የዛሬ ሦስት ዓመት የካቲት 27 ቀን 2011 ኹሉም የአዲስ አበባ ነዋሪ ዐይኑን ቴሌቪዥን መስኮት ላይ አፍጦ የ13ኛ ዙር 20/80 እና የኹለተኛ ዙር 40/60 የቤት ዕጣ አወጣጥ ይከታተል እንደነበር የሚታወስ ነው። በወቅቱ ወደ 18 ሺሕ የሚሆኑ የ40/60 እና ወደ 32 ሽሕ የሚሆኑ 20/ 80 ቤቶች፣ ለዓመታት ለቆጠቡ ተመዝጋቢዎች በዕጣ ወጥቶላቸው ነበር።
በጊዜው ዕጣ የወጣላቸው ዕድለኛች በየቤታቸው የነበረው የቤተሰብና ጓደኛ ደስታ፣ የእንኳን ደስ ያለህ/ያለሽ መልካም ምኞች ኹሉም የሚያስታውሰው ነው። ከዓመታት የቤት ኪራይ ነፃ የሚወጡበት፣ ከአከራይ ጋር ከሚፈጠር አለመግባት እፎይ የሚሉበት ዘመን መምጣቱን እያሰቡ ልባቸው በሐሴት ተሞልቶ የነበረ ቢሆንም፣ ይህ ምኞትና ደስታ ግን ረጅም ርቀት መሔድ አልቻለም።
በመጀመሪያ “ኮየ ፌጬን ማን ይነካታል?” የሚሉ ወገኖች በፈጠሩት ውዝግብ ደስታው መደብዘዝ የጀመረ ቢሆንም፣ በሒደት ደግሞ መንግሥት ለፕሮጀክቱ ትኩረት ነፍጎት በአጭር ጊዜ ቤታቸውን ተረክበው መኖር የናፈቁ ወገኖች ተስፋ እየቀጨጨ በመሔዱና ባልኖሩበት ቤት የባንክ ዕዳና ወለድ ጫና ተሸካሚዎች በመሆናቸው፣ ዕድል ሳይሆን ዕዳ እንደተጫነባቸው የሚቆጥሩ ዜጎች ሆነዋል።
ለዚህ ጽሑፍ መነሻ የሆነኝ በቅርቡ በአዲስ ማለዳ ጋዜጣ ‹‹የቤት ዕጣ የወጣላቸው ሰዎች በወቅቱ ባለመረከባችን የ500 ሺሕ ብር ጉዳት ደርሶብናል አሉ›› በሚል ስለ ቦሌ በሻሌ የኹለተኛ ዙር 40/60 የቤት ዕድለኞች የተሠራው ዜና ነው።
እኔም በዚሁ ‹ሳይት› (ቦሌ በሻሌ) ዕጣ/ዕዳ ከወጣላቸው አንዱ ነኝ። የዛሬ ሦስት ዓመት ዕጣው ሲወጣ የነበረኝ ደስታ አሁን የለም። ተስፋዬም ተሟጥጦ አልቋል። ቀድም ሲል ለቤት ኪራይ እና ለዕለት አስቤዛ ነበር የምጨነቀው። ዛሬ ግና በተጨማሪነት የእኔ ባልሆነ ጥፋት 12.5 በመቶ የባንክ የዕዳ ወለድ እየተጫነብኝ ያለሁ ሠው በመሆኔ ዕድሌን ማማረር ይዣለሁ። ልክ እንደ እኔ ሌሎችም ተመሳሳይ ገፈት ቀማሾች ዓመታትን አስቆጥረዋል።
ምንም እንኳን መንግሥት ‹‹የቤት ዕድለኞች ናችሁ ቢለንም››፣ በእኔ ዕምነት ግን አሁን ባለንበት ኹኔታ ባለዕዳዎች እንጂ ዕድለኞች ልንባል አይገባንም። ምክንያቱም ዕዳው በዜናው ላይ የተጠቀሰው ገንዘብ (ከ500 ሺሕ ብር በላይ) ብቻ ሳይሆን በርካታ ማኅበራዊ ቀውስም አስከትሎብናልና።
የቤት ዕጣ ሲደርሰው አርባ በመቶ ቅደመ ክፍያ ለመሙላት ከሚሠራበት ተቋም የተበደረ ሠው አለ፤ ከወዳጅ ዘመድ የተበደረ አለ። በአራጣም የተበደረ እንዳለ እናውቃለን። ነገር ግን፣ አሁን ቤቱ እጁ ላይ ባለመግባቱ የቤት ኪራይ፣ የባንክ ዕዳ፣ ከመሥሪያ ቤት/ከወዳጅ ዘመድና አራጣ አበዳሪ የተበደረው ዕዳ አናቱ ላይ እየጨፈሩበት ይገኛል። የወዳጅ ዘመድ ዕዳ መክፈል ያልቻለ ደግሞ ቃል ኣባይ የሆነ፣ ከዘመድ የተቆራረጠ አለ። የተበደረውን ባለመክፈሉ ‹‹ቀብሬ ላይ አትቁም›› ተብሎ በቤተዘመድ የተገለለም