የብረታ ብረት አምራች ኢንዱስትሪዎች የምርት መጠን ከ20 ወደ 10 በመቶ ዝቅ ማለቱ ተገለጸ

0
1371

በኢትዮጵያ የሚገኙ ብርታ ብረት አምራች ኢንዱስትሪዎች የምርት መጠን ከ20 ወደ 10 በመቶ ዝቅ ማለቱን የብረታ ብረት ኢንዱስትሪ ልማት ኢንስቲትዩት ገለጸ።

የምርት መጠኑ ከ20 ወደ 10 በመቶና ከዛ በታች ዝቅ ማለቱን የብረታ ብረት ኢንዱስትሪ ልማት ኢንስቲትዩት የኮሚዩኒኬሽን ዳይሬክቶሬት ዳይሬክተር ፊጤ በቀለ ለአዲስ ማለዳ ገልጸዋል። የኮሚዩኒኬሽን ዳይሬክተሩ ምርቱን 20 በመቶ ማምረት ከፍተኛ ነበር ያሉ ሲሆን፣ አሁን ግን እየተመረተ ያለው ከ10 በመቶ በታች መሆኑን አስረድተዋል።

ብረታ ብረት ኢንዱስትሪ ልማት ኢንስቲትዩት በዓመት ከ11 ሚሊዮን ቶን በላይ የሚሆኑ ምርቶችን የማምረት አቅም ስላለው 385 ቢሊዮን ብር ማግኘት ይቻል ነበር ያሉት ፊጤ፣ አሁን ግን በግማሽ ዓመት እንኳ እየተመረተ ያለው 20 ቢሊዮን ብር የሚያስገኝ ምርት ብቻ ነው ብለዋል።

አያይዘውም፣ ዘርፉ ከፍተኛ የማምረት አቅም ቢኖረውም በዚህ ወቅት በጥሬ ዕቃ ዕጥረት ምክንያት፣ አንዳንዶቹ ምርት የሚያመርቱት ካላቸው የማምረት አቅም 10 በመቶ፣ አንዳንዶቹ አምስት በመቶ፣ አንዳንዶቹ ደግሞ አንድ ከመቶ በታች መሆኑን ለአዲስ ማለዳ ጠቁመዋል። ማምረት ያቆሙ ኢንዱስትሪዎች መኖራቸውን የጠቆሙት ዳይሬክተሩ፣ 20 በመቶ የሚያመርቱ ኢንዱስትሪዎች ቢኖሩም አብዛኛዎቹ የሚያመርቱት ግን ከ10 በመቶ በታች ነው ብለዋል። ችግሩ ከዚህ በፊት የነበረ ቢሆንም በሒደት በ2014 እየተባባሰ መምጣቱን ጠቁመዋል።

በቀን ኹለትና ሦሰት ፈረቃ ሲሠሩ የነበሩ አምራች ኢንዱስትሪዎች በቀን አንድ ጊዜ የሚያመርቱበት ኹኔታም አለ ተብሏል። አማካኙን ለመግለጽ ነው እንጅ ከአንድ በመቶ በታች የሚያመርቱ ኢንዱስትሪዎችም እንዳሉ በአካል ሒደው ማረጋገጣቸውንም ዳይሬክተሩ አብራርተዋል።

የምረት አቅምን ከፍ ማድረግ ቀርቶ በዝቅተኛ መጠን እንኳ ማምረት ያልቻሉና የተዘጉ ኢንዱስትሪዎችም መኖራቸውን ነው ከዳይሬክተሩ ገለጻ ማወቅ የተቻለው። ለምሳሌም “ቆርቆሮ የሚያመርቱ ኢንዱስትሪዎች እኮ በአሁኑ ወቅት ብዙዎቹ እያመረቱ አይደለም። ከሞባይል አምራቾችም፣ ከአውቶሞቲቭም በተመሳሳይ የማያመርቱ አሉ። ሥም መጥራት ግን ጥሩ አይደለም” በማለት ዳይሬክተሩ ተናግረዋል።

