ዳሰሳ ዘ ማለዳ (የካቲት 6/2012 )

Views: 222

ዳሰሳ ዘ ማለዳ (የካቲት 6/2012 )

ቻይና የሚገኙ ተማሪዎችን ወደ ኢትዮጵያ ለማምጣት ግብረኃይል ተቋቋመ

በኮሮና ቫይረስ ስጋት ውስጥ እንደሆኑ የተነገረላቸው ተማሪዎችን ለማስመጣት ግብረኃይል መቋቋሙን የውጭ ጉዳይ ሚኒስቴር ዛሬ አርብ የካቲት 6/2012 በወቅታዊ ጉዳይ  በሰጠው ጋዜጣዊ መግለጫ ላይ አስታወቀ፡፡ በቻይና ለሚገኙ ኢትዮጵያውያን ተማሪዎች መንግስት የገንዘብ ድጋፍ መላኩን የገለጹት የሚኒስቴሩ ቃል አቀባይ ነብያት ጌታቸው ተማሪዎቹ በቫይረስ እንዳይጠቁ ክትትል እየተደረገ ነው ብለዋል።

………………………………………………………………………………………………………………………………………………………………………………………………….
በመጪው ነሐሴ ወር በአገር አቀፍ ደረጃ በሚካሔደው ምርጫ ላይ ሊያጋጥሙ የሚችሉ ክርክሮች የሚስተናገዱባቸው የዳኝነት ችሎቶች እንደሚደራጁ የፌዴራል ፍርድ ቤት አስታወቀ። በቅርቡ የወጣው አዋጅ ቁጥር 1162/2012 ወደ ፍርድ ቤት ሊቀርቡ የሚችሉ የምርጫ ሂደት አከራካሪ ጉዳዮችን በዝርዝር መደንገጉም ተጠቁሟል። ፍርድ ቤቶች የምርጫ ጉዳዮችን የሚታዩባቸው ችሎቶችን ለማደራጀት ከብሔራዊ የምርጫ ቦርድ ጋር እየተሠራ ነው ሲሉ የፌዴራል መጀመሪያ ደረጃ ፍርድ ቤት ምክትል ፕሬዚዳንት ተስፋዬ ንዋይ ገልጸዋል።(ኢዜአ)

……………………………………………………………………………………………………………………………………………………………………………………………………
በሕገ ወጥ መንገድ ወደ ሀገር ውስጥ ሊገቡ የነበሩ የመረጃ እና የመገናኛ መሣሪያዎች መያዙን የኢንፎርሜሽን መረብ ደህንነት ኤጀንሲ አስታወቀ። የተያዙት ስድስት መሣሪያዎች የቴሌኮም ማጭበርበር ለማከናወን የሚያስችሉ Sim box መሆናቸው የተገለጸ ሲሆን በዚህም ከ68 ሚሊየን ብር በላይ ማዳን መቻሉን በኤጀንሲው የሴኩሪቲ ክሊራንስ አገልግሎት ማዕከል ኃላፊ መስፍን ሙሉነህ ገልጸዋል።(የኢንፎርሜሽን መረብ ደህንነት ኤጀንሲ)

……………………………………………………………………………………………………………………………………………………………….

በአዲስ አበባ የሚገኙ በቅርስነት የተመዘገቡ ቤቶች በአግባቡ ካለመያዛቸው የተነሳ አስጊ ሁኔታ ላይ እንደሚገኙ የአዲስ አበባ ባህል፣ኪነ-ጥበብ እና ቱሪዝም ቢሮ አስታወቀ። በቢሮው የቅርስ ጥናትና ጥበቃ ዳይሬክተር ደረጀ ስዩም በከተማዋ የሚገኙ ጥንታዊ ቤቶች በቅርስነት ይለዩ እንጂ አስፈላጊው ጥበቃ፣ እድሳትና እንክብካቤ እየተደረገላቸው ባለመሆኑ አደጋ ላይ ናቸው ብለዋል።(የኢትዮጵያ ፕሬስ ድርጅት)

……………………………………………………………………………………………………………………………………………………………….

