በጋምቤላ ክልል የከፍተኛ ትምህርት ፈቃድ የሌላቸው ኮሌጆች ትምህርት እየሰጡ ነው

Views: 158

በጋምቤላ ክልል 11 ኮሌጆች የከፍተኛ ትምህርት ለመስጠት የሚያስችል ፍቃድ ሳይኖራቸው ተማሪዎችን በመመዝገብ የከፍተኛ ትምህርት እየሰጡ መሆኑ ተገለጸ።
ኮሌጆቹ ከከፍተኛ ትምህርት አግባብነት እና ምዘና ኤጀንሲ ከፍተኛ ትምህርት ለመስጠት የሚያስችል ፈቃድ ሳይሰጣቸው፣ ተማሪዎችን በመጀመሪያ ዲግሪ እና ከዚያ በላይ ባሉ የከፍተኛ ትምህርት ደረጃዎች በማሠልጠን ላይ እንደሚገኙ ኤጀንሲው ገልፆ፣ በክልሉ ፈቃድ የሰጠው ኮሌጅ አለመኖሩን አስታውቋል።

ኮሌጆቹ ከክልሉ የቴክኒክ እና ሙያ ትምህርት ለመስጠት የሚያስችል ፈቃድ የወሰዱ ሲሆን፣ በዚህም ከፍተኛ ትምህርት በመስጠት ላይ እንደሚገኙ ተገልጿል። ክልሉ ለቴክኒክ እና ሙያ ኮሌጆች በደረጃ ለሚሰጡ የሙያ ትምህርቶች እንጂ ከፍተኛ ትምህርት ለሚሰጡ ተቋማት ፈቃድ መስጠት አይችልም ተብሏል፡፡

የኤጀንሲው ዋና ኃላፊ አንዱዓለም አድማሴ ለአዲስ ማለዳ እንደተናገሩት፣ እስከ አሁን በክልሉ ፈቃድ ያገኘ ኮሌጅ የለም። በዚህ ዓመት በተደረገ ማጣራትም፣ አንድ ኮሌጅ ብቻ ጥያቄ አቅርቧል። ሌሎች 11 የሚሆኑ ኮሌጆች ግን ከተፈቀዳለቸው የትምህርት ደረጃ በላይ በማስተማር ላይ ናቸው ብለዋል።

በተጫማሪም ኤጀንሲው ከእነዚህ ኮሌጆች የተገኘ የምስክር ወረቀት ተቀባይነት የሌለው እና ሕገ ወጥ በመሆኑ በመማር ላይ ያሉ ተማሪዎች ተቀባይነት እንደሌለው አውቀው ተገቢውን ጥንቃቄ ሊያደርጉ እንደሚገባ አሳስቧል።

ከእነዚህ ኮሌጆች ተመርቀው በመንግሥት መሥሪያ ቤቶች እና በሌሎች ተቋማት በመሥራት ላይ የሚገኙ ግለሰቦች እንዳሉ ኃላፊው ተናግረዋል።
የጋምቤላ ክልል ትምህርት ቢሮ በበኩሉ፣ ከቅድመ መደበኛ እስከ 12ኛ ክፍል ያሉ የትምህርት ደረጃዎችን የመቆጣጠር ኃላፊነት ብቻ እንዳለበት ገልጿል። የክልሉ ቴክኒክ እና ሙያ ሥልጠና ተቋምም በተመሳሳይ ይህንን ለመቆጣጠር የሚያስችል ኃላፊነት የለንም ብሏል።

የክልሉ የቴክኒክ እና ሙያ ሥልጠና ቢሮ ኃላፊ አኩሉ ኡኬላ እንደገለፁት፣ ቁጥጥሩን ማከናወን የማን ኃላፊነት ነው የሚለው ጉዳይ እስከ ምክር ቤት ድረስ የሚያከራክር ሲሆን፣ ኤጀንሲው 11 ኮሌጆች አሉ ይበል እንጂ እነማን እንደሆኑም ለይቶ አላሳወቀንም ሲሉ ተናግረዋል።