በወቅታዊው ገበያ የጥሬ ዕቃ ፍላጎትና የአቅርቦት መጠን አለመመጣጠኑ የዋጋ ንረትን ፈጥሯል ያሉት ፊጤ፣ ጥራት ያለው ቆርቆሮን በአገር ውስጥ የማምረት ዕምቅ አቅም እያለ በጥሬ ዕቃ ዕጥረት ምክንያት የቆርቆሮ ፈላጊዎች ብዛት ከፍተኛ ደረጃ የደረሰበት ኹኔታ ላይ ነው ያለው ብለዋል።

ጨምረውም፣ በዓመት 11 ሚሊዮን ቶን ወይም 385 ቢሊዮን ብር የሚያስገኝ ምርት ማምረት የሚያስችል አቅም ቢኖሩም፣ ይህን ያህል አቅም ተሸክሞ በግማሽ ዓመት 20 ሚሊዮን ብር ብቻ የሚያስገኝ ምርት ነው ማምረት የተቻለው ብለዋል። ይህ የምርት መጠንም ዝቅተኛ በመሆኑ እየተሠራ ያለው በትንሽ አቅም መሆኑን ያሳያል ሲሉ ተናግረዋል።

እንደ አገር የኤሌክትሮኒክስ ዕቃዎችን፣ የሞባይል ስልኮችን፣ ተሸከርካሪዎችን (ወደ ምሥራቅ አፍሪካ) እንዲሁም፣ ሌሎች የኢንጂነሪንግና ከብር ጋር ተያያዥነት ያላቸው የጌጣጌጥ ምርቶችን ወደ ውጭ እንደሚልኩ ተናግረው፣ ከውጭ የሚገቡትን ጥሬ ዕቃዎች ችግር ከመቅረፍ አኳያ ግን ከአቅም በታች እየተሠራ መሆኑንም ገልጸዋል።

በሌላ በኩል፣ የብረታ ብረት ኢንዱስትሪው እንደማንኛውም ሸቀጥ ኮንትሮባንድ በጣም የሚፈትነው ችግር መሆኑን ያመላከቱት ዳይሬክተሩ፣ እስከአሁን ባለው ጥናት መሠረት በተለይም ከ60 በመቶ በላይ የሚሆኑት ለገበያ የሚቀርቡ የኤሌክትሮኒክስ ጥሬ ዕቃዎች ወደ አገር ውስጥ የሚገቡት በኮንትሮባንድ መልክ ነው ተብሏል። ይህ መንግሥትን፣ ሕዝብንና አገርን ነጋዴንም የሚጎዳ እንደሆነ የሚገልጹት ዳይሬክተሩ፣ ችግሩን ለማስወገድም ከተለያዩ የመንግሥት አካላት ጋር እየተሠራ መሆኑን ጠቁመዋል።

የብረታ ብረት ኢንድስትሪ ልማት ኢንስቲትዩት ብዙ ሴክተሮችን የሚነካካ ትልቅ ሴክተር በመሆኑ፣ ያለዚህ ሴክትር በአገር ደረጃ ዕድገትና ለውጥ ማምጣት አይቻልም ያሉት ፊጤ፣ ባለድርሻ አካላትም በዚህ ላይ ድጋፋቸውንና የድርሻቸውን ማበርከት አለባቸው ብለዋል።

የብረታ ብረት ኢንዱስትሪ ልማት ኢንስቲትዩት ለኮንስትራክሽ፣ ለተሸከርካሪ፣ ለኤሌክትሮኒክስ፣ እንዲሁም ለማሽን (ለግብርና ሥራዎች) ግብዓቶችን የሚያቀርቡ አራት ዋና ዋና ዘርፎች ያሉት ሲሆን፣ አነስተኛና ጥቃቅኖቹን ጨምሮ ከ600 በላይ ኢንዱስትሪዎችን አቅፎ የያዘ ተቋም ነው።


ቅጽ 4 ቁጥር 177 መጋቢት 17 2014

መልስ አስቀምጡ

Please enter your comment!
Please enter your name here