የሲአን አመራሮች ምርጫ ቦርድ አንድ ዓመት ለጥያቄያችን መልስ አልሰጠንም አሉ

0
294

ለኹለት የተከፈሉት የሲአን አመራሮች ችግራችንን ለምርጫ ቦርድ ካቀረብን አንድ ዓመት ቢሆነንም መፍትሔ ሊሰጠን አልቻለም ሲሉ ለአዲስ ማለዳ አስታወቁ።
በሚሊዮን ቱማቶ (ዶ/ር) የሚመራው ቡድን የሲአን ሕጋዊ አመራር መሆኑን በመግለጽ የንቅናቄውን የማዕከላዊ ኮሚቴ መደበኛ ስብሰባ ነሐሴ 20/2011 ማካሔዱን ቢያስታውቅም፣ የተካሔደው ስብሰባ ዕውቅና የሌለው ነው በማለት ያወገዘው በዱካሌ ላሚሶ የሚመራው ቡድን በበኩሉ፣ ማዕከላዊ ኮሚቴውን ያካሔዱት አመራሮች በከባድ የሥነ ምግባር ጉድለት ያሰናበትናቸው በመሆናቸው ተቀባይነት የሌለው ሲሉ ስብሰባውን ተቃውመውታል። ይህንንም ተከትሎ ኹለቱም በየጎራቸው ደረሰብኝ የሚሉትን አቤቱታ ለምርጫ ቦርድ አስገብተው ነበር።

የኢትዮጵያ ብሔራዊ ምርጫ ቦርድ በበኩሉ ከኹለቱም ወገኖች የአቤቱታ ማመልከቻ እንደደረሰው በማረጋገጥ፣ በቅርቡ ጉዳዩን በመመርመር ለቦርድ ማቅረቡን አስታውቋል።

አዲስ ማለዳ በጉዳዩ ዙሪያ ያነጋገረቻቸው የሲአን የድርጅት ጉዳይ ኀላፊና ዋና ጸሐፊ ለገሰ ላንቃሞ፣ በሚሊዮን የተመራው ስብሰባ ሕገወጥ መሆኑን ገልጸዋል። በፓርቲው 104 የማዕከላዊ ኮሚቴ አባላት ባሉበት ሁኔታ 35 ሰዎች ተሰብስበው የማዕከላዊ ኮሚቴ ስብሰባ ተደርጓል ተብሎ መነገሩ የንቅናቄውን ሕግ የጣሰ መሆኑን አስታውቀዋል። አንድ ስብሰባ ተቀባይነት የሚኖረው 50 ሲደመር አንድ ሰው ተሰብስቦ ውሳኔ ሲያሳልፍ መሆኑንም ጠቅሰዋል።

እነሚሊዮን በበኩላቸው፣ ሕጋዊ በመሆናችን ስብሰባውን አካሒደናል፤ ሌሎቹ ንቅናቄውን አይወክሉም፤ ስብሰባውንም ያደረግነው ሕጉን ማዕከል አድርገን ነው ሲሉ ተደምጠዋል። ሰኞ፣ ነሐሴ 20 በጠራው ስብሰባም ለመጭው ብሔራዊ ምርጫ ዝግጅት እያደረገ መሆኑን አስታውቋል።

በነሚሊዮን ቶማቶ የሚመራው ቡድን በፓርቲው ማዕከላዊ ኮሚቴ በተደረገ ምርጫ ተሸንፈው የወጡ መሆናቸውን የሚናገሩት ለገሰ “ሽንፈታቸውን አውቀው መቀመጥ ይገባቸው ነበር” በማለት መናገራቸውን አዲስ ማለዳ በነሐሴ 25፣ ቅጽ 1 ቁጥር 43/2011 ዕትሟ መዘገቧ ይታወሳል።

የኢትዮጵያ ብሔራዊ ምርጫ የኮሚዩኒኬሽን ጉዳዮች አማካሪ ሶልያና ሽመልስ ለአዲስ ማለዳ እንደገለጹት፣ ቦርዱ ከኹለቱም ወገኖች የአቤቱታ ማመልከቻ እንደደረሰው አስታውቀው፣ በቅርቡ ጉዳዩን መተዳደሪያ ደንባቸውን በመመርመር ውሳኔ እንዲሰጥበት ለቦርዱ መቅረቡን ተናግረዋል። እንዲህ ዓይነት ጥያቄዎች የሲአን ብቻ አለመሆናቸውን ያወሱት ሶልያና፣ በርካታ የፖለቲካ ፓርቲዎች በውስጣቸው በሚነሱ አለመግባባቶች ሳቢያ ማኅተሜን፣ ሰነዴን፣ ቁልፌን ወሰደ የሚሉ አቤቱታዎች ይዘው እንደሚቀርቡ ተናግረዋል።

የሲዳማ ክልልን ጥያቄ ከፊት ሆኖ የሚመራው በወልደ አማኑኤል ዱባለ የተመሰረተው እና እስከ ዕለተ ሞታቸው በእሳቸው ሲመራ የነበረው የሲዳማ አርነት ንቅናቄ (ሲአን) በመባል የሚታወቀው ፓርቲ ነው። ይህ ፓርቲ እነ ኦነግ፣ ሕወሓት እና የመሳሰሉት ዘውግ ተኮር ፓርቲዎችን መመስረት ተከትሎ በደርግ ዘመን የተመሰረተ ማርኪሲስት ሌኒኒስት ፓርቲ ነው።

ቅጽ 1 ቁጥር 47 መስከረም 17 2012

መልስ አስቀምጡ

Please enter your comment!
Please enter your name here