የኢትዮጵያ መድኃኒት አቅራቢ ኤጀንሲ 2.6 ቢሊዮን ብር የሚገመት ንብረት ወድሞብኛል አለ

0
1534

የኢትዮጵያ መድኃኒት አቅራቢ ኤጀንሲ በደሴ ከተማ በሚገኘው ቅርንጫፍ ቢሮው ውስጥ 2.6 ቢሊዮን ብር የሚገመት የሕክምና ቁሳቁስ እንደወደመበት ለአዲስ ማለዳ ገለጸ::
አዲስ ማለዳ ከመድኃኒት አቅራቢ ኤጀንሲው የደረሳት መረጃ እንደሚያመላክተው፣ በሕዝብ ተወካዮች ምክር ቤት በሽብርተኛነት የተፈረጀው የሕወሓት ቡድን፣ በደሴ ከተማ የሕክምና አገልግሎት ሲሰጥበት በነበረው የኤጀንሲው ቅርንጫፍ ቢሮ ውስጥ የነበሩ በርካታ መድኃኒቶችንና ልዩ ልዩ ቁሳቁሶችን እንዳወደመ ነው መረዳት የተቻለው።

በደሴ ከተማ በሚገኘው የኤጀንሲው ቅርንጫፍ በርካታ ቁሳቁሶችና መድኃኒቶች በሕወሓት ቡድን መውደማቸውንና መዘረፋቸውን የኢትዮጵያ መድኃኒት አቅራቢ ኤጀንሲ የሕዝብ ግንኙነትና የኮሚዩኒኬሽን ጉዳዮች ዳይሬክተር አወል ሐሰን ለአዲስ ማለዳ ገልጸዋል።
በርካታ የኤጀንሲው ንብረቶችና መድኃኒቶች በታጣቂ ቡድኑ መዘረፋቸውን አረጋግጫለሁ የሚሉት ዳይሬክተሩ፣ የንብረቶቹ ዋጋ በብር ሲተመን 2.6 ቢሊዮን ብር የሚገመት ነው ሲሉ ለአዲስ ማለዳ ተናግረዋል።

ታጣቂ ቡድኑ የደሴን ከተማ ተቆጣጥሮ በነበረበት ወቅት ቁጥራቸው በውል ያልታወቀ በርካታ የሕክምና መድኃኒቶችን፣ እንዲሁም ቁሳቁሶችን መዝረፉንና ማውደሙን የጠቆሙት አወል፣ ይህ ውድመት ቀላል የማይባል የኢኮኖሚ ቀውስ እንደሚያስከትል ነው ያመላከቱት።
አያይዘውም፣ የመድኃኒቶቹን ቁጥር በውል ማወቅ ባይቻልም በዋናነት የጤና ፕሮግራም መድኃኒቶችና የመደበኛ መድኃኒቶች ወድመዋል ያሉ ሲሆን፣ የጤና ፕሮግራም መድኃኒቶች የሚባሉት ለኤች አይ ቪ ኤድስ በሽተኞች፣ ለእናቶችና ለተመሳሳይ በሽታዎች የሚሰጡ መድኃኒቶችን የሚያካትት መሆኑን አብራርተዋል።

የህወሓት ታጣቂ ቡድን መውሰድ የሚችለውን ዘርፏል፣ ሌሎቹን ንብረቶች ደግሞ አውድሟል የሚሉት አወል፣ የእናቶችና የሕፃናት የክትባት መድኃኒት ማቀዝቀዣ መጋዘን፣ እንዲሁም ሌሎች ቁሳቁሶች ከጥቅም ውጭ መሆናቸውን አረጋግጫለሁ ነው ያሉት።
ከዚህም በተጨማሪ፣ በቅርንጫፉ የነበሩ ኮምፒውተሮች በሙሉ ተዘርፈዋል ሲሉ ለአዲስ ማለዳ ተናግረዋል።

ከወደሙት ንብረቶች ውስጥ አንዳንዶቹ በቀላሉ ሊተኩ የሚችሉ፣ አንዳንዶቹ ደግሞ በቀላሉ ሊተኩ የማይቻሉ ናቸው የሚሉት አወል፣ ከወደሙት መድኃኒቶች በተጨማሪ፣ የደኅንነት መቆጣጠሪያዎች፣ የቢሮ መሣሪያዎች፣ ዋናው መጋዘን፣ እና የዕቃ ማንሻ መኪኖች (ፎርክሊፍቶች) መውደማቸውንም ጨምረው ገልጸዋል።

ታጣቂ ቡድኑ በተቆጣጠራቸው አካባቢዎች የሚኖሩ ዜጎች የመድኃኒት ዕጥረት እንዳጋጠማቸው ሲገልጹ መቆየታቸው የሚታወቅ ነው። ይህን በተመለከተም ከታጣቂ ቡድኑ ነጻ በወጡ አካባቢዎች ላሉ መድኃኒት ፈላጊዎች ኤጀንሲው ምን እንዳሰበ አዲስ ማለዳ የጠየቀች ሲሆን፣ የሕዝብ ግንኙነት ዳይሬክተሩም አቅም በፈቀደ መጠን መድኃኒት እያዳረሱ መሆኑን አመላክተዋል።

ከጤና ሚኒስቴር ጋር በጋራ ባዋቀሩት የአስቸኳይ ግብረ ኃይል ቡድን አማካይነት፣ ነጻ በወጡ አካባቢዎች ለሚገኙ ሆስፒታሎችና ጤና ተቋማት መድኃኒት ለማድረስ እየተሠራ መሆኑን ገልጸዋል።
አያይዘውም፣ በጤና ሚኒስቴር ውስጥ እንደ አንድ ግብረ ኃይል ሆነን በመንቀሳቀስ ነጻ በወጡ አካባቢዎች ለተጎዱ ወገኖች የሚሆኑ መድኃኒቶችንና የሕክምና መሣሪያዎችን እያቀረብን ነው በማለት ዳይሬክተሩ ተናግረዋል።

በደሴ ከተማ የሚገኘው የኢትዮጵያ መድኃኒት አቅራቢ ኤጀንሲ ቅርንጫፍ ሠፊና በርካታ አገልግሎቶችን ሲሰጥ ቆይቷል የሚሉት ዳይሬክተሩ፣ ቅርንጫፉ እስካሁን ለብዙ የጤና ተቋማቶች መድኃኒት በማቅረብ ያገለገለ መሆኑን አመላክተዋል።
አያይዘውም፣ ይህ ውድመት የደረሰበት የኤጀንሲው ቅርንጫፍ እስከዛሬ በመድኃኒት አቅርቦት ለ303 ጤና ጣቢያዎች፣ ለ27 ሆስፒታሎች እንዲሁም ለሌሎች ተቋማት አገልግሎት ሲሰጥ መቆየቱን አብራርተዋል።

የጤና ሚኒስቴር በበኩሉ፣ ከመድኃኒት አቅራቢ አገልግሎት ቅርንጮፎች ውስጥ የሚጠቀሰው የደሴ ቅርንጫፍ በህውሓት ቡድን መውደሙንና መዘረፉን በድረ-ገጹ አሳውቋል።
የጤና ሚኒስቴር ጥቆማ እንደሚያሳየው ከሆነ፣ ከመድኃኒት አቅራቢ ቅርንጫፉ ውድመት በተጨማሪ፣ በአማራ እና በአፋር ክልሎች ከኹለት ሺሕ 700 በላይ የጤና ተቋማት ወድመዋል።


ቅጽ 4 ቁጥር 163 ታኅሣሥ 9 2014

መልስ አስቀምጡ

Please enter your comment!
Please enter your name here