የብሔራዊ ሎተሪ ዓመታዊ ትርፍ ከ40 ሚሊዮን ብር በላይ ቀነሰ

0
1096

የብሔራዊ ሎተሪ አስተዳደር በ2012 በጀት ዓመት ትርፍ ከቀዳሚው ዓመት ተመሳሳይ ወቅት ጋር ሲነጻጸር ከ40 ሚሊዮን ብር በላይ ቅናሽ ማሳየቱ ተገለጸ።
ኮቪድ-19 ወረርሽኝ በመከሰቱ ምክንያት በ2012 ዘጠኝ ወራት ከነበረው የ104 በመቶ አፈጻጸም ኮቪድ-19 በተከሰተባቸው ወራት ውስጥ ከፍተኛ ቅናሽ እያሳየ በመምጣት በቀሪ ጊዜያት በ14 በመቶ መቀነሱን አስተዳደሩ አስታውቋል።

በ2012 በጀት ዓመት ዘጠኝ ወራት ውስጥ አስተዳደሩ ያገኘው 139 ሚሊዮን ብር የተጣራ ትርፍ፣ ኮቪድ-19 ከተከሰተ ወዲህ ባሉት ሦስት ወራት ማግኘት የቻለው ገቢ ከ4 ሚሊዮን ብር ማለፍ አልቻለም። አስተዳደሩ ባለፉት ዘጠኝ ወራት በነበረው አፈጻጸም በአማካይ በወር ከ15 ሚሊዮን ብር በላይ ያገኝ የነበረው የተጣራ ትርፍ፣ በሦስት ወራት ውስጥ ማግኘት ከሚችለው ከ45 ሚሊዮን ብር፣ ማሳካት የቻለው ከ4 ሚሊዮን ማለፍ ሳይችል መቅረቱም ታውቋል።

አስተዳደሩ በ2011 አጠቃላይ በጀት ዓመት 185 ሚሊዮን ብር የተጣራ ትርፍ ማግኘት መቻሉን ያስታወሱት የአስተዳደሩ የሕዝብ ግንኙነት ዳይሬክተር ቴዎድሮስ ንዋይ ናቸው። አስተዳደሩ በ2012 አጠቃላይ በጀት ዓመት ማሳካት የሚችለው በ11 ወራት ውስጥ ከተመዘገበው ሊዘል እንደማይችልም ለአዲስ ማለዳ ጠቁመዋል። ይህም ከባለፈው ዓመት ከ40 ሚሊዮን ብር በላይ ጉድለት እንዳለው ያመላክታል።

በሌላ በኩል አስተዳደሩ ከዚህ በፊት ለሦስት ዓመታት ሲያከናውን የነበረውን የ10 ሚሊዮን ብር አንደኛ የእንቁጣጣሽ ሎተሪ እጣ፣ በ2013 በጀት ዓመት የእንቁጣጣሽ ሎተሪ አንደኛ እጣ ወደ 20 ሚሊዮን ብር ከፍ በማድረግ ገበያ ላይ ማዋሉን ቴዎድሮስ ተናግረዋል።

አስተዳደሩ በዘጠኝ ወራት እቅዱን 104 በመቶ በማሳካት 139 ሚሊዮን ብር የተጣራ ትርፍ ማግኘት ችሎ የነበረ ቢሆንም፣ ባለፉት ሦስት ወራት ከእቅዱ በላይ ማሳካት የሚችልበት እድል እያለ፣ በኮቪድ-19 ምክንያት ከፍተኛ ተጽዕኖ እንዳደረበት ቴዎድሮስ ጠቅሰዋል። አስተዳደሩ ባለፉት 11 ወራት 15 ዓይነት የሎተሪ እጣዎችን ለገብያ በማቅረብ፣ ባለፉት 11 ወራት ማግኘት የቻለው የተጣራ ትርፍ 143 ሚሊዮን ብር ብቻ መሆኑንም ገልጸዋል።

ይህም ካለፈው ዓመት ተመሳሳይ ወራት ጋር ሲነፃፀር የ37 ሚሊዮን ብር ልዩነት አንዳለው ዳይሬክተሩ አስታውሰዋል።
ባለፉት ዘጠኝ ወራት አስተዳደሩ እየተንቀሳቀሰበት የነበረውን አፈጻጸም፣ ኮቪድ-19 በተከሰተባቸው ሶስት ወራት መድግም ያልተቻለው አስተዳደሩ ዋነኛ የሽያጭ ሥራ የሚሠራው በሎተሪ አዟሪዎች በጎዳናዎችና በተለያዩ ቦታዎች ለደንበኞች በማድረስ ሲሆን፣ ባለፉት ሦስት ወራት ኅብረተሰቡ እንቅስቃሴው ስለተገደበ የሽያጭ ሥራውን በከፍተኛ ደረጃ እንደቀነሰው ቴዎድሮስ ይናገራሉ።
እንደ ቴዎድሮስ ገለጻ አስተዳደሩ ከሚሸጣቸው ሎተሪዎች በኮቪድ-19 ከፍተኛ ጉድለት የታየበት የትንሳኤ ሎተሪ እንደነበር አስታውሰዋል። አስተዳደሩ ተጽዕኖውን ለማቃለል ሚያዚያ 10/2012 ይወጣ የነበረውን የትንሳኤ ሎተሪ ወደ ግንቦት 6/2012 በማራዘም የእቅዱን 70 በመቶ ማሳካቱን ጠቁመዋል። በተጨማሪም አስተዳደሩ ተጽዕኖውን የተቋቋመው ትልልቅ ወጭዎችን በመቀነስ መሆኑን ቴዎድሮስ አመላክተዋል።

አስተዳደሩ ወደፊት የሎተሪ ሽያጭ ሥራውን የተቀላጠፈ እና ውጤታማ ለማድረግ፣ የሎተሪ እጣዎችን ለረዥም ጊዜ ገብያ ላይ በማዋል አሰራሩን ለማሻሻል እየሠራ መሆኑ ተጠቁሟል። የረዥም ጊዜ ገበያ ስርዓቱን በኦንላይን ሎተሪ እና በሞባይል መልዕክት(SMS) ሎተሪ ሽያጩን ለማከናወን መታቀዱን ቴዎድሮስ ጠቅሰዋል።

የሞባይል አጭር የጽሑፍ መልዕክት ሎተሪ ሽያጭ ስርዓት ዝርጋታ ቀደም ብሎ እንደተጀመረ እና አሁን ላይ ቅድመ ሥራዎች ተጠናቀው፣ የማስታወቂያ ሥራ ብቻ እንደቀረው ተመላክቷል። የኦንላይን ሎተሪ የሽያጭ ስርዓት ለመዘርጋት የተሻለ አቅምና ቴክኖሎጂ ስለሚጠይቅ ገና በእቅድ ላይ መሆኑንም ዳይሬክተሩ አመላክተዋል።

ቅጽ 2 ቁጥር 89 ሐምሌ 11 2012

መልስ አስቀምጡ

Please enter your comment!
Please enter your name here