‹‹ችግሩ በጋምቤላ ክልል ብቻ ያለ አይደለም።›› የሚሉት አንዱዓለም፣ በሁሉም ክልሎች የሚስተዋል ሲሆን ቁጥራቸው ከ100 ሺሕ በላይ የሚሆኑ የመንግሥት ሠራተኞች ከእነዚህ ዓይነት ኮሌጆች የተመረቁ እንደሆኑ ያስረዳሉ። ኃላፊው ከ10ኛ ክፍል ዲግሪ የያዙ፣ የሲኦሲ ማረጋገጫ የሌላቸው እንዲሁም በቂ የትምህርት ዝግጅት የሌላቸው እና እውቅና ከሌላቸው የትምህርት ተቋማት የተመረቁ ግለሰቦችን ለይቶ ለመንግሥት ለማቅረብ እየሠራን እንገኛለን ብለዋል።

ውሳኔው በመንግሥት የሚሰጥ ይሆናል ያሉት ኃላፊው፣ መንግሥት ከእነዚህ ተቋማት የተገኙ የምስክር ወረቀቶች ይሰብሰቡ ሊል ይችላል። የሟሟያ ኮርስ እንዲሰጣቸው ሊወስን ይችላል፤ ያለበለዚያ ደግሞ ካላቸው የትምህርት ደረጃ ዝቅ እንዲሉ ይደረጋል ሲሉ ለአዲስ ማለዳ ተናግረዋል።

ይህንንም ለማከናወን ተቋማት ያስመረቋቸውን ተማሪዎች ዝርዝር እንዲያቀርቡ መደረጉ የተገለጸ ሲሆን፣ ከክልሎች ጋር በጋራ በመሆን ዘርፎችን እና መሥሪያ ቤቶችን ለመለየት ኤጀንሲው እየሠራ እንደሚገኝ ታውቋል፡፡

ከክልል ትምህርት ቢሮዎች እና ከፍትሕ አካላት ጋር ያለን ግንኙነት ደካማ ነው ያሉት አንዱዓለም፣ ክልሎች ፈቃድ የሌላቸውን አካላት ለመቆጣጠር ሲሞክሩ ‹እናንተ ምን አገባችሁ! ይህ የፌዴራል ሥራ ነው›› የሚል ምላሽ እንደሚሰጣቸው ጠቅሰዋል። ለክልሎች ኃላፊነት በመስጠት የመቆጣጠር ሥራ እንዲሠሩ ይደረጋልም ብለዋል።

የቁጥጥር ሥራው በአዲስ አበባም በሚታሰበው ልክ የተሳካ አይደለም ያሉት ኃላፊው፣ በከተማ ጫካው ሕንጻዎችን በመከራየት ብዙ ሕገወጥ ሥራዎች ይሠራሉ በማለት ሁኔታውን ገልጸውታል። በቅርብ ጊዜያት ብቻ 22 ካምፓሶች እንዲዘጉ አድርገናል ያሉ ሲሆን፣ ከኅብረተሰቡ የሚመጡ ጥቆማዎችን በመቀበል እና ድንገተኛ ፍተሻ በማድረግ ድርጊቶቹን ለመከላከል እና የማያዳግም እርምጃ ለመውሰድ ኤጀንሲው እንደሚሠራ ጠቁመዋል።

የጋምቤላ ክልል ቴክኒክ እና ሙያ ትምህርት እና ሥልጠና ቢሮ ፈቃድ የሰጠው በደረጃ የቴክኒክ እና ሙያ ሥልጠናዎችን ለሚሰጡ ኮሌጆች ብቻ መሆኑን ገልጾ፣ በእነዚህ ኮሌጆች ላይ ቁጥጥር ለማድረግ ከፌዴራል ተቋማት ድጋፍ ሊደረግ እንደሚገባ አሳስቧል።

ቅጽ 2 ቁጥር 68 የካቲት 14 2012

Comments: 0

Your email address will not be published. Required fields are marked with *

This site is protected by wp-copyrightpro.com