55 ዓመት የሆናቸው የኢትዮጵያ ብሮድካስት ኮርፖሬሽን ሠራተኞች ያለፍላጎታችን ከሥራ ልንሰናበት ነው አሉ

0
1452

የኢትዮጵያ ብሮድካስት ኮርፖሬሽን (EBC) ከ55 ዓመት ዕድሜ በላይ የሆናቸው ሠራተኞች፣ ተቋሙ ከሥራ ሊያሠናብታቸው መሆኑን እንደነገራቸውና ይህም የሚሆነው ያለፍላጎታችን ነው በማለት፣ ያደረባቸውን ጥልቅ ቅሬታ ለአዲስ ማለዳ ገለጹ፡፡
ከሥራ ልንሠናበት ነው ሲሉ የተናገሩት ሠራተኞች ቁጥራቸው ከ200 በላይ መሆኑን ገልጸው፣ ከእነዚህ ውስጥ አንጋፋ ጋዜጠኞች፣ የካሜራ ባለሙያዎችና ቴክንሽያኖች፣ እንዲሁም ሌሎች የሙያ ባለቤቶች መኖራቸውን ተናግረዋል፡፡

በተቋሙ ሊደርስባቸው የሚችለውን ጫና በመፍራት ሥማችን እንዳይጠቀስ በማለት ቅሬታቸውን ለአዲስ ማለዳ ከገለጹ መካከል አንድ ሠራተኛ አንደሚሉት፣ ከ1985 ጀምሮ ተቋሙ በየጊዜው መዋቅር ያካሒዳል፤ በዚህም ብዙ ሠራተኞቹን ያጣል፡፡ በዚያው ወድቀው የሚቀሩ ሠራተኞችም አሉ የሚሉት ቅሬታ አቅራቢው፣ አሁንም ጥቅምት ወር 2014 ላይ በተደረገ አዲስ መዋቅር “ከዚህ በኋላ ተቋሙ በአዲስ ትውልድ መተካት አለበት” በማለት እኛ እንደምንቀነስ ነግረውናል ሲሉ ነው ያስረዱት፡፡

ተቋሙ ማሻሻያ በሚል አሠራር ሲታመስ የሚኖር መሆኑን የሚጠቅሱት ቅሬታ አቅራቢው፣ ይህም ተቋሙን ከመግደልና ሠራተኞችን ከመበደል በቀር ጠብ ያደረገው ነገር የለም ብለዋል፡፡

በዚህ ዓመት የተደረገውን ማሻሻያ አስመልክቶ በኢትዮጵያ ሆቴል በተዘጋጀ መርሃ ግብር ላይ ጠቅላይ ሚኒስትሩ ተገኝተው ቃል በቃል አንድም ሠራተኛ አይቀነስም ሲሉ ተናግረው ነበር፡፡ ሆኖም፣ የተቋሙ ሥራ አስፈጻሚ ሠራተኞችን በአዲስ ትውልድ እንተካለን በማለት ሕይወታችንን አደጋ ላይ ሊጥል ነው የሚል ቅሬታቸውን ገልጸዋል፡፡

በዕለቱ እንዲሁ ጠቅላይ ሚኒስትሩ ጅማ በር ባለው ሬዲዮ ግቢ ውስጥ ቤት ይሠራላችኋል ብለውን ኹላችንም በደስታ አጨብጭበን ነበር የሚሉት ቅሬታ አቅራቢው፣ ሆኖም ምንም ካለመደረጉም በላይ ተቋሙ ለሥራ በሚል ዘጠኝ ‹ፒክአፕ› መኪኖችን አዝዞ የገቡት ሰባቱ ብቻ ናቸው፤ የኹለቱ ዋጋ ዶላር ጨመረ በሚል ተዘርፏል፤ የገቡትም ለብዙ ጊዜ ቆመው ነው ያሉት ብለዋል፡፡ ይህ ኹሉ በሚደረግበት ተቋም የእኛ ከሥራ መሠናበት አግባብ አይደለም የሚል ቅሬታ እንዳሳደረባቸው አስተያየት ሰጪው አክለው ተናግረዋል፡፡

ማሻሻያ(Reform) በሚል ጨዋታው የተጀመረው በ1996 ነው የሚሉት የተቋሙ ሠራተኛ፣ በዚያን ወቅትም በርካታ ካድሬዎችን ከክልል በማምጣት የጋዜጠኝነትን ሥራ እንዲሠሩ በማድረግ ተቋሙ የመንግሥት ልሳን ብቻ እንዲሆን ተደርጎ ነበር፡፡

አሁንም ከኤኖቬሽንና ቴክኖሎጂ ሚኒስቴር 57 ሠዎችን በማምጣት ዋና አዘጋጅና አርታኢ በማድረግ እኛን ከሥራ ከማፈናቀል ባለፈ፣ ከበፊቱ ዘመን በከፋ ኹኔታ ተቋሙ እንዲዳከምና የአንድ ወገን ብቻ እንዲሆን እየተደረገ ነው በማለትም ቅሬታቸውን ጨምረዋል፡፡
ቅሬታ አቅራቢዎቹ፣ የጡረታ መውጫ ዕድሜ በምክር ቤት የተወሠነው 60 ዓመት ነው ካሉ በኋላ፣ እኛን ግን ከሕግና አሠራር ውጭ ጡረታ ስለምትወጡ ተዘጋጁ ተብለናል ሲሉ ተቋማቸው ላይ ቅሬታ አሠምተዋል፡፡

