በዋናነት ከፈቃድ አሰጣጥ ጋር የተያያዙ 10 ልዩ ልዩ የመገናኛ ብዙኀን ረቂቅ መመሪያዎች እየተዘጋጁ መሆኑን የኢትዮጵያ መገናኛ ብዙኀን ባለሥልጣን ለአዲስ ማለዳ ገለጸ።
የኢትዮጵያ መገናኛ ብዙኀን ባለሥልጣን ምክትል ዳይሬክተር ግዛው ተስፋዬ፣ የመገናኛ ብዙኀን ዐዋጅ በአዲስ መልኩ ተሻሽሎ ጸድቆ ወደ ሥራ መግባቱን ተከትሎ፣ ዐዋጅን ተግባራዊ ለማድረግ ልዩ ልዩ መመሪያዎችን ማዘጋጀት እንደሚያስፈልግ በዐዋጁ ተደንግጓል ሲሉ ለአዲስ ማለዳ ተናግረዋል።
በመሆኑም፣ ይህን መነሻ በማድረግ የተለያዩ መመሪያዎች ዝግጅት እየተከናወነ እንደሚገኝ ነው የገለጹት። በዐዋጁ መሠረት እስከ 40 የሚደርሱ መመሪያዎችና አሠራሮች መዘረጋት እንዳለበት ተቀምጧል ያሉት ምክትል ዳይሬክተሩ፣ አሁን ላይ 10 መመሪያዎች በረቂቅ ደረጃ መዘጋጀታቸውን አሳውቀዋል።
አብዛኞቹ መመሪያዎች ከፈቃድ ጋር የተያያዙ መሆናቸውን ጠቁመው፣ አሠራሩን ግልጽና ተጠያቂነት የሰፈነበት ከማድረግ አንጻር የሚወጡ ናቸው ብለዋል።
በዚህም የሕዝብ መገናኛ ብዙኀን የፈቃድ መመሪያ፣ የንግድ መገናኛ ብዙኀን የፈቃድ መመሪያ፣ የማኅበረሰብ መገናኛ ብዙኀን የሚስተናገዱበት መመሪያ፣ የበይነ መረብ መገናኛ ብዙኀን የሚስተናገዱበት መመሪያ፣ የኃይማኖት መገናኛ ብዙኀን የሚስተናገዱበት ፈቃድ አሰጣጥ መመሪያና ሌሎችም በዐዋጁ በዝርዝር የተካተቱ መመሪያዎች መኖራቸውን አመላክተዋል።
የእነዚህ መመሪያዎች ዋና ዓላማ ዐዋጁን በማስፈጸም ረገድ ግልጽ አሠራር መዘርጋት መሆኑን የጠቀሱት ምክትል ዳይሬክተሩ፣ አሁን ላይ ከተዘጋጁት ዐስር ረቂቅ መመሪያዎች በተጨማሪ ሌሎች መመሪያዎችም ሊዘጋጁ እንደሚችሉ ጨምረው ገልጸዋል።
ከዚህ ቀድሞ የብሮድካስት አገልግሎት ዐዋጅ በነበረበት ወቅት ከፈቃድ አሰጣጥ ጋር የተያያዙ አራት የሚደርሱ የሕዝብ፣ የንግድ፣ የማኅበረሰብ እና የሰብስክሪፕሽን (የውጭ ይዘቶችን ተቀብሎ ማሰራጨት) መመሪያዎች የነበሩ ቢሆንም፣ ዐዋጁ ሲሻሻል ቁጥራቸው እንደጨመረ አብራርተዋል።
የኃይማኖት መገናኛ ብዙኀን ሲመጡ ፈቃድ እንዴት ይሰጣል የሚል መመሪያ ያስፈልጋል። በዚህም ከዐስሩ ረቂቅ መመሪያዎች ስድስቱ ለአዳዲስ አሠራሮች ተብሎ ለመጀመሪያ ጊዜ የተዘጋጁ ሲሆን፣ አራቱ ደግሞ ተሻሽለው የቀረቡ መሆኑን ነው ምክትል ዳይሬክተሩ በማብራሪያቸው ያመላከቱት።
ከመገናኛ ብዙኀን የመርሀ ግብር የይዘት መስፈርት፣ አሠራር፣ የቴክኖሎጂ መስፈርት (technology standard) ፣ እንዲሁም ከኤዲቶሪያል ጋር የተያያዙ መመሪያዎች እንዲወጡ ዐዋጁ ላይ መቀመጡንም ጠቅሰዋል።
ከተዘጋጁት ረቂቅ መመሪያዎች ውስጥ ‹‹በየጊዜው የሚወጣ የኅትመት መገናኛ ብዙኀን መመሪያ፣ የመገናኛ ብዙኀን ዘርፍ የሕዝብና የባለድርሻ አካላት ተሳትፎ ማረጋገጫ ሥርዓት መመሪያ፣ ልዩ የሕዝብ ሬዲዮ እና ቴሌቪዥን አገልግሎት መመሪያ›› የተሰኙት ይገኙበታል።
ለአብነትም “ልዩ የሕዝብ ሬዲዮ እና ቴሌቪዥን አገልግሎት መመሪያ”፣ የመመሪያውን የተፈጻሚነት ወሰን፣ መርሆዎች፣ የቦርድ አደረጃጀት ሥልጣንና ተግባር፣ ፈቃድ አሰጣጥ ሥነ ስርዓት፣ የባለፈቃዶችን መብትና ግዴታዎች፣ አስተዳደራዊና ሕጋዊ ዕርምጃዎችን ከልዩ ልዩ ድንጋጌዎች ጋር አካቶ የያዘ ነው።
በዚህ ወቅት በረቂቅ መመሪያዎች ዙሪያ ከሕዝብ ጋር ውይይት በማድረግ እንዲዳብሩ እንደሚደረግና በአሁኑ ወቅትም፣ ከተለያዩ አካላት ጋር በመሆን ለማስተዋወቅ ጥረት እየተደረገ እንደሚገኝ እና የሚሰጡ አስተያየቶችን በማካተት ለማዳበር እየተሞከረ መሆኑን ምክትል ዳይሬክተሩ አንስተዋል።
ሆኖም አስፈላጊው ሒደት ተጠናቆና በሚመለከተው አካል ጸድቀው፣ መመሪያዎች ሥራ ላይ እንዲውሉ ለማድረግ እስከ አንድ ወር ጊዜ ሊፈጅ እንደሚችል ነው የጠቆሙት።
የማስታወቂያ ገቢ ዕጦትና የመገናኛ ብዙኀኑ ሕልውና – Addis Maleda
መገናኛ ብዙኀን የቅድመ ምርጫ ትንበያ እንዲያዘጋጁ የሚፈቅድ መመሪያ ተዘጋጀ – Addis Maleda
ቅጽ 4 ቁጥር 176 መጋቢት 10 2014