ኦሮሞ ነፃነት ግንባር (ኦነግ) አባሎቼና ደጋፊዎቼ በጅምላ እየታሰሩብኝ ነው ያለ ሲሆን እስሩ እየተፈፀመ ያለው በኦሮሚያ ፖሊስ እንደሆነም ግንባሩ ዛሬ አርብ የካቲት 6/2012 በፅህፈት ቤቱ በሰጠው ጋዜጣዊ መግለጫ ላይ አስታወቀ፡፡ በኦሮሚያ ክልል ሰባት ዞኖች እና 26 ከተሞች 350 አባሎቹ፣ ደጋፊዎቹና ሌሎች ወጣቶች መታሰራቸውን በመግለጫው አስታውቋል፡፡ መንግስት ለችግሩ አስቸኳይ መፍትሄ እንዲሰጥ፣ የኢትዮጵያ ሰብዓዊ መብት ኮሚሽን ደግሞ በኦሮሚያ የተለያዩ አካባቢዎች እየተፈፀሙ ያሉ የመብት ጥሰቶችን አጣርቶ መረጃውን ለሕዝብ ይፋ እንዲያደርግ ጠይቋል፡፡(ሸገር ኤፍ ኤም)

……………………………………………………………………………………………………………………………………………………………….

በህገ-ወጥ የሰዎች ዝውውር የአምስት  ሴት ወጣቶች ህይወት እንዲጠፋ ያደረገው ግለሰብ በሞት እንዲቀጣ መወሰኑን የምስራቅ ሐረርጌ ዞን ከፍተኛ ፍርድ ቤት ገለጸ። አብዱከሪም ጣሂር አብደላ የተባለው ግለሰብ ነዋሪነታቸው በምስራቅ ሐረርጌ ዞን ጉርሱም ወረዳ ዳይፈርስ ቀበሌ ገበሬ ማህበር የሆኑ ወጣት ሴቶችን በህገ-ወጥ መንገድ በማስኮብለል ለህልፈተ ህይወት በመዳረጉ ቅጣቱ ተላልፎበታል። (ኢዜአ) ።

……………………………………………………………………………………………………………………………………………………………………………………………………

ግምታዊ ዋጋቸው 8 ሚሊዮን 943 ሺህ 420 ብር የሚገመት የኮንትሮባንድ ዕቃ በአምስት ቀናት ውስጥ በቁጥጥር ስር መዋሉን የገቢዎች ሚኒስቴር አስታወቀ፡፡ በቁጥጥር ስር የዋሉ የኮንትሮባንድ ዕቃዎች የብር ጌጣጌጥ፣ ኤሌክትሮኒክስ፣ ሞባይል፣ የምግብ ዘይት፣ አልባሰት እና ተሸከርካሪዎች እንዲሁም ሌሎች በርካታ ሕገ-ወጥ ንብረቶች ናቸው ተብሏል፡፡የኮንትሮባንድ ዕቃዎቹ የተያዙትም ቦሌ አየር መንገድ፣ ድሬደዋ ቢዮ ቆቤ አካባቢ፣ አዳማ፣ ሞያሌ፣ ሞጆ፣ ባህር ዳር፣ ጅግጅጋ እና በሌሎች የኬላ ጣብያዎች አካባቢ በተደረገው የቁጥጥርና የፍተሻ ስራዎች እንደሆነ ተነግሯል፡፡ (የገቢዎች ሚኒስቴር)


……………………………………………………………………………………………………………………………………………………………………………………………………
በአፍሪካ እስከ የካቲት 6/2012  ድረስ በኮሮና ቫይረስ የተያዘ አንድም ሰው አለመኖሩን በአፍሪካ የበሽታ መከላከል እና መቆጣጠር ማእከል (CDC) ዳይሬክተር ጆን ንኬንጋሶንግ ( ዶ/ር) ተናገሩ፡፡የአፍሪካ ኅብረት ኮሚሽን በሽታ መከላከል ዳይሬክተሩ ኮሮና ቫይረስን በተመለከተ በሰጡት መግለጫ ላይ የተረጠሩ 51 ሰዎች እንደነበሩ ተናግረው፣ ሁሉም ከቫረሱ ነፃ መሆናቸው በምርመራ ተረጋግጧል ብለዋል፡፡(ኢቢሲ)

 

 

Comments: 0

Your email address will not be published. Required fields are marked with *

This site is protected by wp-copyrightpro.com