በኮሮና ቫይረስ (COVID 19) ምክንያት ፌዴራል ፍርድ ቤቶች በከፊል ዝግ ሆነው የሚቆይቡት ጊዜ ተራዘመ

0
1280

የፌዴራል ጠቅላይ ፍርድ ቤት የኮሮና ቫይረስ (COVID 19) ስርጭትን ለመከላከል ቀጣይ የጥንቃቄ እርምጃዎችን መውሰድ በማስፈለጉ ፍርድ ቤቶች በከፊል ዝግ ሆነው የቆዩበትን ጊዜ ለተጨማሪ 22 የስራ ቀናት አራዝሟል፡፡

የፌዴራል ፍርድ ቤቶች ከመጋቢት 10 /2012 ዓ.ም ጀምሮ እስከ ሚያዚያ 30 ቀን 2012 ዓ.ም ድረስ በከፊል ዝግ ሆነው አፋጣኝ የፍርድ ቤት ውሳኔና ትእዛዝ የሚፈልጉ ገዳዮችን በተረኛ ችሎቶች በማስተናገድ አገልግሎት እንዲሰጡ መወሰኑ ይታወቃል፡፡

በዚህም ጊዜ የፌዴራል ዳኞች በየምድብ ችሎቱ በተደራጁ ተረኛ ችሎቶች እየሰሩ ቆይተዋል፡፡ በቤትና በቢሮ ለውሳኔ፤ ለብይንና ለትዕዛዝ የተቀጠሩ መዛግብትን በማቃለል ከፍተኛ ውጤት በማስገኘት ላይም ናቸው፡፡ በተጨማሪም የተረኛ ዳኞችን ቁጥር በመጨመር ከአስቸኳይ ጊዜ አዋጁ ጋር ተያይዞ የሚቀርቡላቸውን ጉዳዮች በመስራት ላይ ሲሆኑ በተሰጡ ውሳኔዎች ላይ የሚቀርቡ የይግባኝ አቤቱታዎችም በየደረጃው ባሉ ፍርድ ቤቶች በመታየት ላይ መሆናቸውን ከፌደራሉ ጠቅላይ ፍርድ ቤት ኮሚዩኒኬሽን ጉዳዮች ዳይሬክቶሬት ቢሮ ካገኘነው መረጃ ለማወቅ ተችሏል፡፡

ስለዚህም ከግንቦት 3/2012 ዓ.ም ጀምሮ እስከ  ወሩ መጨረሻ ግንቦት 30/2012 ዓ.ም ድረስ በተጨማሪ ለሶስተኛ ዙር በከፊል ዝግ ሆነው እንዲቆዩ መወሰኑ ታውቋል፡፡

በነዚህ ጊዜያትም በየፍርድ ቤቱ ለምርመራ እና ለውሳኔ የተቀጠሩ ውዝፍ መዛግብት ተለይተውና እንደየሁኔታው ታይተው እልባት ይሰጣቸዋል፤ ውዝፍ መዛግብት የሌለባቸው ችሎቶችም ውዝፍ መዛግብት ያለባቸውን ችሎቶች እንዲያግዙ ይደረጋል፡፡

በማረሚያ ቤት ያሉ ባለጉዳዮችን በተመለከተም ከማረሚያ ቤት አስተዳዳሪዎች ጋር በመወያየትና መርሃ ግብር በማዘጋጀት በቪዲዮ ኮንፈረንስ አገልግሎት ለመስጠት ጥረት እንደሚደረግም ተገልፆል፡፡

ፍርድ ለተሰጠባቸው ጉዳዮች በቂ የውሳኔ ግልባጮች ከወዲሁ ተዘጋጅተው ባለጉዳዮችን እንዲጠብቁ ይደረጋል ተብሏል፡፡

ባለጉዳዮች በአካል ፍርድ ቤት ቀርበው በመደበኛው አካሄድ የመሰማት እድል ሊሰጣቸው የሚያስፈልጉ ጉዳዮች ሲያጋጥሙ በሪጅስትራር ተለይተውና የሚመለከተውን አካል በማስፈቀድ ተግባራዊ የሚደረግም ቢሮው አስታውቋል፡፡

በተጨማሪም አስቸኳይ ጊዜ አዋጁን ለማስፈጸም ተግባራዊ እየተደረጉ ካሉ መመሪያዎች ጋር በተያያዘ የሚቀርቡ ጉዳዮች በአፋጣኝ እልባት ማግኘት የሚገባቸው በመሆኑ አስፈላጊ ሆኖ ሲገኝ በተረኛ ችሎቶች የዳኞች ቁጥር እንዲጨምር ይደረጋል፡፡ ከእነዚህ ጉዳዮች ጋር በተያያዘ የሚቀርቡ የይግባኝ አቤቱታዎችም በአፋጣኝ ታይተው እልባት የሚሰጣቸው እንደሚሆን ለማወቅ ተችሏል፡፡

ጠቅላይ ፍርድ ቤቱ በሰጠው የስራ አቅጣጫ እጅግ አስገዳጅ አገራዊና ኢኮኖሚያዊ እንድምታ ያላቸው አስቸኳይ መፍትሄ ለሚፈልጉ ብርቱ ጉዳዮች እንደ ሁኔታው በየደረጃው የሚገኙ የፍ/ቤት አመራሮች እና የጉዳዮች ፍሰት አስተዳደር ኃላፊዎች ፈጣን ምላሽ እንዲሰጡ አሳስቧል፡፡ እንዲህ ያሉ ጉዳዮች መታየት ሲኖርባቸውም ከሚኒስትሮች P COVID Task Force አስፈላጊው ፈቃድ እንደሚጠየቅም ተገልጿል፡፡

በተመሳሳይ ወደ ፍርድ ቤት በአካል የሚመጣ ማንኛውም ሰው የአፍና የአፍንጫ መሸፈኛ ጭንብል (Mask) ማድረግ ግዴታ መሆኑን፤ እጅን በተዘጋጀ ንጽህና መጠበቂያ ውሃና ሳሙና መታጠብ እንዳለበት እንዲሁም በባለሙያዎች እና በተገልጋዮች መካከል፤ በአገልግሎት ሰጪ እና አገልግሎት ተቀባይ መካከል ያለውን አካላዊ ርቀት መጠበቅ እንደሚገባም ፍርድ ቤቱ ባሳለፈው ውሳኔ ጨምሮ ማሳሰቡንም የፌደራሉ ጠቅላይ ፍርድ ቤት ኮሚዩኒኬሽን ጉዳዮች ዳይሬክቶሬት ቢሮ አስታውቋል፡፡

መልስ አስቀምጡ

Please enter your comment!
Please enter your name here