ከተለያየ የዓለም ክፍል የተወጣጡ እና በተባበሩት መንግሥታት መሪነት አዲስ አበባ ላይ ውይይት እያደረጉ የሚገኙት ዓለም አቀፍ የንግድ ልዑክ በኢትዮጵያ የአፍሪካ አርቴፊሻል ኢንተለጀንስ (Artificial Intelligence) ማዕከል ለመገንባት ዕቅድ እንዳለው አስታውቋል።
ልዑካኑ ዛሬ ነሐሴ 30/2011 የኢኖቬሽንና ቴክኖሎጂ ሚኒስቴርን የጎበኙ ሲሆን ከሚንስትር ዲኤታ ሲሳይ ቶላ ጋርም ተወያይተዋል። አርቴፊሻል ኢንተለጀንስ በሕክምናው ዘርፍ ብሎም ወደ ሌሎች ዘርፎች ተግባራዊ እንደሚደረግም ውይይት ተካሒዶበታል።
በውይይታቸው ወቅትም ከማዕከሉ ግንባታ ባሻገር በኢትዮጵያ ውስጥ የሕክምና መሳሪያዎችንና መድኃኒቶችን ለማምረትም ተጨማሪ ዕቅድ እንዳላቸው ተናግረዋል። ሚንስትር ዲኤታውም ልዑካኑ በኢትዮጵያ ውስጥ በሚያደርጉት የትኛውንም ዓይነት ኢንቨስትመንት መንግሥት ድጋፍ እንደሚያደርግላቸው ቃል ገብተዋል።



