ኤርትራ በመጪው የካቲት ወር አምስት ሺሕ የሚሆኑ ወታደሮቿን ወደ ሶማሊያ ልትልክ ነው መባሉን አስተባበለች።
እንደ ኢንዲያን ኦሽን ጋዜጣ ዘገባ አገሪቱ ወታደሮቿን የምትልከው በሶማሊያ ለሚገኘው የአፍሪካ የሠላም አስከባሪ (አሚሶም) እርዳታ ነው።
ዘገባው ስሕተት መሆኑን በይፋዊ የማኅበራዊ ገጹ የገለጸው የኤርትራ ማስታወቂያ ሚኒስቴር ‹‹ውሸት ነው›› ሲል አስተባብሎታል። በዘገባው ላይ ባስቸካይ እርማት እንዲወሰድም ሚንስቴሩ ጋዜጣውን ጠይቋል።
በሶማሊያ ኢትዮጵያን ጨምሮ የተለያዩ የአፍሪካ አገራት ወታደሮቻቸውን ወደ አገሪቱ በመላክ የሠላም ማስከበር ሥራዎችን እየሠሩና ጽንፈኛው የሽብር ቡድን አልሸባብ እያዳከሙት እንደሆነ ይነገራል። በዚህኛው የሠላም ማስከበር ተልዕኮም ብዙ ወታደሮችን ካዋጡ አገራት ኢትዮጵያ አንዷ ናት።
ባለፈው ዓመት የአፍሪካ ኅብረት በሶማሊያ የሚገኘው አልሸባብ እየተዳከመ መምጣቱንና ሱማሊያ በራሷ አቅም ጸጥታዋን ማስከበር የምትችልበት አቋም ላይ እንድትደርስ ለማብቃት በሚል አገራት በስፍራው ያሰማሯቸውን የወታደሮች ቁጥር እንዲቀንሱ የሚል እቅድ ማውጣቱም ይታወሳል።
ቅጽ 1 ቁጥር 7 ታኅሣሥ 20 ቀን 2011