አለ። ከመሥሪያ ቤት የተበደረ ከደሞዙ ስለሚቆረጥበት ኑሮውን በአስማት በሚመስል መልኩ እየኖረ ይገኛል። አራጣ ተበዳሪውን ፈጣሪ ይሁነው እንጂ፣ ከዚህ በኋላ ቤቱን ቢረከብም የቤቱ ባለቤትነቱ እያከተመ ይገኛል። በእነዚህ ምክንያቶች ብቻ እኛ የቤት ዕደለኛ ናችሁ ከተባልን በእውኑ ከእኛ በፊት ዕጣ ወጥቶላቸው ቤታቸውን ተረክበው ቤታቸው ውስጥ እየኖሩ ያሉትን ምን ልትሏቸው ነው? በጭራሽ እኛ የቤት ባለዕዳ እንጂ ዕድለኛ ልንባል መንግሥት አልፈቀደልንም።
በሌላ በኩል፣ ውል ለመዋዋል 40 በመቶውን ለመሙላት መኪናን የመሳሰሉ ንብረቶችን ሽጠው የከፈሉና አሁን አወቶቢስና ታክሲ የሚጋፋ ሠዎች በርካታ ናቸው። በዚህ ኹሉ ግና መንግሥት ትከሻ ደንዳና ሆኖ ተመሳሳይና አንድ ዓይነት ምክንያት በመደርደር ቤቶቹን ከሦስት ዓመት በኋላ እንኳን አላስረከበንም። ይሄም ቀርቶ የባንክ ወለዱ እንዲቀርልን እንኳ አላደረገልንም።
የከተማ አስተዳደሩ ፍትሕ የሚያውቅና የሚሠጥ ቢሆን ኖሮ ሠው ተረክቦ ላልኖረበት ቤት የባንክ ወለድ መክፈል አይገባውም ነበር። ቤቶቹን በወቅቱ ገንብቶ በውሉ መሠረት ያላስረከበው የአዲስ አበባ ቤቶች ልማትና አስተዳደር ቢሮ ነበር ወለዱን መክፈል የነበረበት። ግን ፍትሕ ከየት ይምጣ? አሁንም አልረፈደምና አስተዳደሩ የ29 ወራት የባንክ ወለድ ላይ ፖለቲካዊ ውሳኔ መስጠት አለበት እላለሁ።
በተለይ የቦሌ በሻሌ(ፕሮጀክት 3) ሳይት አስተዳደሩ በግንባታ ከያዛቸው 13 ሳይቶች በአያሌው ወደ ኋላ የቀረ ነው። የዛሬ ሦስት ዓመት ዕጣው ሲወጣ ከነበረበት አፈጻጸም ዛሬም ድረስ እምብዛም እንቅስቃሴ አይታይበትም። የመንገድ ሥራው ዘንድሮ ነው የተጀመረው፤ ውኃና መብራት እንዲሁም የፍሳሽ ማስወገጃ ሥራው ገና ወረቀት ላይ ነው።
አሁንም ቢሆን ቀጠሮ መስጠት የማይሰለቸው እና 30 ቁጥርን በጣም የሚወደው የአዲስ አበባ ቤቶች ልማትና አስተዳደር ቢሮ (ታኅሣሥ 30፣ የካቲት 30፣ ሰኔ 30…. )እያለ ብዙ ሰላሳዎችን እየጠራ የካቲት 27 ቀን 2014 ዓ.ም ሦስት ዓመት ደፍኗል። የደስታ ሻማ ማብራት ሲገባን የሐዘን ሻማ ለማብራት አስገድዶናል። የሚሰማና ለሥራው ትኩረት የሚሠጥ አመራር ሲጠፋ መቼስ ምን ይደረግ?
በቦሌ በሻሌ ሳይት የደረሳቸው ሠዎች ግን አሁንም የገንዘብና የሞራል ጉዳት እየደረሳባቸው ነው። በአዲስ ማለዳ ከተጠቀሰው ገንዘብ በላይ አሁንም እየዘገየ እና የማጠናቀቂያ ዕቃዎች ዋጋ እየጨመረ በመሆኑ ቁጥሩ ከዚህ በላይ ነው። ለዚህ ለዚህ ሪልስቴት መግዛት ይሻለን ነበር።
ግን ግን፣ ከዚህ ሁሉ መጉላላትና ኪሳራ በኋላ መንግሥት ደጉሜያለሁ የሚል ሞራል ይኖረው ይሆን? ምንም እንኳ ወደ መንግሥት ካዝና ያልገባ ቢሆንም፣ የዋጋ ንረትና የግንባታ ዕቃዎች መወደድ የቤቶቹን የማደሻ ዋጋ ከፍተኛ እንዲሆኑ አድርጎብናል።
የቤት ዕድል ወይስ ዕዳ ነው የወጣልን? አንባቢ ይፍረደን!
ቅጽ 4 ቁጥር 175 መጋቢት 3 2014