ሌላኛዋ ቅሬታ አቅራቢ እንደገለጹትም፣ የሕግ ክፍል ኃላፊውና የሠው ሃብት አስተዳደር ኃላፊው ከ20 ቀን ገደማ በፊት ከ55 ዓመት በላይ የሆናችሁ ጡረታ ልትወጡ ነው ብለው ነገሩን፤ በመዋቅሩም የማንሳተፍ ሲሆን፣ በእኛ የሥራ መደብ ሌላ ሠው እየተወዳደረበት ነው ብለዋል፡፡

ብድርና ብዙ ችግር ያለበት ሠራተኛ መኖሩን የሚያነሡት ቅሬታ አቅራቢዋ፣ “ተላላኪዎቸና ጽዳት ሠራተኞች ሲጨነቁ ስመለከት በጣም ነው የምጨነቀው፤ እኔስ የጡረታ ደሞዝ ይዤ ነው የምወጣው፤ እነሱን ሳይ ግን ተቋሙ በጣም ነው ያስጠላኝ፤ የሠራሁበትም አልመሰለኝም” በማለት አብራርተዋል፡፡

ከሥራ እንደምንሠናበት ከተነገረን ውጭ እስካሁን የተደረገ ነገር የለም ያሉት ቅሬታ አቅራቢዋ፣ በመዋቅሩ ውስጥ በሥራ መደብ የተመዘገቡት ግን ይሠረዛሉ ሲሉ አመላክተዋል፡፡

ሌላኛው የተቋሙ ሠራተኛ ነኝ ያሉ ቅሬታ አቅራቢ፣ “መዋቅር እየተሠራ ስለሆነ ከ55 ዓመት ዕድሜ በላይ የሆናችሁ በመዋቅሩ አትታቀፉም፣ ስለዚህም ጡረታችሁ እንዲመቻች እናደርጋለን” ብለውን ውሳኔያቸውን እየጠበቅን ነው ሲሉ ተናግረዋል፡፡
ለመለመን እንኳን ጊዜ ይሠጠን ብለው የጠየቁ ሠራተኞች አሉ ያሉት የመጀመሪያው ቅሬታ አቅራቢ፣ ለመደበኛ የጡረታ መውጫ ጊዜ እንደሚሠጠው ኹሉ፣ ለዝግጅት ስድስት ወር ይሠጣችኋል መባላቸውን አንስተዋል፡፡

ከዚህም በተጨማሪ፣ ቢሮውን ወደ ሸጎሌ ሲቀይር ተላላኪዎችን፣ ጽዳትና ጥበቃ ሠራተኞችን እንደማያስቀጥላቸውና አዲስ ሠራተኛ በኤጀንሲ ቀጥሬ ነው የማሠራው ሲል ተቋሙ መናገሩ ተመላክቷል፡፡

አዲስ ማለዳ የሠራተኞችን ቅሬታ መነሻ በማድረግ የኢትዮጵያ ብሮድካስት ኮርፖሬሸን ምክትል ዋና ሥራ አስፈጻሚ አብዱራህማን ሩቤን የጠየቀች ሲሆን፣ እርሳቸውም ተቋሙ እንደዚህ ዓይነት ዓላማ የለውም፣ የነበረበትን ችግር ፈትቶ የኢትዮጵያን መልክ ይዞ የኢትዮጵያን ሕዝብ እንዲያገለግል የሚያስችሉ ሠፊ ማሻሻያዎች እየተሠሩ ነው፡፡ ይህም ሠውን ለማባረር ማዕከል ያደረገ አይደለም ብለዋል፡፡

እስካሁን እኛ ጋር የመጣና ቅሬታ ያቀረበ አካል የለም ያሉት ምክትል ዋና ሥራ አስፈጻሚው፣ ማሻሻያ መዋቅሩ ሲያልቅ ማን የቱ ጋር ይወድቃል የሚለው ያኔ ነው የሚወሰነው ሲሉ ተናግረዋል፡፡

አክለውም፣ ሠው ወደፊት ይኼ ሊያጋጥመኝ ይችላል ብሎ ገምቶ ሊሆን ይችላል በማለት ገልጸዋል፡፡ ሆኖም ተላላኪዎች፣ ጽዳትና ጥበቃ ሠራተኞች ተቋሙ ቢሮውን ሲቀይር አይቀጥሉም በሚል የቀረበውን ቅሬታ አስመልክቶ ምላሽ እንዲሰጡ ቢጠየቁም፣ እንደ አሉባልታ ነው የምቆጥረው በማለት ስልካቸውን ዘግተዋል፡፡

አዲስ ማለዳ በተጨማሪም ቅሬታ አቅራቢዎች ከሥራ እንደምንሰናበት ሰብስቦ ነግሮናል ያሏቸውን የኢትዮጵያ ብሮድካስት ኮርፖሬሽን የሰው ሃብት አስተዳደር ኃላፊ ጥበበ ቦጋለን ያነጋገረች ሲሆን፣ እርሳቸውም “እኔ ምንም ያወኩት ነገር የለም፤ የደረሰኝ ነገርም የለም” ሲሉ መልስ ሠጥተዋል፡፡ እንደ ተቋም እንደዚህ የተባለ ነገር የለም ያሉት ኃላፊው፣ ተቋሙ ወደ ፊት ሠራተኞችን ለመቀነስ አስቧል ወይ በሚል ለቀረበላቸው ጥያቄ እኔ አላውቅም ምንም መረጃ የለኝም ብለዋል፡፡


ቅጽ 4 ቁጥር 175 መጋቢት 3 2014

መልስ አስቀምጡ

Please enter your comment!
Please enter your name here