳሴ ግድቡ ጉዳይ የብዙዎችን ትኩረት መሳብ ችሏል። ግብፅም ግራ የገባት ትመስላለች። የአሜሪካ መንግሥት የያዘው አቋም ሚዛናዊ እንዳልሆነ የአገሪቷ ምክር ቤቱ አባል ስቴቨን ሆርስፎርድ መሞገታቸውም ተሰምቷል።

እንደውም በኢትዮጵያ በኩል የግድቡ ግንባታ 71 በመቶ የደረሰ ሲሆን፣ ለማጠናቀቅ ከዚህ ቀደም የገቢ ማሰባሰቢያ ሲደረግባቸው ከነበሩት መንገዶች አንዱ እንደ አዲስ ተቀስቅሷል። ይህም የ8100 የገንዘብ ማሳባሰቢያ ሲሆን፣ በዚህ ሳምንት ነው በኢፌዴሪ ፕሬዝዳንት ሳህለወርቅ ዘውዴ አማካይነት ለስድስት ወራት የሚቆይ መርሃ ግብር ይፋ የሆነው።

በማኅበራዊ ሚዲያዎችም ‹‹ግድቡ የእኔ ነው›› የሚል ዘመቻ ተጀምሯል። ይህም ‹‹እኛ ኢትዮጵያውያን አንድ የሚያደርገን እና የሚያስተባብረን ችግር ሲመጣ ነው›› ብለው ሐሳብ ለሚያነሱ ሰዎች አንዱ ማሳያም ሊሆን እንደሚችል የሚያመላክት ነገር ነው ማለት ይቻላል።

ከሰሞኑን በማኅበራዊ ሚዲያ እንደ ከዚህ ቀደም ፖለቲካዊ ጉዳዮች ሲያነታርኩ ብዙም አልተስተዋሉም። ይልቁንም በብሔርም ይሁን በፖለቲካ አመለካከታቸው የሚለያዩ ሰዎችን ያስማማ ጉዳይ ነው – የታላቁ ሕዳሴ ግድብ ጉዳይ። ይህንን አስመልክቶም በማኅበራዊ ሚዲያ ከተመለከትናቸው ሐሳቦች ውስጥ ‹‹ዓባይ ያስተባብረናል እንጂ አይሰባብረንም›› የሚል ይገኝበታል።

እንዲሁም ‹‹የግድባችንን መሙላት የማስቆም ብቸኛ ሥልጣን ያለው፣ መንግሥትም ሆነ አገር፣ እንቦጭ ብቻ ነው።›› በማለትም ጣና በጠና መታመሙንም እንዳይዘነጋ ያስታወሱ አልጠፉም።

በዚሁ ሳምንት በጠቅላይ ሚኒስትር ጽሕፈት ቤት በተሰጠው ጋዜጣዊ መግለጫ ላይ፣ የአሜሪካው ፕሬዘዳንት ዶናልድ ትራምፕ በህዳሴ ግድብ ዙሪያ የሚደረገውን ድርድር በተያዘው ዓመት ለማጠናቀቅ ከሚፈልጓቸው ዋና ዋና ጉዳዮች መካከል እንደሆነ መግለጻቸውን እና ኢትዮጵያም በድርድሩ ላይ የታየውን መጣደፍ ባለመቀበል በስክነት ለማየት መምረጧንም አዲስ ማለዳ መዘገቧ ይታወሳል።

ቅጽ 2 ቁጥር 70 የካቲት 28 2012

Comments: 0

Your email address will not be published. Required fields are marked with *

This site is protected by wp-copyrightpro.com